Ezequiel 8:1-18
8 Soqta kaq watapi, soqta kaq killapi, pisqa kaq p’unchaypin noqa wasiypi tiyasharqani, Judamanta umalliqkunataq* ñaupaypi tiyasharqanku. Chayllamanmi tukuy munayniyoq Señor Jehová Diospa atiynin* noqaman jamuwarqan.
2 Qhawashaspan rikurqani runaq rijch’ayninta jina, chay rijch’ayqa nina rauray jinan kasqa. Cinturanmanta uraymanmi nina raurayman jina rijch’akusqa,+ cinturanmanta wichaymantaq qorintin qolqentin jina k’anchay k’anchamushasqa.+
3 Jinan payqa chujchaymanta makiwan jina jap’iwarqan, jinaspan juj espíritu* altonta Jerusalenkama apawarqan Diospa rikuchiwasqan rijuriypi, wichay ladoman qhawaq ukhu kaq patioman apaq punkumanmi apawarqan,+ chaypin Diosta phiñachiq ídolo kashasqa.+
4 Chaymantapas Israelpa Diosninpa jatun k’anchayninmi chaypi kashasqa;+ chayqa pampa ladopi rikusqay rijuriy jinan kasqa.+
5 Jinan payqa niwarqan: “Runaq churin, ama jinachu kay, wichay ladota qhawariy”, nispa. Jinan noqaqa wichay ladota qhawarirqani, chaypin altarman apaq punkuq wichay ladonpi, punku qayllapi Diosta phiñachiq ídolo kashasqa.
6 Paymi niwallarqantaq: “Runaq churin, ¿rikushankichu Israel runakunaq llapa millay ruwasqankuta, cheqninapaq ruwasqankutapas?+ Chay ruwasqankun ch’uya wasiymanta karunchawan.+ Ichaqa manan chayllachu, aswan millakunapaq ruwaykunataraqmi rikunki”, nispa.
7 Chaymantataq patio jaykunaman apawarqan, qhawarispaymi perqapi juj t’oqota rikurqani.
8 Jinan payqa niwarqan: “Runaq churin, ama jinachu kay, perqata t’oqoy”, nispa. Jinan noqaqa perqata t’oqorqani, chayllamanmi juj jaykunata rikurqani.
9 Paytaq niwarqan: “Jaykuspa qhawamuy mana allinkuna, millakunapaq kaqkuna ruwasqankuta”, nispa.
10 Jinan noqaqa jaykurqani, chaypin perqapi dibujasqa kashasqa imaymana clase suchuq animalkuna,+ millakuy animalkuna, Israel runakunaq millakuna idolonkuna ima.+ Chaykunaqa perqata k’iñaspa dibujasqan kasqa.
11 Chaykunaq ñaupanpin Israelpi qanchis chunka umalliqkuna kashasqa, paykunamanta jujninmi kasqa Safanpa+ churin Jazanías. Sapankankun incienso ruphachinata makinkupi jap’ishasqaku, sumaq q’apaq q’osñipas wichaymanmi seqashasqa.+
12 Jinan niwarqan: “Runaq churin, ¿rikushankichu Israelpi umalliqkuna tutayaqpi imachus ruwasqankuta? ¿Rikushankichu ukhu cuartokunapi idolonkunaq kasqanpi imachus ruwasqankuta? Paykunan nishanku: Jehová Diosqa manan rikumuwanchischu. Jehová Diosqa wijch’upunmi suyunchistapas,+ nispa”.
13 Niwallarqantaqmi: “Kaykunamanta aswan millakunapaq ruwaykunataraqmi rikunki”, nispa.
14 Chaymantan apawarqan Jehová Diospa wasinpa wichay lado punkunman, chaypin tiyashasqa warmikuna, paykunan Tamuz idolomanta waqashasqaku.
15 Niwallarqantaqmi: “Runaq churin, ¿rikushankichu kayta? Kaykunamanta aswan millakunapaq ruwaykunataraqmi rikunki”, nispa.+
16 Chaymantan apawallarqantaq Jehová Diospa wasinpa ukhu pationman.+ Chaypin Jehová Diospa templonman jaykuna punkuwan altarwan tupaypi iskay chunka pisqayoq runakuna kashasqaku. Paykunan Jehová Diospa templonta qhepanchaspa inti lloqsimuy ladoman qhawarisqa kashasqaku, chaypin intiman k’umuykushasqaku.+
17 Jinan payqa niwarqan: “Runaq churin, ¿rikushankichu kayta? ¿Manachu imapas qokun Judá runakunaman kay millay ruwaykunata ruwanankupaq? ¿Jayk’aqkaman sinchi mana allin ruwaykunawan kay jallp’ata junt’achinqaku? ¿Jayk’aqkaman noqata phiñachiwanqaku?+ Qhawariy, paykunaqa k’allmawanmi* senqayta pasachishanku.
18 Chayraykun sinchi phiñakuywan paykuna contra jatarisaq. Manan khuyapayasaqchu, manan llakipayasaqchu.+ Ninriypiña qapariykuwanqaku chaypas manan paykunataqa uyarisaqchu”,+ nispa.
Uraypi willakuykuna
^ Chaypiqa “kuraq runakunataq” nillanmantaqmi.
^ Hebreo rimaypiqa “makin” ninmi.
^ Hebreo rimaypiqa Diospa espiritunmantan otaq juj angelmantan rimashanman.
^ Yaqachus jina chay k’allmaqa idolokunata yupaychanapaq karqan.
