Ezequiel 22:1-31
22 Jujmantan Jehová Diosqa rimapayamuwarqan, paymi niwarqan:
2 “Runaq churin, ¿ñachu listoña kashanki chay yawar jich’aq llaqtaman llapa millakunapaq ruwasqankunata reparachinaykipaq?+ ¿Ñachu listoña kashanki paykunawan imachus pasanqa chayta willanaykipaq?+
3 Paykunatan ninki: Tukuy munayniyoq Señor Jehová Diosmi khaynata nin: Yau yawar jich’aq llaqta,+ millakunapaq idolokunata ruwaq llaqta+ p’unchayniykin chayamushanña.+
4 Yawar jich’asqaykin juchayoqman tukuchisunki,+ millakuna idoloykikunan qhelliman tukuchisunki.+ P’unchayniyki chayamunantan ñauparachimunki, chinkachisqa kanayki watan chayamunña. Llapa nacionkunan k’amisunki, llapa llaqtakunan asipayasunki.+
5 Llapa qayllapi kaqkuna karupi kaqkuna iman asipayasunkiku.+ Qanqa mana allin rikusqa llaqtan kanki, qanpiqa runa ch’aqwayllan kashan.
6 Qanpi kaq Israel umallikunaqa yawar jich’aypaqmi umalli kanku.+
7 Qanpi kaq taytakunatapas mamakunatapas nishutan pisichanku.+ Waj llaqtayoq runakunatan engañanku, mana taytayoq wawakunatan sufrichinku, viudakunatan pisichanku,+ nispa.
8 ”Qanmi ch’uya cheqasniykunata pisichaq kanki, qanmi samana p’unchayniykunatapas qhellichanki.+
9 Qan ukhupin kashan yanqa tumpaq runakuna, yawar jich’aqkuna,+ orqo patakunapi sacrificio mijuqkuna. Qan ukhupi runakunaqa millay qhellitan kausanku.+
10 Qan ukhupin kashan taytankuq puñunanta mana respetaq runakuna,+ killankuwan qhelli kashaq warmikunata violaq runakuna,+
11 runamasinpa warminwan mana allinkunata ruwaq runakuna,+ qhelli ruwaykunawan qhachuninta p’enqayman churaq runakuna,+ taytanpa ususinta violaq runakuna ima.+
12 Qan ukhupi runakunaqa qolqeraykun yawarta jich’anku,+ ganay yuyaywanmi manunku,+ runamasinmanta engañaspan qolqeta qechunku.+ Qanqa pasaqtan qonqapuwanki, ninmi tukuy munayniyoq Señor Jehová Dios.
13 ”Qan ukhupi runakuna mana allinta ruwaspa qolqeta tarisqankumantan, yawarta ima jinaraq jich’akusqanmantan sinchi phiñasqa kashani.
14 ¿Qan contra jatariqtiy aguantankichu? ¿Makiykipas kaq kallpallayoqchu kashanqa?+ Noqa Jehová Diosmi kaykunata rimashani, noqaqa junt’asaqpunin.
15 Lliu nacionkunamanmi wisñisayki, suyukunamanmi ch’eqechisayki.+ Qhelli kayniykitan tukuchisaq.+
16 Nacionkunaq ñaupanpin pisichasqa kanki, chhaynapin yachanki noqa Jehová Dios kasqayta”,+ nispa.
17 Jujmantan Jehová Diosqa rimapayamuwarqan, paymi niwarqan:
18 “Runaq churin, Israel llaqtaqa manan servinñachu, q’opa jinan noqapaqqa kapun. Hornoman churasqa cobremanta, estañomanta, fierromanta, plomomanta* lloqsiq q’opa jinan kapun. Qolqe q’opa jinan kapun.+
19 ”Chayraykun tukuy munayniyoq Señor Jehová Diosqa nin: Qankunaqa llapaykichistaq mana serviq q’opa kapunkichis chayqa,+ llapaykichistan Jerusalén llaqta ukhupi juñusaykichis.
