Filipenses 2:1-30
2 Qankunaqa Cristowan jujllachasqataq kashankichis, kallpachanakushankichistaq, munakuywantaq sonqochanakushankichis, sumaqtataq qhawarinakushankichis, tukuy sonqowantaq munanakushankichis, khuyapayanakushankichistaq kanpas chayqa,
2 anchatayá kusichiwaychis juj yuyaylla kaspaykichis, jujkuna-jujkunawan munanakuspaykichis, tukuy imapi juj sonqolla kaspaykichis, kaqllata piensaspaykichis ima.+
3 Ama imatapas ruwaychischu cheqnipakuspaqa,+ imapas kawaqchis jinaraq piensakuspapas;+ aswanpas k’umuykukuywan jujkunata qankunamanta aswan allinpaq qhawariychis.+
4 Amataq munaynillaykichistaqa maskhaychischu,+ aswanpas jujkunaq munaynintawan maskhaychis.+
5 Imaynachus Cristo Jesuspa yuyaynin karqan, chhaynallataq qankunaq yuyayniykichispas kachun,+
6 payqa Dios jinaña karqan chaypas,+ manan jayk’aqpas piensallarqanpaschu Diosman igualakuytaqa;+
7 aswanmi payqa imaynachus kasqanta saqemuspa juj kamachi jina karqan.+ Runamanmi payqa tukurqan.+
8 Manan chayllachu, runaman tukuspaqa k’umuykukuqmi karqan, wañunankamataqmi kasukuq karqan;+ arí, ñak’arina k’aspipi* wañupunankaman chhayna karqan.+
9 Chayraykun Diosqa aswan allin puestota qorqan,+ sumaq sonqo kayninpitaq lliu sutimantapas aswan allin sutita qorqan,+
10 chhaynapi janaq pachapi llapa kaqkuna, kay pachapi llapa kaqkuna, jallp’a ukhupi llapa kaqkunapas Jesusman* qonqorikunankupaq,+
11 payqa Tayta Dios jatunchasqa kananpaq Señor kasqanta lliu runa rimarinanpaqwan.+
12 Munakusqay wayqe-panaykuna, qankunawan kashaqtiyqa kasukuqmi karqankichis, qankunawan mana kashaqtiypas aswan kasukuqraqmi kashankichis, chhaynallatapuni manchakuywan khatatataywan* ima sapankaykichis llank’ashaychis salvasqa kayman chayanaykichispaq.
13 Diosmi qankunataqa munayninman jina kallpachashasunkichis, paymi tanqasunkichis ima ruwayta munanaykichispaqpas, payllataqmi atiytapas qosunkichis chayta ruwanaykichispaq.
14 Ama rimapakuspa,+ ama discutispa+ tukuy imatapas ruwaychis,
15 chhaynapi mana juchachana mana ima juchayoq kanaykichispaq, kay tiempopi q’ewisqa millay runakuna ukhupipas+ Diospa wawankuna jinapuni+ mana ima qhelliyoq kanaykichispaqwan; qankunaqa kay pachapi chay runakunapaqmi k’anchay jina k’anchashankichis.+
16 Chaymantapas Diospa kausay qoq siminman allinta jap’ipakuychis,+ chhaynapi mana yanqapaqchu phawasqayta, mana yanqapaqchu chhaynaniraqta llank’asqaytapas yachaspa Cristoq p’unchayninpi anchata kusikunaypaq.
17 Iñiyniykichispa apasqasuykichis sacrificio jaywasqaykichisman,+ Diospaq servicio ruwasqaykichisman iman noqaqa vino ofrenda jina jich’asqa kashani;+ chhaynaña kashani chaypas maytan qankunawanqa kusikuni.
18 Chhaynallatataqmi qankunapas kusikunaykichis, noqawan kuskataqmi kusikunaykichispas.
19 Señor Jesús munaqtinqa apurayllan Timoteota kachamusaykichis,+ chhaynapi qankunamanta willawaqtin kallpachasqa kanaypaq.
20 Qankunaman kachamunaypaq kaqkunamantaqa manan pipas pay jinaqa kanchu, payqa tukuy sonqowanmi qankunata qhawarisunkichis.
21 Jujkunan ichaqa allinnillankuta maskhashanku, manataq Jesucristoq allinnintachu.
22 Yachasqaykichis jina, payqa allintan rikuchishan imayna llank’aqchus kasqanta, imaynan juj wawaqa+ taytanwan llank’an chhaynatan payqa juj kamachi jina noqawan kuska llank’ashan allin willakuykuna mast’arikunanpaq.
23 Chayraykun paytapuni kachamuyta munashani imachus noqamanta kanqa chayta yacharuspay jina.
24 Señor munaqtinqa noqapas “usqhaylla jamusaq”+ nishanin.
25 Kunanqa Epafroditotan kachamushasaykichis, payqa wayqeymi, llank’aqmasiymi, soldadomasiy iman, paytan qankunaqa kachamusqankichis noqata yanapawananpaq.+
26 Payqa maytapunin qankunawan tupayta munashan, ichaqa sinchi llakisqan kashan onqosqanta yachasqaykichismanta.
27 Arí, payqa sinchitapunin onqoykun, yaqallan wañupunpas; ichaqa Diosmi khuyapayarqan, noqatapas khuyapayawallarqantaqmi, chhaynapi ama llakipas llakipata kanaypaq.
28 Chayraykun noqaqa apuraylla payta kachamushaykichis, chhaynapi payta rikuspa wajmanta kusikunaykichispaq, noqapas amaña sinchi llakisqa kanaypaq.
29 Chhaynaqa, kusikuywanyá payta chaskinkichis, imaynan Señorpa discipulonkunata chaskinkichis jinatapuni, pay jina iñiqmasikunataqa sumaqtapuni qhawarinkichis.+
30 Payqa yaqallan wañuyta tarin Cristoq* kamachinta ruwaspa, arí, wañuytapas mana manchakuspan qankunaq rantiykichispi kaypi yanapawan.+
Uraypi willakuykuna
^ Qhaway Explicasqa simikuna nisqapi “Ñak’arina k’aspi” nisqata.
^ Griego rimaypiqa “Jesuspa sutinman” ninmi.
^ Khatatataytaqa “kharkatiy” nillankutaqmi.
^ Chaypiqa yaqapaschá “Señorpa” nillanmantaq.
