Ezequiel 16:1-63
-
Jerusalenta Dios munakusqanmanta (1-63)
16 Jujmantan Jehová Diosqa rimapayamuwarqan, paymi niwarqan:
2 “Runaq churin, Jerusalenman willay llapa p’enqay mana allinkuna ruwasqanta.+
3 Paytan ninki: Tukuy munayniyoq Señor Jehová Diosmi Jerusalenta nin: Qanqa Canaán llaqtayoqmi kanki, chaypin nacerqanki. Taytaykiqa amorreo runan karqan,+ mamaykitaq Het warmi karqan.+
4 Nacesqayki p’unchayqa manan pupuykitapas kuchurqasunkikuchu, manan unuwanpas maqchirqasunkikuchu, manan kachiwanpas jawirqasunkikuchu, manataqmi ima telawanpas p’isturqasunkikuchu ni k’uyurqasunkikuchu.
5 Manan pipas chayta ruwananpaq jinaqa llakipayarqasunkichu. Manan pipas khuyapayarqasunkichu. Aswanmi nacesqayki p’unchayqa campoman wijch’urqasunkiku, cheqnikusqasuykikuraykun jawaman saqerparirqasunkiku.
6 ”Chayninta purishaqtiymi yawarkamallaña chaypi qhospashasqanki. Chhayna qhospashaqtan noqaqa nirqayki: ¡Kausankin!, nispa. Arí, yawarkamallaña wijch’urayashaqtiykin nirqayki: ¡Kausankin!, nispa.
7 Noqan qanta mana yupay atiyman jinaraq tukuchirqayki, campopi plantakuna jinaraqmi karqanki, munaytan sumaqtan wiñarqanki, imaymana alajakunawanmi churakuq kanki. Ñuñuykikunapas chujchaykipas allintañan wiñarqan, ichaqa q’alallaraqmi purisharqanki, manaraqmi p’achayki karqanchu, nispa.
8 ”Tukuy munayniyoq Señor Jehová Diosmi nin: Chayninta purishaqtiymi qanqa chaypi kashasqanki, ñan junt’asqa watayoqña kashasqanki, munakunapaq warmi jinañan kashasqanki, jinan noqaqa capayta mast’arimuspa q’ala cuerpoykita p’istuykurqayki.+ Juramentota ruwaspataq qanwan kanaypaq rimanakurqani, chhaynapin qanqa noqaq kapurqanki.
9 Unuwanmi maqchirqayki, llapa yawarniykitan maqchirqayki jinaspa aceitewan jawirqayki.+
10 Chaymantataq munay bordasqa p’achawan, allin qaramanta* ruwasqa usut’awan ima churarqayki. Chaymantapas ancha allin linomanta p’achawanmi p’isturqayki, allin valeq p’achakunatataqmi qorqaykipas.
11 Imaymana alajakunatan churarqayki, makiykimanmi pulserakunata churarqayki, kunkaykimantaq juj collarta churarqayki.
12 Senqaykimanpas munay argollatan churarqayki, ninriykimanpas aretekunatan churarqayki, umaykimanpas munay coronatan churarqayki.
13 Qorimanta qolqemanta alajakunawanmi churakuq kanki, p’achaykipas ancha allin linomanta ruwasqa p’achakunan kaq, allin valeq awasqa p’achakunan, bordasqa p’achakunan kaq. Mijunaykipas allin kaq jak’ullan, miel misk’illan, allin kaq aceitellan kaq. May munay sonqo suwa warmimanmi tukupurqanki,+ reina kanaykipaq jinañan kasharqanki, nispa”.
14 “Ancha munay kasqaykiraykun nacionkunapi allin reqsisqa karqanki,+ qanqa noqaq qhapaq kayniywanmi chhayna munay karqanki,+ ninmi tukuy munayniyoq Señor Jehová Dios”.
15 “Qanmi ichaqa, munay kasqaykipi confiarqanki,+ jinan allin reqsisqa kasqaykirayku ramera warmi jina puriyta qallarirqanki.+ Mana p’enqarikuspan chayninta puriqkunawan qhelli ruwayta ruwarqanki,+ paykunamanmi munay kayniykita qorqanki.
16 K’anchashaq p’achaykikunawanmi yupaychana patakunata* sumaqcharqanki, chaypin qhelli jucha ruwaykunata ruwarqanki.+ Chaykunaqa manan kananchu, manan jayk’aqpas ruwakunanchu.
