Ezequiel 44:1-31
44 Jinan payqa jujmanta templo jawaman apawarqan, inti lloqsimuy lado punku jawamanmi apawarqan,+ chay punkuqa wisq’asqan kashasqa.+
2 Chaymantan Jehová Diosqa niwarqan: “Kay punkuqa wisq’asqallan kanqa. Manan pi runapas kay punkuntaqa jaykunqachu; Jehová Diosmi, Israel runakunaq Diosninmi kay punkuntaqa jaykurqan,+ chaymi kay punkuqa mana kichakunqachu.
3 Umallin ichaqa umalli kasqanrayku chaypi tiyaykunqa, Jehová Diospa ñaupanpi tiyaykuspan t’antata mijunqa.+ Chay sala jina jatun punku cuartontan jaykunqapas lloqsinqapas”,+ nispa.
4 Chaymantataq wichay lado punkunta templo qayllaman apawarqan. Qhawarinaypaqmi chaypi Jehová Diospa k’anchaynin Jehová Diospa templonpi junt’a kashasqa.+ Chayta rikuspan noqaqa pampaman kumpakurqani.+
5 Chaypin Jehová Diosqa niwarqan: “Runaq churin, tukuy yuyaywan uyariway; allinta qhaway, Jehová Diospa templonmanta kamachikuykuna leykuna willasqayta allinta uyariway. Temploman jaykunata llapa lloqsinakunatapas allinta qhaway.+
6 Chay mana kasukuq k’ullu Israel runakunata niy: Tukuy munayniyoq Señor Jehová Diosmi nin: Yau Israel runakuna, ¿jayk’aqkaman mana allin ruwaykunapi purinkichis? Saqepuychis chayta.
7 Temploymanmi qankunaqa pusamushankichis qhari kaynin qaracha mana kuchusqa forasterokunata, sonqon mana señalasqa runakunata, paykunan wasiyta qhellichashanku. Qankunaqa t’antata, wirata, yawartapas jaywamushawaspan rimanakusqay simita p’akishankichis, millay ruwaykunata ruwaspan chayta mana valeqman tukuchishankichis.
8 Wasiypi ch’uya ruwaykunata qankuna ruwanaykichismantaqa+ jujkunamanmi chayta saqenkichis, nispa.
9 ”Tukuy munayniyoq Señor Jehová Diosmi nin: Mayqen waj llaqtayoq runapas qhari kaynin qaracha mana kuchusqachu kanqa ni sonqonpas señalasqachu kanqa chayqa, manan wasiymanqa jaykunqachu, nispa.
10 ”Israel runakuna mana allin ñanman jaykushaqtinku noqamanta karunchakuq Leví runakunaqa,+ millay qhelli idolonkuq qhepanta riq Leví runakunaqa cuentatan qonqaku, mana allin ruwasqankumantan cuentata qonqaku.
11 Chaymantan ichaqa ch’uya wasiypi servinqaku, templo punkukunatan qhawanqaku,+ ruphachina ofrendapaq uywakunatan ñak’anqaku, llaqta runakunapaq sacrificiokunatan ñak’anqaku, jinaspapas llaqta runakunatan servinqaku.
12 Millakunapaq idolokunata servisqankuraykun, Israel runakunata juchaman urmachisqankuraykun,+ makiyta oqarispa paykuna contra jurarqani. Paykunaqa llapa imachus ruwasqankumantan cuentata qonqaku, ninmi tukuy munayniyoq Señor Jehová Dios.
13 Paykunaqa manan sacerdote jina serviwanankupaqqa qayllaykamuwanqakuchu, manan ch’uya kaqkunamanpas asuykunqakuchu. Mana allin ruwasqankumantan p’enqasqa kanqaku.
14 Chaymantan ichaqa templopi imaymana ruwanakunaman churasaq; chaypin paykunaqa ruwanankuta ruwanqaku, imaymana ruwanankutan junt’anqaku.+
15 ”Tukuy munayniyoq Señor Jehová Diosmi nillantaq: Sadocpa churin Leví sacerdotekunaqa+ Israel runakunaña mana allin ñanman jaykupurqanku chaypas, chay runakunaña noqamanta t’aqakurqanku chaypas,+ junt’ashallarqankun imachus ruwanankuwan. Chaymi paykunaqa ñaupayman qayllaykamunqaku, paykunan wirakunatapas+ yawartapas+ jaywamuwanqaku.
