Hebreos 11:1-40
11 Iñiyqa imatachus suyashanchis chayta cheqaqpaqpuni jap’iymi,+ iñiymi sut’ita rikuchisunki mana rikuna kaqkunapas cheqaqpuni kasqanta.
2 Chhayna iñiyniyoq runakunatan* Diosqa ñaupa tiempopi sumaqta qhawarirqan.
3 Chay iñiymi rikuchiwanchis tukuy imapas Diospa nisqanman jina kamasqa kasqanta,* rikusqanchis kaqkunapas mana rikusqanchis kaqkunamanta paqarimusqanta.
4 Iñisqanraykun Abelqa Cainmanta aswan allin sacrificiota Diosman jaywarqan,+ chhayna iñiq kasqanraykutaqmi Diospas rikuchirqan chaninpaq qhawarisqanta, chaytan ruwarqan ofrendakuna jaywasqanta sumaqta chaskispa;+ chaymi payqa wañupunña chaypas, iñisqanwan rimashanraq.+
5 Iñisqanraykun Enocpas+ apasqa karqan mana ñak’arispa wañunanpaq; Diosmi paytaqa apapurqan,+ manataqmi maypipas tarisqachu karqan. Manaraq apasqa kashaqtinmi ichaqa Diosqa willarqan sonqonpaq jina kasqanta.
6 Manachus iñisunman chayqa manapunin Diospa sonqonpaq jinachu kasunman; pipas Diosman qayllaykuqqa creenanmi Diosqa cheqaqpuni kasqanta, payta tukuy sonqowan maskhaqninkunamanpas premiota qoq kasqantawan.+
7 Iñisqanraykun Noepas+ manaraq rikusqankunamanta+ Dios willaqtin payta manchakuspa juj arcata* ruwarqan+ familianpiwan salvasqa kananpaq. Chhayna iñiq kasqanwanmi payqa rikuchirqan kay pachaqa chinkachinapaq jinapuni kasqanta,+ chhayna iñiq kasqanraykutaqmi chanin runapaqpas jap’isqa karqan.
8 Iñisqanraykun Abrahanpas+ Diospa wajasqanta kasukuspa llaqtanmanta ripurqan maypichus herenciata chaskinan karqan chay ladoman. Payqa manaña yacharqanchu maymanchus rinan karqan chayta chaypas rillarqanmi.+
9 Iñisqanraykun prometesqa jallp’apipas forastero jina tiyarqan;+ karpakunapitaqmi tiyarqanpas+ paypa chaskisqan promesallatataq chaskiq Isaacwan Jacobwan ima.+
10 Payqa cheqaq cimentacionniyoq llaqtatan suyasharqan, Diosmi chay llaqtataqa ruwarqanpas perqarqanpas.+
11 Iñisqanraykun Sarapas atiyta chaskirqan payaña karqan chaypas onqoq rijurinanpaq,+ payqa allintan yacharqan prometeqqa rimasqanta junt’aqpuni kasqanta.
12 Chhaynapin juj runallamanta askha runakuna paqarimurqan.+ Chay runa wañusqa jinaña kasharqan chaypas,+ wawankunaqa cielopi ch’askakuna jinaraqmi karqan, lamar-qocha patapi mana yupay atina aqo jinaraqtaqmi karqanpas.+
13 Chay runakunaqa manaña promesakunaq junt’akusqanta rikurqankuchu chaypas,+ llapankun wañupunankukama iñirqanku. Qhepa tiempomanña chaykunaqa junt’akunan karqan chaypas, rikushankumanpas jinan paykunapaqqa karqan,+ chaywanmi paykunaqa kusisqa karqanku. Chaymantapas lliumanmi paykunaqa willakurqanku maypichus tiyasqanku llaqtapiqa forasterolla, purikuq runakunalla kasqankuta.
14 Chhaynata rimaqqa chay rimasqanwanmi sut’ita rikuchishan may llaqtapichus tiyanqa chayta maskhashasqanta.
15 Ichaqa maymantachus lloqsimurqanku chaypi piensashallankuman karqan chayqa,+ ratullachá ima tumpallapas chayman kutiripunkuman karqan.
16 Chay runakunaqa juj allin llaqtatan maskharqanku, chay llaqtaqa janaq pachamanta kaqmi. Diosmi chay llaqtataqa paykunapaq preparapurqan,+ chaymi payqa mana p’enqakunchu “Diosníy” ninankuta.+
17 Iñisqanraykun Abrahanqa probasqa kashaspa+ sacrificiopipas jaywashanman karqan jinata wawan Isaacwan ruwarqan, arí, promesakunata kusisqa chaskiqqa liston kasharqan sapallan wawanta sacrificiopi jaywananpaq,+
18 Diosña nirqan: “Mirayniykiqa Isaacmantan jamunqa”,+ nispa chaypas.
19 Payqa yacharqanmi Diosqa wawanta kausarichinanpaq atiyniyoq kasqanta, chaychá wañusqanmantapas kausarimpushanman karqan jinata wawantaqa chaskikapurqan;+ chay pasasqanmi rikuchirqan qhepaman imachus pasanan karqan chayta.
20 Iñisqanraykun Isaacpas Jacobman+ Esauman+ ima bendicionta churarqan imakunachus qhepaman kanan karqan chayta willaspa.