17 Munay alajaykikunawanmi, qorimanta qolqemanta qosqay alajakunawanmi qhariman rijch’akuq idolokunata ruwakurqanki, chaykunawanmi qhelli jucha ruwaykunata ruwarqanki.+
18 Munay bordasqa p’achaykiwanmi chay idolokunata p’isturqanki, aceiteytapas inciensoytapas paykunamanmi jaywarqanki.+
19 Allin aceitewan, mielwan, allin jak’uwan* ruwasqa t’anta qosqaytan chaykunaman jaywarqanki, sumaq q’apaq ofrendata jinan chaykunata jaywarqanki.+ Chaykunatan qanqa ruwarqanki, ninmi tukuy munayniyoq Señor Jehová Dios”.
20 “Qowasqayki churiykunatan ususiykunatan chay idolokunaman qorqanki,+ sacrificiota jinan chay idolokunaman jaywarqanki.+ ¿Manachu ramera warmi jina purisqaykiwan contentakurqanki, chaychu chaykunataraq ruwarqanki?
21 Churiykunatan wañuchirqanki, jinaspa sacrificiota jina ninapi ruphachirqanki.+
22 Chay millay ruwaykunapi purishaspaqa, ramera warmi jina purishaspaqa manan yuyarirqankichu imaynas sipas kashaspaqa q’alalla, mana p’achayoq karqanki chayta, imaynas yawarkamallaña wijch’urayasharqanki chaytapas.
23 Imaraqmi kanqa chay mana allinkuna ruwasqaykimanta, imapiraqmi tarikunki,+ ninmi tukuy munayniyoq Señor Jehová Dios.
24 Qanqa yanqa idolokunapaqmi moqo patata ruwakurqanki, sapanka plazapin yupaychana patakunata ruwakurqanki.
25 Callekunapin yupaychana patakunata ruwakurqanki, lliupa rikunanpin chaykunata sayarichirqanki. Chayninta puriqkunamanmi munachikurqanki,*+ chhaynapin munay kayniykita qhellicharqanki. Qhelli jucha ruwayniykitapas astawanraqmi yaparqanki.+
26 Egipto runakunawanmi ramera warmi jina purirqanki,+ qhellita kausaq wasimasiyki runakunawanmi qhellichakurqanki. Chhayna qhelli jucha ruwayniykikunawanmi sinchita phiñachiwarqanki.
27 Chaykuna jawan qan contra makiyta jaywarimusaq, pisin mijuyniyki kanqa.+ Cheqnikuqniyki warmikunaq makinmanmi entregasayki;+ qhelli ruwasqaykikunata p’enqarikuspa qhawamuq Filistea runakunamanmi entregasayki.+
28 ”Mana contentakuq kaspan qanqa Asiria runakunawanñataq qhelli juchata ruwarqanki.+ Chaywanpas manapunin sajsarqankichu.
29 Chaymi qanqa astawanraq qhelli juchata ruwarqanki negociante runakunaq jallp’anpi* Caldea runakunawan+ ima. Manapunin chaywanpas sajsarqankichu.
30 ¡¿May qhelli sonqotaq karqankiri, chaytaq khaynaniraq qhelli ruwaykunatari ruwarqanki?! ¡¿Imayna millaymi sonqoyki, chaymi ramera warmi jinaraq khayna millayta purinki?!,+ ninmi tukuy munayniyoq Señor Jehová Dios.
31 Alayri callekunapi moqo patakunata jatarichispaqa, plazakunapi yupaychana patakunata jatarichispapas, ramera warmikunamantapas jujniraytan ruwarqanki, manan pagoykita chaskiyta munarqankichu.
32 ¡Qanqa qosanta wasanchaq warmin kanki! ¡Qosaykita chaskinaykimantaqa mana reqsisqakunatan sumaqta chaskinki!+
33 Llapa ramera warmikunapas paykunan regalotaqa chaskinku;+ qanmi ichaqa llapa qanwan kayta munaqkunaman regalokunata jaywanki.+ Qanmi pagota qonki chhaynapi lliu ladomanta qanwan qhelli ruwaq jamunankupaq.+
34 Qanqa llapa ramera warmikunamantapas jujniraymi kanki. ¡Manan mayqen ramera warmipas qan jinaqa kanchu! Qhelli ruwasqaykimanta jujkuna paganasuykimantaqa qanmi aswanpas paykunaman paganki. Qanqa jujniraytapunin ruwanki.
