Filipenses 4:1-23
4 Chhaynaqa, munakusqay wayqellaykuna,* ñaupaqpi nimusqayman jina, Señorwan jujllachasqallapuni qaqata sayashaychis.+ Noqaqa munakuykichismi, maytan qankunawan tupaytapas munashani, qankunaqa anchatan kusichiwankichis, premioytaqmi* kankichispas.+
2 Evodiata Sintiquetawanmi kallpachani Señorta juj yuyaylla servinankupaq.+
3 Qantapas, cheqaq llank’aqmasíy, valekuykin chay pananchiskunata* yanapashanallaykipaq, paykunaqa Clementewan wakin llank’aqmasiykunawan iman tukuy atisqankuta noqawan kuska llank’arqanku allin willakuykuna willaypi; paykunaq sutinkuqa kausay libropin qelqasqa kashan.+
4 Señorninchisrayku kusikullaychispuni. Wajmantan nillaykichistaq: ¡Kusikuychis!,+ nispa.
5 Lliu runakuna yachachunku allin yuyaywanpuni imatapas ruwaq kasqaykichista.*+ Señorqa qayllaykichispin kashan.
6 Ama imamantapas llakipakuychischu,+ aswanpas imapiña tarikuspapas mañakuspa, rogakuspa, graciasta qospa ima Diosman willakuychis imachus necesitasqaykichista.+
7 Jinan Diosqa runaq mana entiendey atisqan thaj kayta+ qosunkichis, chhaynapin sonqoykichista+ yuyayniykichista ima Cristo Jesuswan waqaychanqa.
8 Chhaynaqa, wayqeykuna,* piensashallaychis tukuy cheqaq kaqpi, tukuy respetanapaq kaqpi, tukuy chanin kaqpi, tukuy ch’uya kaqpi, tukuy munakuyman apaq kaqpi, tukuy allin qhawarisqa kayman apaq kaqpi, tukuy allin kaqkunapi, lliu imapas jatunchanapaq jina kaqkunapi ima.+
9 Imakunatachus noqamanta yacharqankichis, chaskikurqankichis, uyarirqankichis, rikurqankichispas, chaykunata ruwashallaychis;+ chhaynapin thaj kayta qoq Diosqa qankunawan kashanqa.
10 Señorninchisraykun anchatapuni kusikuni wajmanta noqapi piensasqaykichismanta.+ Ñaupaqqa piensaqpunichá kankichis noqapi, ichaqa manapaschá atisharqankichischu imaynata chayta rikuchiyta.
11 Kaytaqa manan imapas faltawasqanraykuchu nimushaykichis, ñan yachasqaña kani imaynapiña tarikuspapas imaychus kan chayllawan contentakuyta.+
12 Yachanin wajcha jina kausayta,+ yachallanitaqmi qhapaq jina kausaytapas. Arí, imaymana kausaymanmi noqaqa yachasqaña kani, yachanin sajsa kayta yarqasqa kaytapas, yachanin imaymanayoq kayta mana imayoq kaytapas, chhayna kausaymanqa manan llapa runachu yachasqa kanku.
13 Tukuy imapaqmi kallpay kan, tukuy imapaqmi kallpa qowaqniyqa kallpata qowan.+
14 Chaywanpas, qankunaqa allintan ruwarqankichis sasachakuyniypi yanapawaspaykichisqa.
15 Yachasqaykichis jina, chayllaraq allin willakuykunamanta yachashaqtiykichis Macedoniamanta ripushaqtiyqa manan mayqen iñiq t’aqapas yanapawarqanchu, ni noqaq yanapayniytapas chaskikuwarqankuchu, aswanpas qankuna Filipos llaqtamanta kaqkunallan.+
16 Tesalónica llaqtapi kashaqtiypas qankunan imachus necesitasqaytaqa apachimuwarqankichis, iskay kutitaraqmi apachimuwarqankichispas.
17 Chaytaqa nishaykichis manan ima regalotapas qowanaykichista munaspachu, aswanmi noqaqa munani allinkuna ruwasqaykichiswan qhapaq kayniykichis askhayananta.
18 Junt’asqan lliu imaypas kashan, necesitasqaymantapas masraqmi kashan. Epafroditoman+ apachimuwasqaykichiswanmi tukuy imaypas junt’asqa kashan, chay apachimuwasqaykichisqa sumaq q’apaq, Diospa sonqonman chayaq sacrificio jinan.+
19 Chayraykun tukuy imaymana kaqniyoq Diosniyqa tukuy ima necesitasqaykichista Cristo Jesuswan qosunkichis.+
20 Taytanchis Diosqa wiñay-wiñaypaq jatunchasqa kachun. Amén.*
21 Napaykapuwaychis Cristo Jesusta qatikuq lliu iñiqmasikunata.* Noqawan kashaq iñiqmasikunapas apachimushasunkichismi napaykuyninkuta.
22 Llapa iñiqmasikunan napaykuyta apachimushasunkichis, astawanqa Roma reypa* wasinpi kaqkunan.+
23 Señor Jesucristoq ancha sumaq sonqo kaynin imayna yuyayniyoqchus kasqaykichiswan kachun.
Uraypi willakuykuna
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Griego rimaypiqa “coronaytaqmi” ninmi.
^ Griego rimaypiqa “chay warmikunata” ninmi.
^ Chaypiqa “mana tercochu kasqaykichista” nillanmantaqmi.
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Chaypiqa “Chhayna kachun” nillanmantaqmi.
^ Griego rimaypiqa “ch’uya kaqkunata” ninmi.
