Ezequiel 29:1-21
29 Chunka kaq watapi, chunka kaq killapi, chunka iskayniyoq p’unchaypin Jehová Diosqa rimapayamuwarqan, paymi niwarqan:
2 “Runaq churin, Egipto ladoman, faraonpa* kasqanman uyaykita kutiriy. Pay contra, Egipto contra rimay.+
3 Khaynatan ninki: Tukuy munayniyoq Señor Jehová Diosmi nin:
Yau Egipto rey faraón, qan contran kashani,+Nilo* mayupi chutarayaq manchakuy jatun animal,+Nilo mayuqa noqaqmi, noqan ruwakurqani,+ nispa niq,
4 waqoykimanmi ganchokunata churasaq,Nilo mayuykipi kaq challwakunatan sarphaykiman* k’askachisaq.
Nilo mayuykimantan aysamusayki,qanpi k’askasqa challwaykikunatawan kuskatan orqomusayki.
5 Jinaspa qanta challwaykikunatawan ch’in aqo pampapi saqesayki.
Jatun ch’in pampapin wijch’usqa kanki, manan pipas juñusunkichu.+
Llapa salqa animalkunaq, altonta phalaq animalkunaq mijunanmi kapunki.+
6 Chhaynapin Egiptopi llapa tiyaqkuna yachanqaku noqa Jehová Dios kasqayta,yanapayniykichisqa ch’aki carrizo* jinallan karqan Israel runakunapaqqa.+
7 Paykuna makiykimanta jap’ipakushaqtinkun p’akikuspa rijrankuta k’irirqanki.
Qanman taunaykukuqtinkun p’akikurqanki,chhaynapin paykunata urmachirqanki,+ nispa.
8 ”Tukuy munayniyoq Señor Jehová Diosmi nillantaq: Qan contran espadata kachamusaq,+ chay espadan runakunatapas uywakunatapas ch’usaqman tukuchinqa.
9 Egipto jallp’an purunyachisqa ch’usaqyachisqa kanqa,+ jinan paykunaqa yachanqaku noqa Jehová Dios kasqayta. Qanmi nirqanki: Nilo mayuqa noqaqmi, noqan chaytaqa ruwakurqani,+ nispa.
10 Chayraykun noqaqa qan contra, Nilo mayuyki contra kashani. Egiptotaqa ch’usaqmanmi ch’akimanmi tukuchisaq, ch’in pampatan saqesaq.+ Migdolmanta+ Sienekaman+ chhaynata ruwasaq, Etiopía linderokaman* chhayna kanqa.
11 Manan pi runapas ni ima uywapas chaynintaqa purinqachu,+ tawa chunka watan chaypiqa mana pipas tiyanqachu.
12 Chhaynatan Egiptotaqa purunyachisaq, llaqtakunata mana ruwasqaytan ruwasaq, tawa chunka watan+ llaqtankunapas mana piqpa tiyasqan kanqa. Egipto runakunatan llapa nacionkunaman, llapa llaqtakunaman ch’eqerichisaq,+ nispa.
13 ”Tukuy munayniyoq Señor Jehová Diosmi nin: Tawa chunka wata pasaytan, maymanchus Egipto runakuna ch’eqerichisqa karqanku chaymanta jujmanta juñumusaq.+
14 Preso kasqankumantan Patrós jallp’ankuman jujmanta kutichimpusaq,+ chaypin paykunaqa juj gobiernota jatarichinqaku, ichaqa manañan kallpayoqchu kanqa.
15 Egiptoqa mana atiyniyoqmi kapunqa. Nacionkunamanta aswan juch’uymanmi tukuchisaq,+ manañan payqa juj nacionkunata kamachiyta atinqañachu.+
16 Israel runakunaqa manañan jayk’aqpas Egiptoq yanapaynintaqa mañakunqakuchu,+ aswanmi yuyarinqaku Egiptomanta yanapayta mañakusqankuqa mana allin kasqanta. Jinan paykunaqa yachanqaku noqa tukuy munayniyoq Señor Jehová Dios kasqayta, nispa”.
17 Iskay chunka qanchisniyoq watapin Jehová Diosqa ñaupaq kaq killapi, killa qallariy p’unchaypi rimapayamuwarqan, paymi niwarqan:
18 “Runaq churin, Babilonia rey Nabucodonosormi+ ejercitontin Tiro contra rirqan,+ umankupas q’arayanankaman, rijrankupas lluch’ukunankaman chaypi karqanku. Ichaqa manan paypas ni soldadonkunapas Tiro contra risqankumantaqa imallatapas chaskirqankuchu.
19 ”Chayraykun tukuy munayniyoq Señor Jehová Diosqa nin: Egipto naciontan qosaq Babilonia rey Nabucodonosorman.+ Egiptopi llapa qhapaq kaykunatan pay apakapunqa, llapa imachus tarisqantan apanqa. Chaymi soldadonkunapaq pago kanqa, nispa.
20 ”Chay llaqta contra risqanmantan Egiptota qopusaq, noqapaq llank’asqanmantan chayta qopusaq,+ ninmi tukuy munayniyoq Señor Jehová Dios.
21 ”Chay p’unchaymi Israel llaqtata kallpasapaman tukuchisaq,*+ qantaq paykunaq chaupinpi rimanki, chhaynapin paykunaqa yachanqaku noqa Jehová Dios kasqayta”, nispa.
Uraypi willakuykuna
^ Egipto reykunatan “faraón” nispa niqku.
^ Chaypiqa Nilo mayumanta, chay mayumanta lloqsiq yarqhakunamantawanmi rimashan, qatimuq versiculokunapipas kaqllataqmi. Yarqhataqa “larqha, sanja” nillankutaqmi.
^ Sarphataqa “escama, chharpa” nillankutaqmi.
^ Carrizotaqa “soqos, caña” nillankutaqmi.
^ Linderotaqa “colinda, qorpa” nillankutaqmi.
^ Hebreo rimaypiqa “Israel llaqtaq waqranta wiñachisaq” ninmi.
