Ezequiel 34:1-31
34 Jujmantan Jehová Diosqa rimapayamuwarqan, paymi niwarqan:
2 “Runaq churin, Israelpi michiqkuna contra juj profeciata willay, paykunata niy: Tukuy munayniyoq Señor Jehová Diosmi nin: ¡Ay imaraqmi kanqa oveja michiqkunamanta!+ Paykunaqa wijsanku junt’achiyllapin kashanku. ¿Manachu michiqkunaqa uywakunata michinanku, manachu paykunata mijuchinanku?+
3 Qankunaqa allin kaq aychallatan mijunkichis, allin willmakunamantan p’achata ruwakunkichis, wira-wirallantan uywatapas ñak’akunkichis,+ ovejakunatan ichaqa mana mijuchinkichischu.+
4 Qankunaqa manan pisi kallpa ovejakunata yanapankichischu, manan onqosqakunatapas jampinkichischu, manan k’irinkunatapas watankichischu, k’itakuqtapas manan kutichimunkichischu, chinkasqakunatapas manan maskhamunkichischu,+ aswanmi munasqaykichista paykunawan ruwarqankichis, comuntan qatikacharqankichis.+
5 Chhaynapin paykunaqa mana michiqniyoq kasqankurayku ch’eqeripurqanku.+ Jinaspa campopi salqa animalkunaq mijunan kapurqanku.
6 Ovejaykunaqa lliu orqokunapin lliu moqokunapin ch’eqe-ch’eqe purirqan. Ovejaykunaqa jallp’a pachantinpin ch’eqerisqa karqan, manan pipas paykunata maskhariq karqanchu, manan pipas kutichimuq karqanchu.
7 ”Yau michiqkuna, Jehová Diospa rimasqanta uyariychis:
8 Tukuy munayniyoq Señor Jehová Diosmi nin: Noqa wiñaypaq kausaq Diosmi jurani: Michiqninku mana kasqanraykun ovejaykunaqa salqa animalkunaq mijunan kapurqan, michiqkunapas manan ovejaykunata maskharqankuchu, aswanmi paykunalla mijurqanku, ovejaykunamantaq mana mijuchirqankuchu, nispa.
9 Michiqkuna, chaykuna ruwasqaykichisrayku uyariychis Jehová Diospa rimasqanta.
10 Tukuy munayniyoq Señor Jehová Diosmi nin: Michiqkuna contran kashani; ovejaykunamantan paykunata cuentata mañasaq, manañan ovejaykunataqa michinqakuñachu,+ paykuna kikinkupas manañan mijunqakuñachu. Siminkumantan ovejaykunata qechusaq, chhaynapi amaña mijunanku kananpaq, nispa.
11 ”Tukuy munayniyoq Señor Jehová Diosmi nin: Kaypin kashani, noqa kikiymi ovejaykunata maskhamusaq, noqa kikiymi paykunata qhawasaq.+
12 Chinkasqa ovejankunata tariq oveja michiq jinan ovejaykunata cuidasaq, sumaqtan mijuchisaq.+ Paykunaqa yana phuyupin, manchakuy p’unchaypin ch’eqerichisqa karqanku, chay ladokunamantan ovejaykunata juñumusaq.+
13 Llaqtakunamanta, nacionkunamantan juñumusaq, jinaspa maypichus kananku jallp’aman pusamusaq, Israel orqokunapin mijuchisaq,+ mayukunaq kasqanpin michisaq, llaqtakunaq qayllanpin mijuchisaq.
14 Allin pastokunapin michisaq, Israelpa alto orqonkunapin michisaq.+ Sumaq pastokunapin kumparayanqaku,+ Israelpa orqonkunapi allin pastokunallatan mijunqaku, nispa.