16 Paykunan ch’uya wasiyman jaykumunqaku, paykunan mesaypi serviwanqaku.+ Noqapaq imachus ruwanankutan junt’anqaku.+
17 ”Ukhu patioman jaykuspaqa, lino p’achawan churasqan jaykunqaku.+ Aman pipas ukhu patio punkupipas ni ukhu patiopipas lana p’achawan churasqaqa servinqachu.
18 Uma k’uyunankupas lino q’aytumantan kanqa, trusankupas* lino q’aytumantan kallanqataq.+ Aman jump’ichiq p’achawanqa churakunqakuchu.
19 Jawa patioman lloqsinankupaqqa, runakunaq kasqanman rinankupaqqa ch’utikunqakun servicio ruwananku p’achankuta,+ chaytataq mijunapaq ch’uya cuartokunapi saqenqaku.+ Chaymantataq juj p’achawan churakunqaku chhaynapi ama llaqta runakunata ch’uyanchanankupaq.
20 Aman umankutapas k’isukunqakuchu+ nitaqmi chujchankutapas jatuntaqa wiñachikunqakuchu; rutukunqakun chujchankutaqa.
21 Ukhu patioman jaykunankupaqqa aman sacerdotekunaqa vinota ujanqakuchu.+
22 Aman juj viudawanpas ni divorciasqa warmiwanpas casarakunqakuchu.+ Ichaqa casarakunkumanmi Israel llaqtapi mayqen doncella sipaswanpas* sacerdoteq viudanwanpas,+ nispa.
23 ”Llaqtay runakunamanmi yachachinqaku imachus limpio imataqchus millay chayta, yachachillanqakutaqmi imachus ch’uya imataqchus qhelli chaytapas.+
24 Juicio kaqtinqa paykunan chaypi umallinqaku,+ kamachikusqayman jinan juiciota aparinqaku.+ Fiestakunapaq kamachikuy qosqaytapas leykuna churasqaytapas llapantan kasukunqaku,+ samana p’unchaytapas noqapaqmi ch’uyanchanqaku.
25 Aman wañusqa runakunamanqa qayllaykunqakuchu, qayllaykunqaku chayqa qhellin kanqaku. Ichaqa taytanku, mamanku, churinku, ususinku, wayqenku, soltera panankupas wañupuqtinqa atinkumanmi qhellichakuyta.+
26 Ch’uyanchakusqanku qhepamanqa qanchis p’unchaytan suyanqaku jujmanta servinankupaqqa.
27 Ukhu patioman jaykusqan p’unchayqa, servicio ruwananpaq ch’uya ukhuman jaykusqan p’unchayqa, jucha pampachay ofrendantinmi jaykunqa,+ ninmi tukuy munayniyoq Señor Jehová Dios.
28 ”Paykunaq herencianqa noqan kani.+ Aman paykunamanqa ima herenciatapas Israelpiqa qonkichischu, noqan paykunaq herencianqa kani.
29 Paykunan mijunqaku jak’u ofrendata,+ jucha pampachay ofrendata, juchaman urmasqamanta ofrendatapas;+ Israelpi Diospaq t’aqasqa llapa kaqkunapas paykunaqmi kanqa.+
30 Ñaupaq kaq allin rurukunaqa qankunaq qosqaykichis llapa ofrendakunapas sacerdotekunapaqmi kanqa.+ Ñaupaq kutasqa chhanqa* jak’utapas sacerdotekunamanmi apamunkichis.+ Chaykunata ruwankichis chayqa imaymana bendicionkunan wasiykichisman chayamunqa.+
31 Sacerdotekunaqa aman mijunqakuchu altonta phalaq wañusqa animaltapas ni juj animalpa llik’isqan animaltapas.+
Uraypi willakuykuna
^ Trusataqa “calzoncillo” nillankutaqmi.
^ Doncella sipastaqa “qhariwan mana jayk’aq puñuq sipas” nillankutaqmi.
^ Chhanqataqa “chharqa” nillankutaqmi.
