Ezequiel 45:1-25
45 ”Herenciaykichis jallp’ata t’aqaspaqa+ Jehová Diospaqpas t’aqankichismi,+ ofrendata jinan chayta t’aqankichis. Chay jallp’aq largonmi kanqa iskay chunka pisqayoq waranqa codo,* anchontaq kanqa chunka waranqa codo.+ Chayqa Diosman qosqa ch’uya jallp’an kanqa.
2 Chaypa chaupinpin sapaqta t’aqakunqa ch’uya wasipaq, chaypa anchonpas largonpas pisqa pachaj codon kanqa.+ Chaypa sapanka ladonpitaq pasto pampa kanqa, chaypa anchonqa pisqa chunka codon kanqa.+
3 Chaymantapachan iskay chunka pisqayoq waranqa codota medinki, chaymi largon kanqa, anchontaq chunka waranqa codo kanqa. Chay chaupipin kanqa templo, chayqa ch’uyay-ch’uyan kanqa.
4 Chay t’aqasqa ch’uya jallp’aqa sacerdotekunapaqmi kanqa,+ templopi Jehová Diosta serviqkunapaqmi kanqa.+ Chaypin paykunaq wasinqa kanqa, chaypin templopas kanqa.
5 ”Templopi llank’aq Leví runakunapaq jallp’aqa iskay chunka pisqayoq waranqa codon largonman kanqa, anchontaq chunka waranqa,+ chaypin paykunapaq kanqa iskay chunka mijuna cuartokuna.+
6 ”Llaqtamanpas qonkichismi jallp’ataqa, chaypa largonqa iskay chunka pisqayoq waranqa codon kanqa (chayqa noqaman qosqa jallp’a jinan kanqa), anchontaq pisqa waranqa codo kanqa.+ Chay jallp’aqa llapa Israel runakunapaqmi kanqa.
7 ”Diosman qosqa jallp’aq iskaynin ladonpin, llaqtapaq t’aqasqa jallp’aq iskaynin ladonpin umallipaq jallp’a kanqa. Chay jallp’aqa Diosman qosqa jallp’aq ladonpin, llaqtapaq qosqa jallp’aq ladonpin kanqa. Jujninmi kanqa inti jaykuy ladopi juj kaqtaq inti lloqsimuy ladopi. Inti lloqsimuy lado linderomanpas,* inti jaykuy lado linderomanpas kaqllan kanqa, ayllukunaq jallp’an sayayllan kanqa.+
8 Chay jallp’aqa Israelpa jallp’anmi kanqa. Umallikunaqa manañan llaqtay runakunataqa pisichanqakuñachu,+ puchuq jallp’ataqa jayk’a aylluchus kasqankuman jinan qonqaku.+
9 ”Tukuy munayniyoq Señor Jehová Diosmi nin: ¡Israelpi umallikuna, qankunaqa nishu mana chaninmi kashankichis!
”Saqepuychis mana allin ruwayta, amaña jujkunata sufrichiychischu, allin kaqta chanin kaqta ruwaychis.+ Amaña llaqtaypa kaqninkunata qechuychischu,+ nispan nin tukuy munayniyoq Señor Jehová Dios.
10 Chanin balanzawan, chanin efá tupunawan,* chanin bato medidawan* tupuychis.+
11 Efá tupunapas bato medidapas kaqllan kanqa. Bato medidaqa homer tupunaq* chunka kaq partenmi kanqa, efá tupunapas homer tupunaq chunka kaq partenmi kanqa. Homer tupunaman jinan imapas medikunqa.
12 Juj siclo*+ peson kanqa iskay chunka guerá* peso. Soqta chunka siclo pesotaq kanqa juj mina* peso.
13 ”Ofrenda qonaykichisqa khaynan kanqa: Sapanka homer trigomantan juj efá tupunaq soqta kaq partenta qonkichis. Sapanka homer cebadamantapas juj efá tupunaq soqta kaq partentan qonkichis.
14 Aceiteqa batoman jinan medikunqa. Juj batoqa coro medidaq* chunka kaq partenmi, chunka bato medidataq juj homer tupuna. Chunka bato medidaqa kaqllan juj homer tupunawanqa.
15 Israelpi iskay pachaj ovejamantan jujta ofrendapaq jaywankichis. Chaykunan kanqa jak’u ofrendapaq,+ ruphachina ofrendapaq,+ sumaq kausay sacrificiopaqwan,+ chaykunawanmi llaqtaq juchan pichasqa kanqa,+ ninmi tukuy munayniyoq Señor Jehová Dios.
