Ezequiel 23:1-49
23 Jujmantan Jehová Diosqa rimapayamuwarqan, paymi niwarqan:
2 “Runaq churin, iskay warmikunan karqan, paykunaqa juj mamallayoqmi karqanku.+
3 Paykunaqa Egiptopin ramera warmi jina purirqanku,+ sipas kasqankumantapachan ramera warmi jina purirqanku. Chaypin ñuñunkuta q’apichikurqanku, mana jayk’aq llamichikusqanku ñuñunkutan q’apichikurqanku.
4 Kuraq kaqpa sutinmi karqan Olá,* sullk’a kaqpataq karqan Olibá.* Paykunaqa noqaqmi karqanku, paykunan qowarqanku churikunata ususikunatawan. Olá sutiqa Samariawanmi tupan,+ Olibá sutitaq Jerusalenwan.
5 ”Olaqa noqaq kashaspan ramera warmi jina purirqan.+ Asiria runakunatan ima jinaraq munapayarqan,+ munakuqnin runakunatan mayta munapayarqan.+
6 Paykunaqa kamachikuqkuna umallikuna iman karqanku, munay rijch’ayniyoq waynakunan karqanku, azul p’achawan p’achasqan puriqku, caballokunallapin puriqku.
7 Asiriapi aswan allin kaq runakunawanmi Olaqa qhelli jucha ruwaykunata ruwarqan,+ munapayasqan runakunaq millakunapaq idolonkunawanmi qhellichakurqan.
8 Payqa manan Egiptopi qhelli jucha ruwaykuna ruwasqanta saqerqanchu. Sipas kashallaqtinraqmi chaypi runakunaqa paywan karqanku, mana jayk’aq llamichikusqan ñuñuntan chaypi llamichikurqan, paywanmi sinchi millay qhelli ruwaykunata ruwarqanku.+
9 Chaymi noqaqa munapayasqan Asiria runakunaman entregarqani,+ munakuqnin runakunaq makinmanmi entregarqani.
10 Paykunan p’achanta ch’utispa p’enqayman churarqanku.+ Churinkunata ususinkunata iman jap’irqanku,+ jinaspan espadawan wañuchirqanku. Warmikuna ukhupipas p’enqay rikusqan karqan, chhaynatan payqa castigasqa karqan.
11 ”Ñañanpa chaykuna ruwasqanta rikuspataq Olibaqa ñañanmanta aswan millaykunataraq ruwarqan. Aswan millay qhelli jucha ruwaykunapiraqmi purirqan.+
12 Asiria runakunatan imata jinaraq munapayarqan,+ chaypi kamachikuqkunata umallikunata iman munapayarqan. Paykunaqa munay p’achakunawan p’achasqan puriqku, caballokunapin puriqku, munay rijch’ayniyoq waynakunataqmi karqankupas.
13 Chhaynatan paypas ñañan jina qhellichakurqan, iskayninkun mana allin ñanman jaykupurqanku.+
14 Ichaqa payqa aswan mana allinkunataraqmi ruwarqan, perqapi dibujasqa qharikunatan qhawarqan, k’anchaq pukawan dibujasqa Caldea runakunatan qhawarqan.
15 Chayta qhawaspan rikuq allin chumpisqa runakunata, jatun uma k’uyunayoq runakunata, maqanakuypaq jina runakunata. Chay dibujopi rikusqan runakunaqa Babilonia runakuna jinan karqanku, Caldea ladopi naceq runakuna jinan karqanku.
16 Chaykunata qhawaspan paykunata sinchita munapayayta qallarirqan, jinan willaqkunata Caldea ladoman kacharqan.+
17 Babiloniaq churinkunataq paywan puñuq jamuqku, puñunan patapin chay qharikunawan kaq, sinchi mana allin kaqkunatan chay qharikunaqa paywan ruwaqku. Chay qhelli ruwaykunata ruwaspataq payqa millakuspa chay runakunamanta karunchakurqan.
