Ezequiel 12:1-28
12 Jujmantan Jehová Diosqa rimapayamuwarqan, paymi niwarqan:
2 “Runaq churin, qanqa mana kasukuq k’ullu runakuna ukhupin tiyashanki. Paykunaqa qhawashaspapas manan rikunkuchu, uyarishaspapas manan reparankuchu.+ Paykunaqa mana kasukuq k’ullu runakunan kanku.+
3 Runaq churin, q’epiykita alistakuy, jinaspa p’unchay kashaqtin, paykuna rikushaqtin apasqapas kashawaq jina ripuy. Paykuna rikushaqtin wasiykimanta juj ladoman ripuy. Yaqapas chaywan kay mana kasukuq k’ullu runakunaqa cuentata qokunkuman.
4 P’unchaypin paykuna rikushaqtin alistakusqayki q’epiykita orqomunki juj ladoman ripunaykipaq. Tutayamushaqtintaq paykuna rikushaqtin ripunki, apasqapas kashawaq jinan ripunki.+
5 ”Paykuna qhawamushaqtin perqapi juj t’oqota ruwanki, chaynintan apanayki cosaskunata orqomunki.+
6 Paykuna qhawamushaqtinmi apanayki cosaskunata q’epirikuspa tutapi ripunki. Uyaykitan pakakunki pampata mana rikunaykipaq. Kaytaqa Israel runakunapaqmi juj señalta jina ruwachishayki”,+ nispa.
7 Noqaqa kamachisqa kasqayman jinan ruwarqani. P’unchaymi q’epiyta orqomurqani, apasqapas kashayman jinan orqomurqani. Tutayamushaqtinmi perqapi juj t’oqota makiywan ruwarqani, laqhaña* kashaqtintaq chayninta apanay cosaskunata orqomurqani, jinaspa q’epirikurqani. Paykuna rikushaqtinmi chaykunataqa ruwarqani.
8 Tutamantanmi jujmanta Jehová Diosqa rimapayamuwarqan, paymi niwarqan:
9 “Runaq churin, ¿manachu Israel runakunaqa, chay mana kasukuq k’ullu runakunaqa tapurqasunkiku: ¿Imatan ruwashanki?, nispa?
10 Paykunata niy: Tukuy munayniyoq Señor Jehová Diosmi nin: Kay willakuyqa Jerusalenpi umallipaqmi,+ chay llaqtapi llapa Israel runakunapaqwanmi, nispa.
11 ”Nillankitaqmi: Noqaqa juj señalmi kani.+ Imaynatachus noqa ruwarqani chhaynatan paykunatapas ruwallanqakutaq. Paykunaqa apasqan kanqaku, preso jinan apasqa kanqaku.+
12 Paykunaq umallinkun apanan cosaskunata q’epirikuspa tutapi lloqsinqa. Perqapin juj t’oqota ruwanqa, chaynintan apanan cosaskunata orqonqa.+ Pampata mana rikunanpaqmi uyantapas pakakunqa, nispa.
13 Noqan llikayta payman wijch’uykamusaq, chhaynapin jap’isqa kanqa.+ Chaymantataq Babiloniaman, Caldea runakunaq jallp’anman apasaq. Ichaqa manan rikunqachu; chaypin wañupunqa.+
14 Llapa ladonpi kaqkunatataq yanapaqninkunatawan tropankunatawan lliuman ch’eqerichisaq,+ noqataq juj espadawan paykunata qatipasaq.+
15 Lliu nacionkunaman llaqtakunaman ch’eqerichiqtiymi paykunaqa yachanqaku noqa Jehová Dios kasqayta.
16 Wakintan ichaqa librasaq espadamanta, yarqaymanta, millay onqoykunamantawan; paykunan may nacionkunamanchus rinqaku chaypi willakunqaku llapa mana allinkuna ruwasqankuta. Chhaynapin paykunaqa yachanqaku noqa Jehová Dios kasqayta”, nispa.
17 Jujmantan Jehová Diosqa rimapayamuwarqan, paymi niwarqan:
18 “Runaq churin, t’antaykita khatatataspa* mijuy, unuykitapas samapakuspa may llakisqa ujay.+
19 Llaqta runakunata niy: Tukuy munayniyoq Señor Jehová Diosmi Israel jallp’api kaq Jerusalenpi runakunamanta nin: Mana allinkunata ruwasqankuraykun+ jallp’ankuqa ch’usaqyachisqa kapunqa,+ chaymi t’antankuta llakisqa mijunqaku, ununkutapas manchasqan ujanqaku.
20 Runaq tiyasqan llaqtakunan thunisqa kapunqa, jallp’apas wijch’usqan kapunqa,+ chhaynapin qankunaqa yachankichis noqa Jehová Dios kasqayta,+ nispa”.
21 Jujmantan Jehová Diosqa rimapayamuwarqan, niwarqanmi:
22 “Runaq churin, ¿imaninankutan nishanku Israel runakuna: P’unchaykunaqa pasashantaq, manataq rijuriypi rikukusqanqa junt’akunchu,+ nispa nisqankuwan?
23 Paykunata niy: Tukuy munayniyoq Señor Jehová Diosmi nin: Chay rimaytan tukuchipusaq, manañan Israelpi chay rimay kanqañachu, nispa. Paykunata nillaytaq: P’unchaykunan chayamushan+ llapa ima rikukusqanpas junt’akunanpaq, nispa.
24 Israelpiqa manan kanqañachu falso profetakunapas ni watuspa engañaqkunapas.+
25 Noqa Jehová Diosmi rimarisaq. Noqaq ima rimasqaypas tiempollanpin junt’akunqa.+ Yau mana kasukuq k’ullu runakuna, kausashaqtiykichismi rimasaq,+ rimasqayman jinataqmi ruwasaq, ninmi tukuy munayniyoq Señor Jehová Diosqa, nispa”.
26 Jujmantan Jehová Diosqa rimapayamuwarqan, niwarqanmi:
27 “Runaq churin, Israel runakunan nishanku: Chay rijuriykunaqa may tiempopaqraqchá kakun, chay willakuykuna willasqanpas jayk’aqraqchá junt’akunqa,+ nispa.
28 Paykunata niy: Tukuy munayniyoq Señor Jehová Diosmi nin: Manan ima rimasqaypas qhepataqa chayamunqachu, llapa rimasqaymi junt’akunqa, ninmi tukuy munayniyoq Señor Jehová Diosqa, nispa”.
Uraypi willakuykuna
^ Laqhayaqtaqa “tutayaq” nillankutaqmi.
^ Khatatataytaqa “kharkatiy” nillankutaqmi.