35 ”Yau ramera warmi,+ Jehová Diospa imachus nisqanta uyariy.
36 Tukuy munayniyoq Señor Jehová Diosmi khaynata nin: Munapayayniykiqa nishupuniñan, munakuqniykikunawan millakunapaq idoloykikunawan qhelli jucha ruwaypi kashaqtiykin q’ala cuerpoyki rikukurqan.+ Chay idolokunamanmi qanqa wawaykikunaq yawarninta jaywarqanki.+
37 Chayraykun noqaqa juñumusaq llapa munakuqniykikunata, llapa pikunawanchus karqanki chaykunata; juñumusaqmi pikunatachus munakurqanki pikunatachus cheqnikurqanki chaykunatapas. Lliu ladomantan qan contra jamunqaku, q’ala cuerpoykitan paykunaman rikuchisaq.+
38 ”Jujwan pantaq warmikunaq juiciontan qanman chayachimusayki,+ yawarta jich’aq warmikunaq castigontan chayachimusayki.+ Celosakuspan phiñakuyniyta qanman jich’aykamusaq, castigotan chayachimusayki.+
39 Qhelli ruwaypi puriqmasiykikunaq makinmanmi entregasayki. Paykunan jamuspa jatarichisqayki moqo patakunata yupaychana patakunata ima thuninqaku,+ qantataq p’achaykita ch’utisunkiku,+ munay alajaykikunatan apapunqaku.+ Mana ima p’achayoqtan, q’alallatan saqesunkiku.
40 Paykunan askha runakunata qan contra pusamunqaku,+ jinan rumiwan ch’aqesunkiku,+ espadawan iman wañuchisunkiku.+
41 Wasiykikunatan ninawan ruphachinqaku,+ askha warmikuna rikushaqtinmi castigoyta qanman chayachimusunkiku. Chhaynapin qhelli jucha ruwayniykita chinkachisaq,+ manañan pimanpas pagankiñachu qanwan qhelli ruwaykunata ruwananpaq.
42 Chaykunawanmi phiñakuyniyta thasnusaq,+ manañan qan contra phiñakusaqñachu.+ Thajmi kapusaq, manañan colerasaqchu, nispa.
43 ”Sipas kasqayki p’unchaykunata mana yuyarisqaykiraykun,+ noqatapas tukuy ima ruwasqaykiwan phiñachiwasqaykiraykun llapa imachus ruwasqaykikunata qanman chayachimusayki, ninmi tukuy munayniyoq Señor Jehová Dios. Chhaynapin qanqa manaña qhelli ruwaykunata ruwankichu, manañan millay ruwaykunapipas purinkichu.
44 ”Rimaypi rimaqkunan qanmanta ninqaku: Chhayna warmiq ususinqa, kasqallantaqmi,+ nispa.
45 Qanqa mamayki kikinmi kanki, qosanta cheqnikuq, wawankunatapas cheqnikuq. Ñañaykikuna kikinmi kanki, qosantapas wawankunatapas mana rikuy atiq. Qankunaq mamaykichisqa Het warmin karqan, taytaykichistaq amorreo runa karqan”.+
46 “Kuraq ñañaykiqa Samarian,+ payqa wichay ladopin* tiyashan ususinkunawan* kuska.+ Sullk’a ñañaykitaq Sodoma,+ paytaq uray ladopi* tiyashan ususinkunawan kuska.+
47 Qanqa manan paykunaq ñannillanpichu purirqanki, manan paykuna jinallachu millayta kausarqanki. Aswanpas pisi tiempollapin paykunamantapas aswan millaytaraq kausarqanki.+
48 Noqa wiñaypaq kausaq Diosmi jurani: Manan ñañayki Sodomapas ni ususinkunapas qan jinaqa ruwarqankuchu, manan ususiykikuna jinapas ruwarqankuchu, ninmi tukuy munayniyoq Señor Jehová Dios.