18 ”Payqa tukuy tiempon qhelli jucha ruwayllapi kasharqan, p’enqaytan cuerpontapas q’alachikuq,+ chaymi noqaqa millasqa paymanta karunchakapurqani, imaynan ñañanmantapas karunchakurqani, chhaynatan paymantapas karunchakapurqani.+
19 Sipas kashaspa Egiptopi qhelli jucha ruwaykunapi purisqanta+ yuyarispan payqa astawanraq millay qhelli jucha ruwaykunata ruwarqan.+
20 Imaynan asno jina qhari kayniyoq, caballo jina qhari kayniyoq runakunaq tiyaqmasin warmikunapas* paykunata munapayanku, chhaynatan paypas muyupayaqnin qharikunata sinchita munapayaq.
21 Sipas kashaspa Egiptopi mana allinkuna ruwasqaykita,+ mana jayk’aq llamichikusqayki ñuñuykikunata q’apichikusqaykita yuyarispan mayta chayta munapayarqanki.+
22 ”Yau Olibá, chaykuna ruwasqaykiraykun noqa tukuy munayniyoq Señor Jehová Dios kayta niyki: Munakuqniyki runakunatan colerachisaq,+ millakuspa karunchakusqayki runakunatan sinchita phiñachisaq, jinaspan paykunata qan contra pusamusaq.+
23 Babiloniaq churinkunatan,+ llapa Caldea runakunatan pusamusaq;+ Pecoj runakunata,+ Soa runakunata, Coa runakunata, Asiriaq churinkunata iman pusamusaq. Paykunaqa munay rijch’ayniyoq waynakunan kanku, llapankun kamachikuqkuna umallikuna ima kanku, maqanakuyta yachaq allin kaq runakunataqmi kankupas; chaymantapas paykunaqa caballokunapi puriqmi kanku.
24 Paykunan phawaykamusunkiku carretakunantin, askha soldadokunantin, jark’apakuna jatun escudokunantin, juch’uy escudokunantin,* cascokunantin ima. Lliu ladomantan muyuykusunkiku, noqaq kamachisqaymi paykunaqa juzgasunkiku, munasqankuman jinan juzgasunkiku.+
25 K’araq phiñakuyniytan qanman chayachimusayki, mana khuyapayaspan paykunaqa qanman phawaykamusunkiku. Ninriykitan senqaykitan kuchusunkiku, qanmanta puchuqkunaqa espadawanmi wañuchisqa kanqaku. Churiykikunata ususiykikunatawanmi apapunqaku, pipas qhepaqtaqa ninan ruphapunqa.+
26 P’achaykitan ch’utisunkiku,+ munay alajaykikunatapas apakapunqakun.+
27 Qhelli jucha ruwayniykitan,+ Egiptopi qallarisqayki millay ruwayniykitan tukuchipusaq.+ Manañan chaykunataqa qhawankiñachu, manañan Egiptotapas yuyarinkiñachu, nispa.
28 ”Tukuy munayniyoq Señor Jehová Diosmi nin: Cheqnikusqayki runakunamanmi entregasayki, millakuspa karunchakusqayki runakunaq makinmanmi qosayki.+
29 May cheqnikuywanmi qhawarisunkiku, llapa llank’asqaykitan apakapunqaku;+ mana ima p’achayoqtan, q’ala cuerpotan saqesunkiku. Mana p’enqarikuspa qhelli jucha ruwasqaykikunan, millay juchapi purisqaykikunan, ramera warmi jina purisqaykikunan sut’iman orqosqa kanqa.+
30 Ramera warmi jina nacionkunaq qhepanta purisqaykiraykun,+ millakunapaq idolonkuwan qhellichakusqaykiraykun chhaynapi tarikunki.+
31 Ñañayki jina kausasqaykiraykun+ paypa copanta qanman jap’ichisayki,+ nispa.
32 ”Tukuy munayniyoq Señor Jehová Diosmi nillantaq:
Ñañaykiq chay jatun copantan ujanki,+runakunaq asipayananmi, pisichananmi kanki,chaykunan chay copapiqa junt’a kashan.+
33 Machaypas nanaypas manan kacharisunkichu,ñañayki Samariaq manchakuna copanmi mana kacharisunkichu,thunina copanmi qaqata jap’isunki.
34 Llapantan ujanki,+ p’akisqa copatan khamunki,llakikuymantan aychaykitaraq kuchukunki.
Noqan chaytaqa nishani, ninmi tukuy munayniyoq Señor Jehová Dios, nispa.
35 ”Tukuy munayniyoq Señor Jehová Diosmi nillantaq: Noqata qonqapuwasqaykiraykun, wijch’uwasqaykiraykun mana allinkunapi tarikunki,+ millayta kausasqaykimantan, qhelli juchapi purisqaykimantan castigasqa kanki, nispa”.
