Ezequiel 13:1-23
13 Jujmantan Jehová Diosqa rimapayamuwarqan, paymi niwarqan:
2 “Runaq churin, Israelpi profetakuna contra rimay,+ chay yanqa rimaqkunata* niy:+ Jehová Diospa rimasqanta uyariychis.
3 Tukuy munayniyoq Señor Jehová Diosmi nin: ¡Imaraqmi kanqa chay yanqa rimaq profetakunamanta! Paykunaqa mana imata rikuspan yuyaykusqankuman jinalla rimashanku.+
4 Israel, profetaykikunaqa raqay-raqaypi* tiyaq atoqkuna jinan kanku.
5 Chay profetakunaqa manan Israel runakunaq llaqtanpa perqakunaq raqranta* allichaqqa rinqakuchu,+ manataqmi Israel runakunaqa atinqakuchu Jehová Diospa p’unchayninpi sayasqalla kaytaqa.+
6 Paykunaqa yanqa rijuriykunatan rikunku, llullakuspan rimashanku, paykunan nishanku: Kaykunaqa Jehová Diospa rimasqankunan, nispa. Manaña noqa Jehová Dioschu paykunata kacharqani chaypas, rimasqanku junt’akunantaraqmi munankupas.+
7 Yau profetakuna, ¿manachu qankunaqa yanqa rijuriykunata willashankichis? ¿Manachu qankunaqa llullakuspa nishankichis: Kaykunaqa Jehová Diospa rimasqankunan, nispa? Jayk’aqmi noqa qankunaman imatapas nirqaykichis, nispa.
8 ”Tukuy munayniyoq Señor Jehová Diosmi nin: Llullakuspa rimasqaykichisraykun, yanqa rijuriykunata willasqaykichisraykun qankuna contra jatarishani, ninmi tukuy munayniyoq Señor Jehová Dios.+
9 Makiyqa chay yanqa rijuriykunata rikuq profetakuna contran kashan,+ llullakuspa rimaqkuna contran kashan. Paykunaqa manan confianza runaykuna ukhupichu kanqaku, manataqmi Israel runakunaq listan ukhupipas rijurinqakuchu. Manan paykunaqa Israel jallp’amanpas kutimunqakuchu; chhaynapin qankunaqa yachankichis noqa tukuy munayniyoq Señor Jehová Dios kasqayta.+
10 Chaykunan kanqa llaqtayta pantachisqankurayku. Paykunaqa mana thaj kay kashaqtinmi, ¡thaj kaymi kashan!, nirqanku, chhaynapin llaqtayta pantachirqanku.+ Pipas yanqa-yanqallata perqata sayarichiqtinmi paykunaqa yesowan chayta llut’anku,*+ nispa.
11 ”Yesowan llut’aqkunata niy: Chay perqaqa urmapunqan, nispa. Sinchitan paramunqa, chijchin* chijchimunqa, sinchitan wayramunqa, chaykunawanmi chayqa urmapunqa.+
12 Chay perqa urmaqtinmi paykunata tapunqaku: ¿Maytaq chay yesowan llut’asqaykichisri?,+ nispa.
13 ”Tukuy munayniyoq Señor Jehová Diosmi nin: Phiñakuyniypin sinchita wayrachimusaq, paratapas sinchita parachimusaq, k’araq phiñakuyniypin manchakuyta chijchichimusaq.
14 Yesowan llut’asqaykichis perqatan ñut’usaq, pampamanmi kumpasaq, cimentacionninkunapas alayrin kapunqa. Llaqta urmaykuqtinqa chaypin qankunapas wañunkichis. Chhaynapin yachankichis noqa Jehová Dios kasqayta, nispa.
15 ”Phiñakuyniyta chay perqaman llut’aqkunamanpas kachaykamuspan nisaq: Chay perqaqa manan kapunñachu, perqata llut’aqkunapas manan kapunkuñachu.+
16 Israelpiqa manañan yanqa rimaq profetakunaqa kanñachu, manan Jerusalenmanta profeciata willaqkunapas kanñachu. Paykunaqa mana thaj kay kashaqtinmi, thaj kaymi kashan nispa willaqku.+ Noqa tukuy munayniyoq Señor Jehová Diosmi chayta nini.
17 ”Runaq churin, llaqtayki warmikuna contra rimay, paykunaqa yanqa profeciakunatan willashanku, yuyaykusqallankutan rimashanku.
18 Paykunata niy: Tukuy munayniyoq Señor Jehová Diosmi nin: ¡Imaraqmi kanqa makipaq pañuelo* siraq warmikunamanta, uma k’uyunata imaymana sayayta siraq warmikunamanta! Qankunaqa runakunata jap’inaykichisraykun chaykunata ruwashankichis. ¿Llaqtay runakunata jap’ispachu qankuna salvakuyta munashankichis?
19 ¿Juj jaft’ay* cebadaraykuchu juj t’antaraykuchu qankuna llaqtay ukhupi pisichawankichis?+ ¿Llaqtay runakunata llullakuspachu qankuna mana juchayoqkunata wañuyman apankichis, juchayoqkunatataq kausachinkichis?,+ nispa.
20 ”Chayraykun tukuy munayniyoq Señor Jehová Diosqa nin: Yau warmikuna, runakunata phalaq animalta jina jap’inaykichispaq pañuelokuna ruwasqaykichis contran kashani. Chay pañuelokunatan qechusaykichis, phalaq animalta jina jap’isqaykichis runakunatataq kacharipusaq.
21 Uma tapanaykichistapas qechusaykichismi, llaqtay runakunatapas makiykichismantan kacharichisaq, manañan paykunataqa jap’inkichisñachu, chhaynapin qankunaqa yachankichis noqa Jehová Dios kasqayta.+
22 Qankunaqa llullakuspa rimasqaykichiswanmi chanin runakunata pisipachirqankichis,+ mana imamanta llakichinay kashaqtinmi paykunata llakichirqankichis. Mana allin runakunatan ichaqa chay ñanllapi kanankupaq astawanraq kallpacharqankichis,+ chay jawan paykunaqa manaña kausanqakuchu.+
23 Manañan qankunaqa imatapas rikunkichisñachu, manataqmi watunkichispasñachu.+ Noqan llaqtayta qankunaq makiykichismanta kacharichisaq, chhaynapin yachankichis noqa Jehová Dios kasqayta, nispa”.
Uraypi willakuykuna
^ Chaypiqa “yuyaykusqankuman jina profecía willaqkunata” nillanmantaqmi.
^ Raqaytaqa “laqaya” nillankutaqmi.
^ Raqrataqa “laqra” nillankutaqmi.
^ Chaypiqa jujpa ruwasqan perqa allin perqasqapas kanman jina rikukunanpaq yesowan llut’asqankumantan rimashan.
^ Chaypiqa “rumi jina chijchin” nillanmantaqmi.
^ Chay pañuelokunataqa suertepaqmi otaq layqa ruwaypaqmi makinkupi watakuqku.
^ Jaft’aytaqa “jach’i” nillankutaqmi.
