Ezequiel 37:1-28
37 Jehová Diospa makinmi noqawan kasharqan, espiritunwanmi Jehová Diosqa juj jatun wayq’oman apawarqan,+ chaypin askha runa tullukuna kashasqa.
2 Jinan Diosqa chay tullukunaq chaupinta purichiwarqan, chay tullukunaqa ch’akillañan kasqa,+ sinchi askhataqmi kasqapas.
3 Chaypin payqa tapuwarqan: “Runaq churin, ¿atinkumanchu kay tullukuna jujmanta kausariyta?”, nispa. Noqataq nirqani: “Tukuy munayniyoq Señor Jehová, qanmi chaytaqa yachanki”,+ nispa.
4 Jinan payqa niwarqan: “Chay tullukunamanta rimay, paykunata niy: Yau ch’aki tullukuna, uyariychis Jehová Diospa siminta.
5 ”Tukuy munayniyoq Señor Jehová Diosmi kay ch’aki tullukunata nin: Qankunamanmi kausay samayta churasaykichis, jinan kausarinkichis.+
6 Jank’ukunata aychata iman churasaykichis, aycha qarawanmi k’uyusaykichis, kausay samaytan qosaykichis, chhaynapin kausarinkichis. Chaykunawanmi yachankichis noqa Jehová Dios kasqayta, nispa”.
7 Jinan noqaqa paypa kamachiwasqanman jina rimarqani. Rimayta tukuqtiy jinan raqhaqaqaqta uyarirqani, tullukunan juñunakuyta qallarirqan, ch’ulla-ch’ullallamantan juñunakurqanku.
8 Chaymantataq jank’ukuna aychakuna ima paykunapi rijurirqan, aycha qarapas llapankupin rijurirqan. Ichaqa manaraqmi kausay paykunapi karqanchu.
9 Chaymantan Diosqa niwarqan: “Runaq churin, wayrata rimapayay, wayrata niy: Tukuy munayniyoq Señor Jehová Diosmi nin: Wayra,* jallp’a pachaq tawantin k’uchumanta* jamuy, kay wañuchisqanku runakunata phukuykuy, kausarinankupaq phukuykuy, nispa”.
10 Noqataq paypa kamachiwasqanman jina rimarqani, jinan chay runakunaman kausay samay jaykuqtin kausarispa sayarirqanku,+ paykunaqa mana yupay atiy soldadokunan kasqaku.
11 Chaymantan payqa niwarqan: “Runaq churin, chay tullukunaqa Israel runakunan kanku.+ Paykunan nishanku: Tullunchiskunaqa ch’akillañan kashan, manan ima suyakuyninchispas kanñachu.+ Lliu chinkachisqan kashanchis, nispa.
12 Paykunamanta khaynata niy: Tukuy munayniyoq Señor Jehová Diosmi nin: Llaqtalláy, aya p’ampanaykichistan kichasaq,+ maypichus p’ampasqa kashankichis chaymantan sayarichimusaykichis, jinaspa Israel llaqtaman pusampusaykichis.+
13 Aya p’ampanaykichista kichaqtiymi, p’ampasqa kasqaykichismanta sayarichiqtiymi, llaqtalláy, qankunaqa yachankichis noqa Jehová Dios kasqayta,+ nispa.
14 Espirituytan* qankunaman churasaykichis chhaynapin kausarinkichis.+ Jallp’aykichispin, llaqtaykichispin churapusaykichis. Chhaynapin qankunaqa yachankichis noqa Jehová Dios kasqayta. Noqa kikiymi kaykunataqa rimashani, noqa kikiymi ruwashani, ninmi Jehová Dios”, nispa.
15 Jujmantan Jehová Diosqa rimapayamuwarqan, paymi niwarqan:
16 “Qan, runaq churin, juj k’aspita jap’iy, chaypi qelqay: Judapaq, paywan kaq Israel llaqtapaqwan,+ nispa. Juj k’aspita jap’illaytaq, chaypi qelqay: Josepaq, paywan kaq Israel llaqtapaqwan, chay k’aspiqa Efrainwanmi tupan,+ nispa.
17 Chaymantataq chay iskaynin k’aspita jujllaman juñuy, makiykipiqa juj k’aspillapas kanman jinan kanqa.+
18 Llaqtayki runakunachus tapusunki: ¿Imaninanmi chay?, nispa chayqa,
19 khaynatan ninki: Tukuy munayniyoq Señor Jehová Diosmi nin: Efrainpa makinpi kaq Josepa k’aspinta paywan kaq Israel runakunatawanmi oqarisaq, chaytataq Judapa k’aspinwan kuskata jujllachasaq. Iskayninkun juj k’aspilla kanqaku,+ ch’ulla k’aspillapas kanman jinatan jap’isaq, nispa.
20 Chay k’aspikunaqa iskayninkun makiykipi kanqa, chhaynapi paykuna rikunankupaq.
21 ”Chaymantataq paykunata ninki: Tukuy munayniyoq Señor Jehová Diosmi nin: Llapa nacionkunamantan Israel runakunata orqomusaq, llapa llaqtakunamantan juñumusaq, jinaspa jallp’ankuman, llaqtankuman kutichimpusaq.+
22 Paykunaqa juj nacionllan kapunqaku,+ Israel orqo-orqokunapiqa juj llaqtallan kapunqaku, juj reyllan paykunata kamachinqa.+ Manan paykunaqa iskay nacionñachu kanqaku, manan iskay reykunañachu paykunataqa kamachinqa.+
23 Manañan qhellichakunqakuñachu millakunapaq idolokunawan, manañan ruwanqakuñachu millay qhelli ruwaykunatapas ni mana allin ruwaykunatapas.+ Mana allin millay ruwayninkumantan orqomusaq jinaspa ch’uyanchasaq. Chhaynapin paykunaqa llaqtay kanqaku, noqataq Diosninku kasaq.+
24 ”Kamachiy Davidmi paykunaq reyninku kanqa,+ juj michiqllan paykunata michinqa.+ Chaninchayniykunaman jinan kausanqaku, llapa leykuna qosqaytan kasukunqaku.+
25 Kamachiy Jacobman qosqay jallp’apin tiyanqaku, ñaupa taytankuq tiyasqan jallp’apin tiyanqaku.+ Chaypin wiñaypaq tiyanqaku,+ paykunapas, churinkunapas, churinkunaq churinkunapas.+ Kamachiy Davidmi paykunataqa wiñaypaq umallinqa.+
26 ”Paykunawanmi thaj kay rimanakuyta ruwasaq,+ wiñaypaqmi chay rimanakuyqa kanqa. Allintan paykunataqa sayachisaq, askhatan mirachisaq;+ paykuna chaupipin yupaychana wasiyta churasaq, chaypin wiñaypaq kanqa.
27 Wasiyqa paykuna ukhupin kashanqa. Noqan Diosninku kasaq, paykunataq llaqtay kanqaku.+
28 Paykuna chaupipi wasiy wiñaypaq kaqtinmi, llapa nacionkuna yachanqaku noqa Jehová Dios Israelta ch’uyanchapusqayta,+ nispa”.
Uraypi willakuykuna
^ Chaypiqa “Kausay samay” nillanmantaqmi.
^ Hebreo rimaypiqa “tawantin wayramanta” ninmi.