36 Jehová Diosmi niwarqan: “Runaq churin, ¿listoñachu kashanki Olá, Olibá contra willakuykunata willanaykipaq?+ ¿Listoñachu kashanki millakunapaq ruwasqankunata rikuchinaykipaq?
37 Wasanchay juchatan ruwarqanku,*+ makinkupas yawarkamallañan kashan. Paykunaqa manan millakunapaq idolokunawan pantay juchallatachu ruwarqanku, aswanpas noqapaq onqokusqanku wawakunatan chay idolokunaman ruphachirqanku, mijunata jinan jaywarqanku.+
38 Mana chaywanpas contentakuspataq chay punch’ay ch’uya wasiyta qhellicharqanku, samana p’unchayniytapas nishutan saruncharqanku.
39 Paykunaqa wawankuta wañuchisqanku p’unchaymi, millakunapaq idolokunaman jaywasqanku p’unchaymi+ wasiyman jamurqanku, chhaynapin wasiyta qhellicharqanku.+ Ch’uya wasiypin chayta ruwarqanku.
40 Karu llaqtakunamantaraqmi runakunata wajachikamurqanku.+ Paykuna jamushanankukamataq qanqa bañakurqanki, ñawiykikunata pintakurqanki, munay alajaykikunawan churakurqanki.+
41 Jinaspa juj munay tiyanapi tiyaykurqanki,+ ñaupaykipitaq juj munay allichasqa mesata churarqanki,+ chaypitaq inciensoyta+ aceiteyta+ ima churarqanki.
42 Mana imamanta llakikuq askha runakunatan uyarikurqan, paykuna ukhupin ch’in ladomanta apamusqanku machasqa runakuna kasharqan. Paykunan warmikunaq makinman munay pulserakunata, umankupaq munay coronakunata churarqanku.
43 ”Chay qhelli ruwaykunapi purispa sayk’usqa warmimantan, jujkunawan pantaq warmimantan noqaqa nirqani: Kay warmiqa qhelli jucha ruwaypin purishallanqa, nispa.
44 Jinan runakunaqa payman jamushallarqanku, imaynan juj ramera warmimanpas jamunku jinata. Sapa kutillanmi runakunaqa jamuqku Olata Olibatawan maskhaq, chay qhelli ruwaypi puriq warmikunata maskhaq.
45 Ichaqa chanin runakunan paykunata juzganqaku, jujkunawan pantasqankumanta,+ yawarta jich’asqankumantawan.+ Paykunaqa jujwan-jujwanmi puriqku, makinkupas yawarkamallañan kashan.+
46 ”Tukuy munayniyoq Señor Jehová Diosmi khaynata nin: Paykuna contran askha soldadokunata pusakamunqa, chay soldadokunan paykunata mancharikunaman tukuchinqaku, tukuy imaymanankutan apapunqaku.+
47 Chay soldadokunan rumikunawan ch’aqespa,+ espadawan ima wañuchinqaku. Churinkunatan ususinkunatan wañuchinqaku,+ wasinkunatapas ninawanmi kanaykunqaku.+
48 Llaqtantinpin qhelli ruwaykunata chinkachisaq. Chayta rikuspan mana mayqen warmipas chayta ruwanqachu, manan pipas qankuna jinaqa qhelli ruwaykunapi purinqakuchu.+
49 Paykunan castigota chayachimusunkichis llapa imachus ruwasqaykichismanta, millakunapaq idolokunawan qhellichakusqaykichismantawan. Chhaynapin qankunaqa yachankichis noqa tukuy munayniyoq Señor Jehová Dios kasqayta,+ nispa”.
Uraypi willakuykuna
^ Olibá sutiqa “karpayqa paypin kashan” ninantan nin.
^ Olá sutiqa “paypa karpan” ninantan nin.
^ Tiyaqmasi warmikunaqa esposakuna jinan karqanku. Qhaway Explicasqa simikuna nisqapi “Tiyaqmasi warmi” nisqata.
^ Chay jark’apakuna juch’uy escudokunataqa flechaqkunan utilizaqku.
^ Chaypiqa Diosta saqespa idolokunata yupaychasqankumantan rimashan.