49 Ñañayki Sodomaq juchanqa kaymi karqan: Paypas ususinkunapas+ jatunchakuqmi karqanku.+ Mijuyninkupas askhan karqan,+ mana imamanta llakikuspan kausarqanku.+ Ichaqa manan paykunaqa wajchakunatapas* ni sufriqkunatapas yanapaqkuchu.+
50 Paykunaqa sinchi uma oqariqmi karqanku,+ rikushaqtiymi mana allinkunata ruwaspalla kausaqku,+ chaymi noqaqa paykunata ch’usaqman tukuchirqani.+
51 ”Samariapas+ manan juchaykikunamantaqa kuskallantapas ruwarqanchu. Qanqa paykunamanta aswan mana allinkunatan ruwarqanki, sinchi millaytan kausarqanki. Chhayna millayta kausasqaykiraykun ñañaykikunaqa qanwan tupanachisqa kaspa aswan chaninraq karqanku.+
52 Kunanqa p’enqasqa k’umu-k’umu puriy, ñañaykikunaq juchantan allinpaq qhawarirqanki. Sinchi millayta kausasqaykiraykun, paykunamanta aswan qhellita kausasqaykiraykun paykuna qanmanta aswan chanin kapunku. Chhaynaqa, ñañaykikunataq qanmanta aswan chanin kapunku chayqa, p’enqasqayá puriy, k’umu-k’umuyá puriy.
53 ”Llapa apasqa kaqkunatan juñumpusaq, juñumusaqmi Sodomamanta apasqa kaqkunatapas ususinkunatapas; juñumusaqmi Samariamanta apasqa kaqkunatapas ususinkunatapas. Paykunawan kuskatan qanmanta apasqa kaqkunatapas juñumusaq+
54 k’umuchisqa kanaykipaq, paykunata allinpaq qhawarichisqaykimantan p’enqasqa tarikunki.
55 Ñañayki Sodomapas ususinkunapas ñaupaqpi jinan kapunqaku, ñañayki Samariapas ususinkunapas ñaupaqpi jinan kapunqaku. Qanpas ususiykikunapas ñaupaqpi jinan kapunkichis.+
56 Jatunchasqa kasqayki p’unchaykunaqa manan ñañayki Sodomamantaqa rimanaykichu karqan,
57 manaraq juchaykikuna rijurimushaqtinqa manan paymantaqa imatapas ninaykichu karqan.+ Kunantaq Siriaq ususinkunapas wasimasinkunapas k’amishasunkiku, muyuriqniykipi kaq Filistea runakunapas maytan pisichashasunkiku.+
58 Qanllan apanki millay kausasqayki jawa imapas kasqantaqa, qhelli kausasqayki jawa mana allinkuna chayamusqantaqa, ninmi Jehová Dios”.
59 “Tukuy munayniyoq Señor Jehová Diosmi khaynata nin: Kunanqa noqañataqmi imachus ruwasqaykiman jina qanta ruwasayki.+ Qanmi rimanakusqanchista mana junt’arqankichu, rimanakusqanchistan mana valeqman tukuchirqanki.+
60 Noqan ichaqa sipas kashaqtiyki rimanakusqanchista yuyarisaq, jinaspa wiñaypaq qanwan rimanakusaq.+
61 Millay purisqaykikunatan yuyarinki, chaykunawanmi p’enqasqa kanki.+ Kuraq ñañaykikunata sullk’a ñañaykikunata ima chaskispan pisichasqa tarikunki. Paykunatan noqaqa ususiykikunata jina qosayki, manaña chaypaq rimanakurqanchischu chaypas.
62 ”Noqa kikiymi qanwan rimanakusaq, chhaynapin yachanki noqa Jehová Dios kasqayta.
63 Juchaykikunata pampachaqtiymi, imataña juchallikurqanki chaypas, chaykunata pichapuqtiymi,+ llapa imachus ruwasqaykita yuyarinki jinaspa sinchi p’enqasqa tarikunki, k’umu-k’umullañan kanki, manan ni rimariytapas munankichu,+ ninmi tukuy munayniyoq Señor Jehová Dios”.
Uraypi willakuykuna
^ Chaypiqa “foca qaramanta” nillanmantaqmi.
^ Hebreo rimaypiqa “alto patakunata” ninmi. Qhaway Explicasqa simikuna nisqapi “Yupaychana patakuna” nisqata.
^ Chaypiqa “ñut’u jak’uwan” nillanmantaqmi.
^ Hebreo rimaypiqa “chakaykita kicharirqanki” ninmi.
^ Hebreo rimaypiqa “Canaán jallp’api” ninmi.
^ Hebreo rimaypiqa “lloq’e ladoykipin” ninmi.
^ Chaypiqa yaqapaschá Samariapi jawa llaqtakunamanta rimashan.
^ Hebreo rimaypiqa “paña ladoykipi” ninmi.
^ Wajchataqa “pobre” nillankutaqmi.