16 ”Llaqtapi llapa runakunan chayta apamunqaku+ Israelpi umalliman.
17 Chay umallin encargasqa kanqa fiesta p’unchaykunapi, mosoq killa p’unchaykunapi, samana p’unchaykunapi,+ Israelpaq kamachisqa llapa fiesta p’unchaykunapipas+ ruphachina ofrendata,+ jak’u ofrendata,+ vino ofrendatapas jaywananpaq.+ Paymi ruwanqa jucha pampachay ofrendata, jak’u ofrendata, ruphachina ofrendata, sumaq kausay sacrificiotapas, chaywanmi Israel runakunaq juchan pichasqa kanqa.
18 ”Tukuy munayniyoq Señor Jehová Diosmi nillantaq: Ñaupaq kaq killapi, ñaupaq kaq p’unchaypin, wakakuna ukhumanta juj malta torota apamunki, chay toroqa qhalin kanqa, chaywanmi templota juchamanta ch’uyanchanki.+
19 Chay jucha pampachay ofrendaq yawarnintan sacerdote wakinta apanqa, jinaspa templo punkupi postekunaman sut’uchinqa,+ sut’uchillanqataqmi altarpa uranpi tawantin esquinakunamanpas jinallataq ukhu patioman jaykuna punkupi postekunamanpas.
20 Qanchis kaq p’unchaypipas chhaynatan ruwakullanqataq, chaytan ruwakunqa pipas mana yachaspa, otaq mana yuyaypichu juchata ruwaqtin.+ Chhaynatan qankunaqa templota ch’uyanchankichis.+
21 ”Ñaupaq kaq killapi, chunka tawayoq p’unchaypin Pascua Fiestata ruwanki.+ Qanchis p’unchaymi mana levadurayoq t’antata mijunkichis.+
22 Chay p’unchaymi umalli runaqa juj malta torota jaywanqa jucha pampachay ofrendapaq, chaymi kanqa paypa juchanmanta llaqta runaq juchanmantawan.+
23 Chay qanchis p’unchaynintin fiestapin sapa p’unchay Jehová Diosman jaywanqaku ruphachina ofrendata; sapa p’unchaymi jaywanqaku qanchis malta torota, qanchis qhali orqo ovejata,+ jucha pampachay ofrendapaq juj orqo cabratawan.
24 Jaywamuwallanqataqmi jak’u ofrendatapas, sapanka toromantan kanqa juj efá jak’u, sapanka ovejamantan kallanqataq juj efá jak’u, sapanka efá jak’upaqtaq kanqa juj hin* aceite.
25 ”Qanchis kaq killapipas, chunka pisqayoq p’unchaymantapachan qanchis p’unchay fiesta kanqa;+ chay p’unchaykunapas jucha pampachay ofrendata, ruphachina ofrendata, jak’u ofrendata, aceiteta iman jaywamuwanqa, nispa”.
Uraypi willakuykuna
^ Chaypiqa jatun codo nisqamantan rimashan. Qhaway “Astawan yachanapaq B14” nisqata.
^ Linderotaqa “colinda, qorpa” nillankutaqmi.
^ Efá tupunamanqa iskay chunka iskayniyoq litron jaykuq. Qhaway “Astawan yachanapaq B14” nisqata.
^ Juj bato medidamanqa iskay chunka iskayniyoq litron jaykuq. Qhaway “Astawan yachanapaq B14” nisqata.
^ Juj homer tupunamanqa iskay pachaj iskay chunka litron jaykuq. Qhaway “Astawan yachanapaq B14” nisqata.
^ Hebreo rimaypi willasqan minaqa 570 gramostan pesaq. Qhaway “Astawan yachanapaq B14” nisqata.
^ Juj sicloqa 11,4 gramostan pesaq. Qhaway “Astawan yachanapaq B14” nisqata.
^ Juj gueraqa kuskan gramosta jinan pesaq (0,57 g). Qhaway “Astawan yachanapaq B14” nisqata.
^ Juj coro medidamanqa iskay pachaj iskay chunka litron jaykuq. Qhaway “Astawan yachanapaq B14” nisqata.
^ Juj hin medidamanqa tawa litro menosmi jaykuq (3,67 L). Qhaway “Astawan yachanapaq B14” nisqata.