15 ”Tukuy munayniyoq Señor Jehová Diosmi nillantaq: Noqa kikiymi ovejaykunataqa michisaq,+ noqa kikiymi paykunata puñuchisaq.+
16 Chinkasqakunatan maskhamusaq,+ k’itakunatan kutichimusaq, k’iriyoqkunatan jampisaq, pisi kallpa kaqkunatan yanapasaq. Wirakunata allin kallpasapa kaqkunatan ichaqa ñak’apusaq, juzgaspaymi paykunamanqa chaskinanku castigota chayachimusaq, nispa.
17 ”Chhaynaqa ovejaykuna, tukuy munayniyoq Señor Jehová Diosmi niykichis: Ovejapuratan juzgasaykichis, orqo ovejata orqo cabratawanmi juzgasaq.+
18 ¿Pisichu qankunapaq allin pastokunapi mijusqaykichis? ¿Imaraykutaq wakin pastotari sarurparishankichis? ¿Pisichu qankunapaq ch’uya unuta ujasqaykichispas, chaychu saruspa qonchuchashankichis?
19 ¿Sarusqaykichis pastotachu kunan wakin ovejaykuna mijunqaku? ¿Qonchuchasqaykichis unutachu kunan ujanqaku?, nispa.
20 ”Chay ruwaqkunatan tukuy munayniyoq Señor Jehová Diosqa nin: Kaypin kashani, noqa kikiymi wira ovejakunata tullu ovejakunatawan juzgasaq,
21 qankunaqa llapa onqosqa ovejakunatan wist’ukunatan tanqarparirqankichis, waqraykichiswan takashaspallan karuman ch’eqerichirqankichis.
22 Ovejaykunatan salvasaq, manan imapas paykunataqa mijunqañachu.+ Ovejapuratan juzgasaq.
23 Paykunamanmi juj michiqllata churasaq,+ kamachiy Davidtan churasaq,+ paymi paykunata mijuchinqa, paymi michiqninku kanqa.+
24 Noqa Jehová Diosmi paykunaq Diosninku kasaq,+ kamachiy Davidtaq umallinku kanqa.+ Noqa Jehová Diosmi chayta nini.
25 ”Thaj kay kananpaqmi paykunawan rimanakusaq,+ suyumantan salqa animalkunata chinkachisaq,+ chhaynapin ovejaykunaqa ch’in pampakunapi thaj purinqaku, sach’a-sach’akunapin puñunqaku.+
26 Paykunapas muyuriqninpi llapa moqo-moqokunapas imaymana bendicionkunatan chaskinqaku,*+ tiempollanpin parapas chayamunqa. Para jinaraqmi paykunamanqa bendicionkuna chayamunqa.+
27 Campopi sach’akunapas sumaqtan rurunqa, chajrapas munaytan rurunqa.+ Chaypin paykunaqa thaj kausanqaku. Paykunaq yugonta p’akiqtiymi,+ jap’iqninkuq makinmanta qechumuqtiymi paykunaqa yachanqaku noqa Jehová Dios kasqayta.
28 Manañan nacionkunaq jap’isqanñachu kanqaku, manañan salqa animalkunaq mijunanñachu kanqaku. Paykunaqa thajmi kausanqaku, manan pipas paykunataqa manchachinqachu.+
29 ”Paykunapaqmi wiñachisaq juj allin plantata, chaywanmi allin reqsisqa kanqaku. Manañan paykunaqa yarqaymanta wañunqakuñachu,+ manañan nacionkunapas sarunchanqakuñachu.+
30 Chhaynapin paykunaqa yachanqaku noqa Diosninku Jehová Diosqa paykunawan kashasqayta, paykunapas Israel llaqtapas noqaq llaqtay kasqanta,+ ninmi tukuy munayniyoq Señor Jehová Dios.
31 ”Ovejaykunaqa,+ michisqay ovejakunaqa, qhawasqay ovejakunaqa runallan kankichis, noqataq Diosniykichis kani, ninmi tukuy munayniyoq Señor Jehová Dios”, nispa.
Uraypi willakuykuna
^ Chaypiqa yaqapaschá “paykunawanmi bendecisqa kanqaku” nillanmantaq.
