Ezequiel 46:1-24
46 “Tukuy munayniyoq Señor Jehová Diosmi nin: Ukhu patiopi inti lloqsimuy ladoman kaq punkuqa+ wisq’asqallan kanqa,+ soqtantin llank’ana p’unchaymi wisq’asqalla kanqa;+ samana p’unchaypi mosoq killa p’unchaypi iman ichaqa kichakunqa.
2 Umallin jawa kaq patiomanta sala jina jatun punkunta jaykunqa,+ jinaspa postekunaq kasqanpi qhepakunqa. Chaypin sacerdotekuna paypa ruphachina ofrendanta sumaq kausay sacrificiontapas jaywanqaku, paytaq punkupi k’umuykunqa jinaspa lloqsimpunqa. Ch’isiyanankaman punkuqa mana wisq’akunqachu.
3 Llaqta runakunapas sapa samana p’unchaymi, sapa mosoq killa p’unchaymi+ punkuq ñaupanpi, Jehová Diospa ñaupanpi k’umuykunqaku.
4 ”Sapa samana p’unchaymi umalliqa Jehová Diosman ruphachina ofrendata jaywanqa, chay ofrendaqa soqta borregokuna juj anejo iman kanqa, qhalikaman chay uywakunaqa kanqa.+
5 Anejomantan kanqa juj efá* jak’u ofrenda, sapanka borregomantataq imachus atisqanta qonqa, sapanka efá jak’upaqtaq kanqa juj hin* aceite.+
6 Mosoq killa p’unchaypaq ofrendaqa juj toro, soqta borregokuna, juj anejomanta iman kanqa, chay uywakunaqa qhalikaman kanqa.+
7 Toromantan kanqa juj efá jak’u ofrenda, anejomantapas juj efá jak’u ofrendan kallanqataq, borregokunamantataq imachus atisqanta qonqa. Sapanka efá jak’u ofrendatan juj hin aceiteyoqta qonqa.
8 ”Umalliqa sala jina jatun punkuntan jaykunqa, chaynintan lloqsimpunqapas.+
9 Fiesta p’unchaykunapi pipas Jehová Diospa ñaupanman jaykunqa chayqa,+ wichay lado punkunta jaykuqqa+ uray lado punkuntan lloqsimpunqa.+ Uray lado punkunta jaykuqtaq wichay lado punkunta lloqsimpunqa. Manan pipas jaykusqan punkuntaqa lloqsimunqachu, aswanpas juj lado punkuntan lloqsimunqa.
10 Paykuna ukhupi umalliqa paykuna jaykuqtinmi jaykunqa, paykuna lloqsimuqtintaq lloqsimunqa.
11 Fiesta p’unchaykunapas jatun p’unchaykunapas sapanka toromantan kanqa juj efá jak’u ofrenda, anejomantapas juj efá jak’u ofrendan kallanqataq, borregokunamantataq imachus atisqanta qonqa. Sapanka efá jak’u ofrendatan juj hin aceiteyoqta qonqa.+
12 ”Umallichus ruphachina ofrendata+ sumaq kausay sacrificiotapas tukuy sonqo qoy ofrendata jina noqa Jehová Diosman apamuwanqa chayqa, inti lloqsimuy lado punkutan chaypaqqa kichakunqa. Payqa samana p’unchay jaywakusqan ruphachina ofrendata+ sumaq kausay sacrificiota jinan qonqa. Lloqsiqtintaq chay punkuqa wisq’asqa kanqa.+
13 ”Sapa p’unchaymi watayoq qhali borregota apamunqa, chaymi kanqa Jehová Diospaq ruphachina ofrenda.+ Sapa tutamantanmi chaytaqa apamunqa.
14 Jak’u ofrendatapas sapa tutamantanmi apamullanqataq, chayqa kanqa efá tupunaq soqta kaq partenmi, chaytaqa apamunqa allin jak’uman* jich’aykunapaq juj litro más* aceitetawanmi. Chhayna ofrendataqa sapa kutillanmi Jehová Diosman jaywanqaku, chay kamachikuyqa wiñaypaqmi kanqa.
15 Corderotapas, jak’u ofrendatapas, aceitetapas sapa tutamantanmi jaywakunqa ruphachina ofrendata jina, chayqa mana p’itiytan* jaywakunqa, nispa.
16 ”Tukuy munayniyoq Señor Jehová Diosmi nin: Umallichus sapanka wawankunaman imatapas herenciata jina qonqa chayqa, wawankunaqmi chayqa kanqa. Herencia chaskisqankumantaqa paykunan dueño kanqaku.
17 Ichaqa, herencianmantachus kamachinman regalota jina qonman chayqa, chay qosqanqa kachariy wata chayamunankaman paypa kanqa,+ chaymantan ichaqa umalliman kutichipunqa. Wawankunaman qosqan herenciallan mana makinmanqa kutinqachu.
18 Umalliqa manan llaqta runakunaq herencia chaskisqantaqa qechunqachu. Wawankunamanqa paypa kaqnintan qonqa, manan llaqtaypi mayqen runatapas herencianmantaqa qarqonqachu, nispa”.
19 Chaymantan chay runaqa pusawarqan sacerdotekunaq mijunan ch’uya cuartokunaman jaykuq punkuman.+ Chayqa juj kaq punkuq qayllanpin kasharqan. Wichay ladopitaqmi kasharqanpas.+ Chay mijuna cuartokunaq qhepanpin, inti jaykuy ladopi juj sitio kasqa.
20 Chaypin payqa niwarqan: “Kaypin sacerdotekunaqa juchaman urmasqamanta ofrendata jucha pampachay ofrendatawan t’impuchinqaku. Kaypin jak’u ofrendatapas chayachinqaku.+ Manan imatapas jawa patiomanqa orqonqakuchu, chhaynapi llaqta runakuna ama ch’uyanchasqa kanankupaq”,+ nispa.
21 Chaymantan payqa jawa patioman pusawarqan, jinaspa tawantin esquinaman chayachiwarqan. Chaypiqa tawantin esquinapin sapaq patiokuna kasqa.
22 Chay patiokunaqa juch’uykunallan kasqa. Largonmi kasqa tawa chunka codo,* anchontaq kinsa chunka codo, tawantinmi kaq sayaylla igual ruwasqalla kasqa.
23 Chay patiokuna ukhupin sapanka ladopi fila rumikuna kasqa, chay rumikunaq uranpin ofrenda t’impuchinakuna kasqa.
24 Chaymantataq payqa niwarqan: “Chaykunapin templopi llank’aqkunaqa llaqta runakunaq sacrificio jaywasqanta t’impuchinku”,+ nispa.
Uraypi willakuykuna
^ Efá tupunamanqa iskay chunka iskayniyoq litron jaykuq. Qhaway “Astawan yachanapaq B14” nisqata.
^ Juj hin medidamanqa tawa litro menosmi jaykuq (3,67 L). Qhaway “Astawan yachanapaq B14” nisqata.
^ Chaypiqa “ñut’u jak’uman” nillanmantaqmi.
^ Hebreo rimaypiqa “hin medidaq kinsa kaq parten” ninmi.
^ P’itiytaqa “t’ipiy” nillankutaqmi.
^ Chaypiqa jatun codo nisqamantan rimashan. Qhaway “Astawan yachanapaq B14” nisqata.