20 Imaynan qolqetapas, cobretapas, fierrotapas, plomotapas, estañotapas horno ukhupi juñuspa ninawan kananku, ninata phukushaspalla unuyachinku, chhaynatan noqapas k’araq phiñasqa juñusaykichis, jinaspa phiñakuyniy ninata phukumusaykichis, phukushaspallan unuyachisaykichis.+
21 Arí, llapaykichistan juñusaykichis, jinaspa phiñakuyniyta phukumusaykichis;+ chay llaqta ukhupin phiñakuyniy ninawan unuyachisaykichis.+
22 Imaynan qolqetaqa horno ukhupi unuyachikun chhaynatan qankunapas chay llaqta ukhupi unuyachisqa kankichis. Chhaynapin yachankichis noqa Jehová Dios phiñakuyniyta qankunaman chayachimusqayta, nispa”.
23 Jujmantan Jehová Diosqa rimapayamuwarqan, niwarqanmi:
24 “Runaq churin, chay llaqtata niy: Qanqa manan ch’uyanchasqachu kanki, phiñakuy p’unchaypiqa manan qanmanqa para chayamunqachu.
25 Chaypi profetakunaqa mana allinkunatan yuyaykunku.+ Imaynan leonqa jap’isqanta manchaytaraq mijun, chhaynatan paykunapas runakunata manchaytaraq jap’inku.+ Qhapaq kaykunata, qorikunata iman jap’ikapunku. Askha warmikunatan viudaman tukuchipunku.
26 Sacerdotekunapas manan kamachisqay simikunata kasukunkuchu,+ aswanmi ch’uya cheqasniykunata qhellichashanku.+ Paykunaqa manan reparankuchu mayqenchus ch’uya mayqentaqchus qhelli chayta,+ manataqmi pimanpas reparachinkuchu limpio kaqta qhelli kaqtapas.+ Paykunaqa manan respetankuchu samana p’unchayniytapas, aswanmi paykuna ukhupi pisichawanku.
27 Paykuna ukhupi umallikunapas jap’isqan aychata llik’irpariq lobokuna* jinan kanku. Yawarta jich’aspan, runata wañuchispan paykunaqa qolqeta tarinku.+
28 Profetankun ichaqa chay ruwasqankuta imaynan perqatapas yesowan munayta llut’anku chhaynata pakanku. Yanqa rijuriykunatan rikunku, yanqa watuykunatan watunku.+ Tukuy munayniyoq Señor Jehová Diosmi nin, nisparaqtaqmi ninkupas. Noqa Jehová Dios mana imatapas nishaqtiymi paykunaqa chhaynata rimanku.
29 Chay llaqtapi runakunaqa lliutan engañashanku suwashanku ima.+ Mana imayoqtan sufrichinku, wajchatan* ñak’arichinku. Waj llaqtayoqkunatapas imaymanapin engañanku, manan justiciatapas ruwapunkuchu, nispa.
30 ”Paykuna ukhupin juj runata maskhasharqani llaqtaq perqankunata allichananpaq, otaq chay perqaq q’asanpi sayaspa llaqtata jark’ananpaq, chhaynapi chay llaqta ama thunisqa kananpaq.+ Ichaqa manan pitapas tarirqanichu.
31 Chayraykun noqaqa paykunaman sinchi colerayta chayachimusaq, k’araq phiñakuyniywanmi ninawan jina ruphaykachisaq. Imachus ruwasqankuman jinan muchuchisaq, ninmi tukuy munayniyoq Señor Jehová Dios”, nispa.
Uraypi willakuykuna
^ Plomotaqa “titi” nillankutaqmi.
^ Loboqa atoq jinan, ichaqa aswan jatunmi, sinchi phiñataqmi kanpas.
^ Wajchataqa “pobre” nillankutaqmi.