21 Iñisqanraykun Jacobpas wañunan patapiña kashaspa+ Josepa wawankunaman bendicionta churarqan,+ taunanwan taunaykuspataq Diosta adorarqan.+
22 Iñisqanraykun Josepas wañunan patapiña kashaspa Israel runakunaman willarqan Egipto llaqtamanta lloqsipunankuta, kamachirqantaq tullunkunata apapunankupaqpas.+
23 Iñisqankuraykun Moisespa tayta-mamanpas kinsa killata payta pakarqanku,+ chaymantapas chay wawaqa munaychan karqan,+ chaymi mana manchakurqankuchu reypa kamachisqantapas.+
24 Iñisqanraykun Moisespas jatunña kaspa+ mana munarqanchu “faraonpa* ususinpa wawan” nisqa kayta.+
25 Aswanmi payqa juchapi purispa juj ratu kusirikunanmantaqa Diospa llaqtan runakunawan kuska ñak’arichisqa kayta ajllakurqan.
26 Diospa ajllasqan kaspa pisichasqa kaytan payqa Egiptopi qhapaq kaykunamanta aswan allinpaq qhawarirqan, chaymantapas payqa premiota chaskiypin tukuy yuyayninta churarqan.
27 Iñisqanraykun payqa mana manchakurqanchu reypa phiñakusqantapas,+ chayraykutaqmi Egiptomantapas lloqsimpurqan,+ chaymantapas mana rikuna Diosta rikushanmanpas karqan jinan+ payqa tukuy imatapas pacienciawan aguantarqan.
28 Iñisqanraykutaqmi payqa Pascua Fiestamanta kamachikuykunatapas junt’arqan, wasi punkuq k’aspinkunatapas yawarwan ch’allarqan, chhaynapi Diospa angelnin paykunaq phiwi* wawankuta mana wañuchinanpaq.+
29 Iñisqankuraykun Israel runakunapas Puka lamar-qochanta pasamurqanku ch’aki jallp’antapas purishankuman karqan jinata,+ Egipto runakunan ichaqa chayninta chimpayta munaspanku llapanku unuq millp’usqan kapurqanku.+
30 Iñisqankuraykun runakunaqa Jericó llaqtaq perqankunata qanchis p’unchayta muyuykurqanku, jinan chay perqakunaqa thunikapurqan.+
31 Iñisqanraykun ramera warmi Rahabpas qhamiyaq* runakunata sumaqta chaskirqan,+ chaymi mana chay llaqtamasin mana kasukuq runakunawan kuskachu wañurqan.
32 Maychá kanman jujkunamantawan rimayman chayqa. Manachá tiempopas aypanmanchu Gedeonmanta,+ Baracmanta,+ Sansonmanta,+ Jeftemanta,+ Davidmanta,+ Samuelmanta,+ wakin profetakunamantawan rimayman chayqa.
33 Iñisqankuraykun chay runakunaqa reykunata atiparqanku,+ imachus chanin kaqta ruwarqanku, promesakunata chaskikurqanku,+ leonkunaq siminta wisq’arqanku,+
34 manchay nina raurayta wañuchirqanku,+ espadawan wañuchinamanta ayqekurqanku,+ pisi kallpa kashaspa kallpasapaman tukurqanku,+ guerrapi allin maqanakuqman tukurqanku,+ ejercitokunatapas phawachirqanku.+
35 Karqanmi wañuqninkuta kausarichisqata chaskiq warmikunapas;+ wakin runakunataq sinchi ñak’arichisqa karqanku, paykunaqa manan munarqankuchu iñiyninkuta negaspa libre kaytaqa, chaymi ñak’arirqanku, chhaynapi aswan allin kausarimpuyta chaskinankupaq.
36 Wakintaq pruebaman churasqa karqanku asipayasqa soq’aykusqa kaspa; paykunaqa watasqa,+ carcelman wisq’asqa imaraqmi karqanku.+
37 Wakintaq rumiwan ch’aqesqa,+ pruebaman churasqa, serruchowan iskayman kuchusqa, espadawan wañuchisqa+ ima karqanku. Wakintaq oveja qarawan, cabra qarawan p’achaykuspa+ kayman jaqayman purirqanku, chaymantapas paykunaqa mana imayoqmi rikukurqanku, sinchi llakikuykunapin tarikurqanku,+ ñak’arichisqataqmi karqankupas;+
38 kay pachaqa manan chay runakunapaq jinachu karqan. Chaymantapas chay runakunaqa ch’aki ch’inneqkunapi, orqon q’asanta iman purirqanku t’oqokunapi+ mach’aykunapi* iman tiyarqanku.
39 Iñisqankuraykun chay runakunamanqa Dios willarqan sonqonpaq jina kasqankuta, chaywanpas manan paykunaqa rikurqankuchu promesaq junt’akusqantaqa.
40 Chayqa karqan aswan allin kaqta noqanchispaq Dios preparapuwasqanchisraykun,+ chhaynapi chay runakuna mana noqanchismanta t’aqasqachu ch’uya runaman tukuchisqa kanankupaq.
Uraypi willakuykuna
^ Chaypiqa “ñaupa taytanchiskunatan” nillanmantaqmi
^ Griego rimaypiqa “ordenpi churasqa kasqanta” ninmi.
^ Chay arcaqa jatunkaray caja jinan karqan.
^ Egipto reykunatan “faraón” nispa niqku.
^ Qhamiyaytaqa “katiyay, qhawaray” nillankutaqmi.
^ Mach’aytaqa “qaqa t’oqo” nillankutaqmi.
