Ezequiel 7:1-27
7 Jujmantan Jehová Diosqa rimapayamuwarqan, paymi niwarqan:
2 “Runaq churin, noqa tukuy munayniyoq Señor Jehová Diosmi Israel runakunata nini: ¡Tukukuymi chayamunña! Tukukuymi kay jallp’aq tawantin ladonman chayamun.
3 Kunanqa ch’usaqyachisqan kankichis, k’araq phiñakuyniytan kachaykamusaykichis. Imachus ruwasqaykichisman jinan juzgasaykichis, llapa millay ruwaykuna ruwasqaykichismantan cuentata mañasaykichis.
4 Manan khuyapayasaykichischu, manan llakipayasaykichischu,+ imakunachus ruwasqaykichismi qankunaman chayamusunkichis; millay ruwaykuna ruwasqaykichis jawan ñak’arinkichis.+ Chhaynapin qankunaqa yachankichis noqa Jehová Dios kasqayta,+ nispa.
5 ”Tukuy munayniyoq Señor Jehová Diosmi nin: Ñak’ariymi chayamusunkichis, mana jayk’aq ñak’arisqaykichista jinan ñak’arinkichis.+
6 Tukukuyqa kaypiñan kashan. Ñan asuykamushanña. Qan contran jatarinqa.
7 Llaqtapi tiyaq, ñan turnoyki chayamunña. Imachus pasanasuyki p’unchayqa kaypiñan kashan.+ Orqo patakunapin manchakuy kashan, kusikuy kananmantaqa khatatataymi* kashan.
8 ”Pisillamantan phiñakuyniyta qanman jich’aykamusayki,+ k’araq phiñakuyniytan kachaykamusayki.+ Imachus ruwasqaykiman jinan juzgasayki, llapa millay ruwaykuna ruwasqaykimantan cuentata mañasayki.
9 Manan khuyapayasaykichu, manan llakipayasaykichu,+ imakunachus ruwasqaykin qanman chayamusunki; millay ruwaykuna ruwasqayki jawan ñak’arinki. Chhaynapin qankunaqa yachankichis noqa Jehová Dios qankunata castigashasqayta.+
10 ”¡Uyariychis! ¡P’unchayqa ñan chayamushanña, ñan kaypiña kashan!+ Turnoykiqa ñan chayamunña, castiganay varapas makiypiñan kashan, jatunchakuq kaypas nishuñan kashan.
11 Millay ruwayqa jatuntañan wiñashan, mana allin varamanmi tukupun.+ Paykunaqa chinkapunqakun, qhapaq kayninkupas, askha runankunapas, allin qhawarisqa kayninkupas chinkapunqan.
12 Chay p’unchayqa chayamunqan. Rantiqqa ama kusikuchunchu, vendeqpas ama llakikuchunchu. Noqaqa llapankupaqmi sinchi phiñasqa kashani.*+
13 Vendeqqa kausanqaña chaypas manan vendesqanmanqa kutinqachu, rijuriypi rikusqaqa llapa runamanmi chayamunqa. Manan pipas kutimunqachu, manan mayqen mana allin ruwaqpas kausashaqllaqa qhepanqachu.
14 ”Trompetaqa waqanñan,+ maqanakuyman riqkunapas listoñan kashanku, ichaqa manan pipas puririnchu. Llapankupaqmi phiñakuyniyqa nina jinaraq raurarishan.+
15 Jawapiqa espadan kashan,+ ukhupitaq onqoy yarqay ima kashan. Llaqta jawapi kaqkunaqa espadawanmi wañunqaku, llaqta ukhupi kaqkunataq millay onqoywan yarqaymanta ima wañunqaku.+
16 Kausashaqlla ayqeqkunaqa orqokunamanmi rinqaku, wayq’okunapi urpikuna jinan kanqaku, sapankankun imachus ruwasqankumanta mayta waqanqaku.+
17 Makinkupiqa manan kallpa kapunqañachu, moqonkumantapas* unun sut’umunqa.*+
18 Qhasqa telawanmi churakunku,+ manchakuymantan khatatatanku. Llapankun penq’aypi rikukunqaku, umankupas p’aqlallañan kanqa.*+
19 ”Qolqenkutapas callekunamanmi wijch’upunqaku, qorinkutapas millakapunqakun. Paykunataqa manan qorinkupas qolqenkupas Jehová Diospa p’unchayninmantaqa libranqachu.+ Paykunaqa manan sajsanqakuchu, manan wijsankumanpas junt’achinqakuchu, qorinkupas qolqenkupas juchaman apaqlla kasqanrayku, mana allinpi tarichiqlla kasqanrayku.
20 Paykunaqa sumaq k’anchashaq adornonkuwanmi jatunchakurqanku, chay qorinkuwanmi qolqenkuwanmi millakunapaq idolokunata ruwarqanku.+ Chaymi qorinkuta qolqenkuta millachisaq.
21 Qorinkutan qolqenkutan waj llaqtayoq runakunaman, millay runakunaman premiota jina qopusaq, paykunataq chaykunata millakunapaq kaqman tukuchinqaku.
22 ”Paykunamantan karunchakusaq.+ Pakasqa tiyanaytan* qhellichanqaku, chayman jaykuspan suwakuna qhellichanqaku.+
23 ”Cadenakunata alistaychis.+ Kay jallp’aqa juiciopin kashan, yawarwan qhellichasqan kashan;+ kay llaqtapiqa maqanakuymi junt’a kashan.+
24 Paykuna contran waj nacionmanta sinchi millay runakunata kachamusaq,+ paykunan wasinkunata jap’ikapunqaku.+ Kallpasapakunaq jatunchakuynintan chinkachisaq, yupaychananku cheqaskunapas qhellichasqan kanqa.+
25 Sinchi ñak’ariy chayamuqtinmi thaj kayta maskhanqaku, ichaqa manan tarinqakuchu.+
26 Llakikuymi qati-qatiraq chayamunqa, mana allin willakuykunapas mana tukurikuspan chayamunqa. Runakunan profetaq rijuriypi rikusqanta maskhanqaku, ichaqa manan tarinqakuchu.+ Sacerdotekunaq kamachikuyninpas umalliqkunaq* yuyaychayninpas manan kanqañachu.+
27 Reyqa waqaypin tarikunqa,+ umallipas llakikuywanmi p’achawan jina churakunqa. Llaqtapi runakunaq makinpas manchakuymantan khatatatanqa. Ruwasqankuman jinan paykunaman kutichisaq, juzgasqankuman jinan juzgasaq. Chhaynapin yachanqaku noqa Jehová Dios kasqayta,+ nispa”.
Uraypi willakuykuna
^ Khatatataytaqa “kharkatiy” nillankutaqmi.
^ Chaypiqa rantiqkunapas vendeqkunapas yanqapaq kallpachakunankumantan, llapankupas ch’usaqyachisqa kanankumantan rimashan.
^ Chaypiqa manchakuypi jisp’aykukunankumantan rimashan.
^ Moqotaqa “qonqori” nillankutaqmi.
^ Chaypiqa sinchi llakikuypi umankuta k’isukunankumantan rimashan.
^ Yaqachus jina chaypiqa Jehová Diospa templonpi ch’uyay-ch’uya partemanta rimashan.
^ Chaypiqa “kuraq runakunaq” nillanmantaqmi.
