Ezequiel 28:1-26
28 Jujmantan Jehová Diosqa rimapayamuwarqan, paymi niwarqan:
2 “Runaq churin, Tiro llaqtapi umallita niy: Tukuy munayniyoq Señor Jehová Diosmi nin:
Sonqoykin sinchi jatunchakuqman tukupun,+ chaymi qanqa jatunchakuspa nishanki:
Juj diosmi kani, lamar-qocha chaupipin juj diospa tiyananpi tiyashani,+ nispa.
Sonqoykipiña diosmi kani nishanki chaypas,qanqa runallan kanki, manan dioschu.
3 Arí, qanqa Danielmanta+ aswan kusa yachayniyoqmi kanki,qanpaqqa manan imapas pakasqaqa kanchu.
4 Yachayniyoq kasqaykiraykun qhapaqman tukupurqanki,allin reparaq kasqaykiraykun kunankama qorita qolqeta askhata juñushanki.+
5 Negocio ruwaytapas kusatan yachanki, chaywanmi askha imaymanayoq kashanki,+chhayna qhapaq kasqaykiraykun sonqoyki sinchi jatunchakuqman tukupun, nispa.
6 ”Chayraykun tukuy munayniyoq Señor Jehová Diosqa nin:
Sonqoykipitaq dios kanaykipaq piensakushanki chayqa,
7 waj llaqtayoq runakunatan, nacionkunamanta aswan millay runakunata qan contra pusamusaq,+paykunan espadankuwan yachayniyoq kasqaykita tukuchinqaku,may munaypaq, may jatunpaq qhawarikusqaykitan qhellichanqaku.+
8 Aya p’ampanamanmi jaykuchisunkiku,lamar-qocha chaupipin manchayta wañuchisqa kanki.+
9 ¿Chhayna wañuchisqa kaspapas, juj diosmi kani, nispachu ninki?
Wañuchiqniykiq makinpiqa runallan kanki, manan dioschu.
10 Waj llaqtayoq runakunaq makinpin wañunki,qhari kaynin qaracha mana kuchusqa runakuna jinan wañunki,noqa kikiymi chayta nini, ninmi tukuy munayniyoq Señor Jehová Dios”, nispa.
11 Jujmantan Jehová Diosqa rimapayamuwarqan, paymi niwarqan:
12 “Runaq churin, Tiro reymanta juj llaki takita takiy, paytan ninki: Tukuy munayniyoq Señor Jehová Diosmi nin:
Qanqa may allinmi karqanki,yachaysapan karqanki,+ may munaymi karqanki.+
13 Edén huertapin karqanki, Diospa huertanpin kasharqanki,imaymana clase ancha valorniyoq rumikunawan adornasqan karqanki.
Rubí rumiwan, topacio rumiwan, jaspe rumiwan, crisólito rumiwan, ónice rumiwan, jade rumiwan, zafiro rumiwan, turquesa rumiwan,+ esmeralda rumiwan iman churasqa karqanki,chay rumikunaq churanankunapas jap’inankunapas qorimantan karqan.
Kamasqa kasqayki p’unchaymi chaykunaqa ruwasqa karqan.
14 Qanqa pakaykuq querubín angelmi karqanki, qantan noqa ajllarqayki.
Qanqa Diospa ch’uya orqonpin kasharqanki,+ raurashaq rumikuna ukhupin puriq kanki.
15 Kamasqa kasqayki p’unchaymantapachan ch’uyata kausarqanki,chaymantan ichaqa mana chanin kaqta ruwayta qallarirqanki.+
16 Negocio ruwasqaykikuna allin kasqanwanmi,+sinchi millayman tukupurqanki, juchakuna ruwaytan qallarirqanki,+chayraykun noqaqa ch’uya orqoymanta wijch’upusayki,qhelli ruwaqta jinan ch’usaqman tukuchisayki.+
Yau pakaykuq querubín, manañan raurashaq rumikuna ukhupiqa purinkiñachu.
17 Munay kasqaykiwanmi sonqoyki jatunchakuqman tukupurqan.+
K’ancharishaq kasqaykin, allin yachayniyoq kasqaykita tukuchirqan.+
Jallp’a pachamanmi wijch’uykusayki.+
Reykunaq ñaupanpin p’enqayman churasayki.
18 Sinchi jucha ruwasqaykiwanmi, qhelli negocio ruwasqaykiwanmi yupaychana wasiykikunata qhellicharqanki.
Qan ukhupin ninata jap’ichisaq, chay ninan ruphapusunki.+
jallp’a pachapin usphaman tukuchisayki, lliupa rikushasqanmi ñut’usayki.
19 Llaqtakunapi reqsisqayki runakunan admirasqa qhawasunkiku.+
Qonqaymi manchaytaraq chinkachisqa kanki.
Wiñaypaqmi ch’usaqyachisqa kanki,+ nispa”.
20 Jujmantan Jehová Diosqa rimapayamuwarqan, paymi niwarqan:
21 “Runaq churin, Sidón ladoman uyaykita kutiriy,+ pay contra rimay.
22 Khaynatan ninki: Tukuy munayniyoq Señor Jehová Diosmi nin:
Yau Sidón, kaypin qan contra kashani, chaupiykipin jatunchasqa kasaq.
Castigotan qanman chayachimusayki,chhaynapin runakunaqa yachanqaku noqa Jehová Dios kasqayta;qan ukhupin noqaqa ch’uyanchasqa kasaq.
23 Millay onqoykunatan chayachimusayki, calleykikunapin yawarta purichisaq.
Espadatan kachamusaq, chay espadan runakunata wijch’u-wijch’uta saqenqa;chhaynapin yachanqaku noqa Jehová Dios kasqayta.+
24 ”Chaykuna pasaqtinmi Israel runakunaqa manaña kiskakunaq ni kisakunaq muyuykusqanchu kanqa,+ manañan pisichaqnin runakunaqa kanqañachu, chhaynapin llapa runakuna yachanqaku noqa tukuy munayniyoq Señor Jehová Dios kasqayta, nispa.
25 ”Tukuy munayniyoq Señor Jehová Diosmi nillantaq: Israel runakunata llapa ch’eqerisqanku llaqtakunamanta jujmanta juñumuqtiymi,+ nacionkunaq rikushasqan paykuna ukhupi ch’uyanchasqa kasaq.+ Paykunaqa kamachiy Jacobman qosqay+ jallp’apin tiyanqaku.+
26 Chaypin mana imata manchakuspa thaj tiyanqaku,+ wasikunatan ruwakunqaku, uvaskunatan plantakunqaku.+ Muyuriqninpi pisichaqnin runakunata chinkachiqtiymi paykunaqa thaj kausanqaku.+ Chhaynapin paykunaqa yachanqaku noqa Diosninku Jehová Dios kasqayta, nispa”.
