Ezequiel 14:1-23
14 Israelmanta wakin umalliqkunan* ñaupayman jamuspa chaypi tiyaykurqanku.+
2 Chaypin Jehová Diosqa rimapayamuwarqan, paymi niwarqan:
3 “Runaq churin, kay runakunaqa millakunapaq idolonkumanmi k’askakunku, chaywanmi jujkunata misk’achispa juchallichishanku. ¿Chaychu noqa paykunawan tapuchikuyman?+
4 Paykunata niy: Tukuy munayniyoq Señor Jehová Diosmi nin: Juj Israel runachus millakunapaq idolonkunaman k’askakunman, runakunatapas juchallichinman, misk’anata churanman, chaymantataq juj profetata tapukuq jamunman chayqa, noqa Jehová Dios kikiymi paytaqa imachus ruwasqanman jina kutichisaq, jayk’achus millay qhelli idolonkuna kan chayman jinan kutichisaq.
5 Llapa Israel runakunaq sonqonmanmi manchakuyta khatatatayta* churasaq, paykunaqa noqata saqespan qhelli idolonkunaman k’askapakushanku,+ nispa.
6 ”Chay Israel runakunata nimuy: Tukuy munayniyoq Señor Jehová Diosmi nin: Noqaman kutimpuychis, saqepuychis chay qhelli idoloykichiskunata, saqepuychis mana allin ruwayniykichiskunatapas.+
7 Mayqen Israel runapas, Israelpi tiyaq waj llaqtayoq runapas noqamanta t’aqakuspa mana valeq qhelli idolonkunaman k’askakunqa, chay ruwasqanwantaq jujkunatapas juchallichinqa, profetayta tapukuqraqtaq jamunqapas chayqa,+ noqa kikiymi, noqa Jehová Diosmi paymanqa kutichisaq.
8 Pay contran noqaqa sayarisaq, payta imachus ruwasqayqa runakunaq manchakunanpaq jinan kanqa, paymantan imaymana rimay kanqa, chaymantataq llaqtaymanta chinkachisaq.+ Chhaynapin qankunaqa yachankichis noqa Jehová Dios kasqayta, nispa.
9 ”Chay profetachus engañasqa kanman, jinaspa imanispapas kutichinman chayqa, chay profeta engañaqqa noqa Jehová Diosmi kani.+ Makiytan noqaqa pay contra jaywarisaq, jinaspa Israel llaqtaymanta chinkachisaq.
10 Paykunaqa sapankankun juchankumanta cuentata qonqaku. Tapukuqpas profetapas juchachasqan kanqaku.
11 Chhaynapin Israel runakunaqa manaña comuntachu purinqaku, manañataqmi noqamanta karunchakuwanqakuchu nitaq qhellichakunqakupasñachu. Paykunaqa llaqtaymi kapunqaku, noqataq Diosninku kasaq,+ ninmi tukuy munayniyoq Señor Jehová Dios”, nispa.
12 Jujmantan Jehová Diosqa rimapayamuwarqan, paymi niwarqan:
13 “Runaq churin, juj nacionchus noqa contra juchallikunman chayqa, makiytan chay nación contra jaywarisaq, chhaynapin mana mijuy kanqachu.*+ Sinchi yarqaymi kanqa.+ Chinkachisaqmi chay nacionmanta runatapas uywatapas.+
14 Noewan,+ Danielwan,+ Jobwan+ imaña chay nacionpi kashankuman chaypas, kinsantillankun chanin kasqankurayku salvakunkuman,+ ninmi tukuy munayniyoq Señor Jehová Dios” , nispa.
15 “Salqa animalkunataña chay nacionman kachayman, jinaspa llapa runata ch’innichinman,* manataq pipas chayninta puriq kanmanñachu chay salqa animalkunarayku chaypas,+
16 noqa wiñaypaq kausaq Diosmi jurani: Chay kinsantin runakunaña chaypi kashankuman chaypas, manan paykunaqa churinkutapas ni ususinkutapas salvankumanchu. Paykunallan salvakunkuman, chay naciontaq ch’in kapunman, ninmi tukuy munayniyoq Señor Jehová Diosqa”.
17 “Espadataña chay suyuman kachaykuyman,+ jinaspa niyman: Suyuntinpi puriy, nispa; chhaynapi llapa runakunataña uywakunataña wañuchinman chaypas,+
18 noqa wiñaypaq kausaq Diosmi jurani: Chay kinsantin runakunaña chaypi kashankuman chaypas, manan paykunaqa churinkutapas ni ususinkutapas salvankumanchu. Paykunallan salvakunkuman, ninmi tukuy munayniyoq Señor Jehová Dios”.
19 “Millay onqoytaña chay nacionman chayachimuyman,+ phiñakuyniyta chayachimuspaña llapa runakunata animalkunata wañuchiyman chaypas,
20 noqa wiñaypaq kausaq Diosmi jurani: Noewan,+ Danielwan,+ Jobwan+ imaña chaypi kashankuman chaypas, manan paykunaqa churinkutapas ni ususinkutapas salvankumanchu. Chanin kasqankuraykun paykunalla salvakunkuman,+ ninmi tukuy munayniyoq Señor Jehová Dios”.
21 “Tukuy munayniyoq Señor Jehová Diosmi nin: Espadata, yarqayta, salqa animalkunata, millay onqoykunatawan+ chayachimuqtiymi Jerusalenqa chhaynapi tarikunqa;+ chay tawantin castigowanmi runakunatapas animalkunatapas chinkachisaq.+
22 Paykunamanta wakinmi ichaqa qhepanqaku,+ churikuna ususikuna iman qhepanqaku, jinaspa apasqa kanqaku. Paykuna chayamuqtinmi imachus ruwasqankuta, imaynachus kausasqankuta rikuspa kusikunkichis; Jerusalenta imachus ruwasqaymanta llakisqa kashaspan paykunata rikuspa kusikunkichis, nispa”.
23 “Paykuna imachus ruwasqankuta, imaynachus kausasqankuta rikuspan kallpachasqa tarikunkichis, chhaynapin yachankichis chay llaqtataqa mana yanqachu imatapas ruwasqayta,+ ninmi tukuy munayniyoq Señor Jehová Dios”.
Uraypi willakuykuna
^ Chaypiqa “kuraq runakunan” nillanmantaqmi.
^ Khatatataytaqa “kharkatiy” nillankutaqmi.
^ Hebreo rimaypiqa “t’anta k’aspinkuta p’akisaq” ninmi. Chaypiqa yaqapaschá t’antanku warkunanku k’aspimanta rimashan.
^ Chaypiqa “mana wawayoqta saqepunman” nillanmantaqmi.
