Ezequiel 30:1-26
30 Jujmantan Jehová Diosqa rimapayamuwarqan, paymi niwarqan:
2 “Runaq churin, khaynata willay: Tukuy munayniyoq Señor Jehová Diosmi nin:
¡Ay ñan p’unchayqa chayamushanña!, nispa waqaychis.
3 Chay p’unchayqa qayllaykamushanñan,Jehová Diospa p’unchayninqa kaypiñan kashan.+
Chay p’unchayqa yana phuyu, manchakuy p’unchaymi kanqa,+nacionkunapaq churasqa p’unchaymi chayamunqa.+
4 Egipto contran juj espada jamunqa, Egipto runakunan wañunqa,llapa imaymana kaqninkunan apasqa kanqa, cimentacionninmantapachan thunisqa kanqa,+chayta rikuspan Etiopiaqa manchakuymanta khatatatanqa.*
5 Etiopía,+ Puj,+ Lud, chay muyuriqpi llapa nacionkuna* iman espadaman qosqa kanqa,Cuf llaqtapas rimanakuy llaqtaq churinkunapas* espadawan wañuchisqan kanqaku, nispa.
6 Jehová Diosmi nin:
Egiptota yanapaqkunapas chinkachisqan kanqaku,Egiptoq atiyninpas jatunchakuq kayninpas tukuchisqan kanqa,+ nispa.
”Migdolmanta+ Sienekaman+ espadawan wañuchisqa kanqaku, ninmi tukuy munayniyoq Señor Jehová Dios.
7 Juj llaqtakunamantapas aswan ch’usaqmanmi tukupunqa, chaypi kaq llaqtakunapas lliumi purun kapunqa.+
8 Egipto nacionman ninata jap’iykachiqtiymi, yanapaqnin llaqtakunapas ñut’usqa kaqtinmi paykunaqa yachanqaku noqa Jehová Dios kasqayta.
9 Chay p’unchaymi noqaqa payllapi confiakuq Etiopiaman willaqkunata barcokunapi kachasaq, chay willaqkuna chayaqtinmi payqa manchakuymanta khatatatanqa; Egiptoq chinkachisqa kanan p’unchay chayamuqtinmi sinchita mancharikunqa.
10 ”Tukuy munayniyoq Señor Jehová Diosmi nillantaq: Egipto runakunatan tukuchisaq, Babilonia rey Nabucodonosorpa makinmanmi qosaq.+
11 Paytan nacionkunamanta mana khuyapayakuq soldadonkunatawan kuskata pusamusaq,+ paykunan Egiptota ñut’uta ruwanqaku. Espadankuta orqospan Egipto contra phawaykunqaku jinaspa lliu runakunata wañuchinqaku.+
12 Nilo mayumanta lloqsimuq yarqhakunatan*+ ch’akichisaq, llapa jallp’ankutataq millay runakunaq makinman saqesaq. Waj llaqtayoq runakunan chay jallp’akunata q’araman tukuchinqaku, lliumi ch’in kapunqa.+ Noqa Jehová Diosmi llapa chaykunata nini, nispa.
13 ”Tukuy munayniyoq Señor Jehová Diosmi nillantaq: Millakuna idolokunatapas llapantan ñut’usaq, Nof llaqtapi*+ mana valeq dioskunatapas ñut’usaqmi. Egiptopiqa manañan jujpas umalliqa kanqañachu, llapa Egiptopitaqmi manchakuyta paqarichisaq.+
14 Patrostan llapanta thunisaq,+ Zoanmanmi ninata jap’iykachisaq, No llaqtamantaq* castigota chayachisaq.+
15 Egiptopi allin perqasqa Sin llaqtamanmi k’araq phiñakuyniyta jich’aykamusaq, No llaqtapi runakunatan ch’usaqman tukuchisaq.
16 Egiptopin ninata jap’iykachisaq, Sin llaqtataq mancharichisqa kanqa. No llaqtaq perqankunatan t’oqonqaku. ¡Nof llaqtamanpas p’unchaymi phawaykunqaku!
17 On llaqtapi* wayna runakunapas, Pibésej llaqtapi wayna runakunapas espadawan wañuchisqan kanqaku, wakin runakunataq preso apasqa kanqaku.
18 Egiptoq yugonta p’akiqtiymi+ Tapanés llaqtaqa tutayanqa, atiyninpas jatunchakuq kayninpas tukuchisqan kanqa.+ Phuyun chay llaqtataqa pakaykunqa, chaypi tiyaqkunatataq presota apapunqaku.+
19 Chhaynatan Egiptoman castigota chayachimusaq, chhaynapin paykunaqa yachanqaku noqa Jehová Dios kasqayta, nispa”.
20 Chunka jujniyoq watapin Jehová Diosqa ñaupaq killapi, qanchis kaq p’unchaypi rimapayamuwarqan, paymi niwarqan:
21 “Runaq churin, Egipto rey faraonpa jujnin makintan p’akini. Manan pipas chay makintaqa jampinqachu, nitaqmi pipas imallawanpas watanqachu, manataqmi espadatapas jap’iyta atinqachu.
22 ”Tukuy munayniyoq Señor Jehová Diosmi nin: Kaypin Egipto rey faraón contra kashani,+ qhali makinta p’akisqa makintawanmi p’akisaq,+ chhaynapin espadata makinmanta urmachisaq.+
23 Chaymantataq Egipto runakunata lliu nacionkunaman wisñisaq, llapa llaqtakunamanmi ch’eqechisaq.+
24 Babilonia reypa makintan kallpachasaq,+ paypa makinmanmi espadayta churasaq.+ Faraonpa makintataq noqa p’akisaq, jinan payqa nanaymanta manchakuytaraq qaparinqa, paypa* ñaupanpin wañunayashaq runa jina qaparinqa.
25 Babilonia reypa makinmanmi kallpata churasaq, faraonpa makintaq p’akisqa warkurayanqa. Babilonia reypa makinman espadayta churaqtiymi, chay espadawan Egiptota ñut’uqtinmi paykunaqa yachanqaku noqa Jehová Dios kasqayta.+
26 Egipto runakunatan lliu nacionkunaman wisñisaq, llapa llaqtakunamanmi ch’eqechisaq,+ chhaynapin paykunaqa yachanqaku noqa Jehová Dios kasqayta, nispa”.
Uraypi willakuykuna
^ Khatatataytaqa “kharkatiy” nillankutaqmi.
^ Chaypiqa “llaqtakuna” nillanmantaqmi.
^ Chaypiqa yaqapaschá Egipto runakunawan rimanakuq wakin Israel runakunamanta rimashan.
^ Yarqhataqa “larqha, sanja” nillankutaqmi.
^ Nof llaqtataqa “Menfis llaqta” nikullantaqmi.
^ No llaqtataqa “Tebas llaqta” nikullantaqmi.
^ On llaqtataqa “Heliópolis llaqta” nikullantaqmi.
^ Chaypiqa Babilonia reymantan rimashan.
