Ezequiel 4:1-17
4 ”Qan, runaq churin, juj adobeta jap’iy jinaspa ñaupaykiman churay, chaypitaq Jerusalén llaqtata dibujay.
2 Chay muyuriqta cercay,+ jark’aq cercota ruway,+ phawaykunapaq jallp’a montonta jatarichiy;+ chay qayllapi soldadokunapaq karpakunata ruway, perqa thunina carretakunatapas churay.+
3 Juj p’alta fierrota jap’iy, chaytan churanki qantawan ruwasqayki llaqtatawan t’aqaqta, chay fierron kanqa juj cerco jina, qanmi chay llaqtata cercanki, chaypa qhepanmantan chay llaqtata mana chinkachispa qhawanki. Chay ruwasqaykin Israel llaqtapaq juj señal jina kanqa.+
4 ”Chaymantataq lloq’e ladonpamanta k’iraykuspa* Israelpa juchanta apanki.+ Lloq’e ladonpamanta kumpaykusqayki p’unchaykunan paykunaq juchanta apanki.
5 Kinsa pachaj isqon chunka p’unchaymi chhayna kanki, jayk’a watachus juchallikusqankuman jinan chhayna kanki;+ qanmi Israel runakunaq juchanta apanki.
6 Chay p’unchaykuna junt’akunankaman chayta ruwanki.
”Chaymantataq paña ladonpamantañataq kumpaykunki,+ tawa chunka p’unchaymi Judá runakunaq juchanta apanki. Sapa watamantan juj p’unchay kanqa, chaytan noqa kamachiyki.
7 Jerusalén cercoman uyaykita kutiriy,+ makiykita q’enpirukuspa pay contra rimay.
8 ”Waskhakunawanmi watasayki chhaynapi ama juj ladoman kutirinaykipaq, chay llaqtata muyuykusqayki p’unchaykuna junt’akunankaman ajinalla kanki.
9 ”Trigota, cebadata, habasta, lentejasta, mijo nisqata, espelta nisqa trigota iman apakamunki; chaytan juj puruñapi churanki, chaykunawanmi t’antata ruwakunki. Chaytan mijunki lloq’e ladonpamanta kumparayasqayki kinsa pachaj isqon chunka p’unchaykuna.+
10 Sapa p’unchaymi pesaspa kuskan librata jinalla* mijunki. Kaq horasllatan sapa p’unchaypas mijunki.
11 Unuykipas medisqallan kanqa, kuskan litrollatan* tomanki. Kaq horasllatan sapa p’unchaypas tomanki.
12 ”Chay t’antataqa cebada t’antata jinan mijunki. Paykunaq rikushasqanmi chay t’antataqa runaq ch’aki jatun jisp’ayninwan chayachinki”, nispa.
13 Chaymantan Jehová Diosqa niwallarqantaq: “Chhaynatan Israel runakunaqa t’antankuta mijunqaku, qhellita. Lliu ch’eqechisqay nacionkunapin chhaynata mijunqaku”,+ nispa.
14 Jinan noqaqa nirqani: “¡Tukuy munayniyoq Señor Jehová Diosníy, amapuni chaytaqa niwaychu! Juch’uy kasqaymantapachapas manapunin noqaqa imawanpas qhellichakurqanichu. Manan wañusqa animalpa tarisqa aychantapas ni wañuchisqa animalpa aychantapas mijurqanichu,+ manan ima qhelli aychapas simiymanqa jaykurqanchu”,+ nispa.
15 Paytaq niwarqan: “Chhaynaqa, waka q’awawan t’antaykita chayachinki, amaña runaq jatun jisp’ayninwanchu”, nispa.
16 Payqa niwallarqantaqmi: “Runaq churin, Jerusalenpiqa pisin mijuy kanqa,*+ jinan paykunaqa may llakiwan medisqallata mijunqaku.+ Unupas medisqallan kanqa, manchan-manchanmi tomanqakupas.+
17 T’antanku pisiyaqtinmi, ununkupas pisiyaqtinmi may llakisqa qhawarinakunqaku, juchanku jawan pisi kallpayapunqaku.
Uraypi willakuykuna
^ K’iraykuytaqa “siriykuy” nillankutaqmi.
^ Hebreo rimaypiqa “iskay chunka siclota” ninmi. Juj sicloqa 11,4 gramostan pesaq. Qhaway “Astawan yachanapaq B14” nisqata.
^ Hebreo rimaypiqa “hin medidaq soqta kaq partellantan” ninmi. Qhaway “Astawan yachanapaq B14” nisqata.
^ Hebreo rimaypiqa “t’anta k’aspinkutan p’akisaq” ninmi. Chaypiqa yaqapaschá t’antanku warkunanku k’aspimanta rimashan.
