Hebreos 12:1-29
12 Chhayna askha testigokunataq phuyu jinaraq muyuykushawanchis chayqa, noqanchispas imachus llasawaqninchista wijch’uspa, facil-llata mayt’uwaqninchis juchatawan wijch’uspa,+ ama pisipaspa phawashallasun kay phawananchis kaq carrerata.+
2 Chayta ruwashananchiskamaqa tukuy yuyaywan qhawashallasun Jesusta, paymi iñiypi pusawaqninchis jatun umalliqa, iñiyninchista junt’apaqpas.+ Payqa qhepaman kusikunanta yachaspan ñak’arina k’aspita* aguantarqan, manataqmi p’enqakurqanchu chhayna p’enqay wañuytapas, chaymi kunanqa Diospa tiyanan tronoq paña ladonpi tiyashan.+
3 Arí, tukuy yuyaywan qhawashallaychis juchasapa runakunaq imaymana k’amisqan aguantaqta,+ chhaynapi mana sayk’unaykichispaq mana pisipanaykichispaqwan.+ Chay juchasapa runakunaqa paykunaq mana allinnillankupaqtaqmi chaytaqa ruwarqanku.
4 Juchawan maqanakuspaykichisqa manaraqmá qankunaqa wañunaykichiskamaraqchu maqanakunkichis.
5 Chaymantapas qankunaqa qonqapusqankichismá wawankunata jina Diospa nisqasuykichistaqa; ¿manachu simin qelqapi nishan: “Churilláy, ama Jehová* Diospa wanachisqantaqa* mana valeqpaq jinaqa jap’iychu, amallataq anyasuqtiykipas pisipaychu;
6 Jehová* Diosqa munakusqan runakunatan wanachin, pikunatachus wawankunata jina chaskin chaykunatan jasut’in”,+ nispa?
7 Imapiña ñak’arinkichis chaypas allintan aguantanaykichis, wanachisqapas kashawaqchis jinatan chaykunataqa qhawarinaykichis. Diosqa wawankunata jinan qankunataqa rikusunkichis.+ Lliu wawakunapas taytankuq wanachisqanmi kanku ¿riki?+
8 Chayrayku, manachus Diospa wanachisqan karqankichis chayqa, manachá paypa wawankunapunichu kawaqchis.
9 Taytanchiskunaqa wanachiwaqmi kanchis ¿riki? Noqanchistaq paykunataqa respetaq kanchis. Chhaynaqa, ¿manachu astawanraq kasukunanchis santo espiritunwan vidanchista pusaq janaq pacha Taytanchistaqa, chhaynapi kausashanallanchispaq?+
10 Taytanchiskunaqa juj tiempollan wanachiwaq kanchis, imachus paykunapaq allin karqan chayman jinallataqmi chayqa kaqpas. Janaq pacha Taytanchismi ichaqa allinninchispaqpuni wanachiwanchis, chhaynapi pay jina ch’uya kananchispaq.+
11 Ichaqa ima wanachiypas kaq ratuqa manan kusichikunchu, aswanpas nanachikunmi; chaymantan ichaqa wanachisqa kaqkunaqa thaj kausayta, chanin kausayta ima chaskinku.
12 Chayrayku, liwi-liwi makikunata pisipaq moqokunatawan* kallpachaychis;+
13 purinaykichis ñantapas rectoyachiychis,+ chhaynapi wist’u moqoqa ama phawarunanpaq, aswanpas qhaliyananpaq.
14 Lliu runawan thajpi kanaykichispaq kallpachakuychis;+ maskhaychis ch’uyanchasqa kaytapas,+ mana chayqa manan Señorta rikunkichischu.
15 Allinta qhawarikuychis llapankuchus Diospa ancha sumaq sonqo kayninta chaskishanku icha manachus chayta, chhaynapi ama qankuna ukhupi ima venenoyoq saphipas rijurinanpaq, mana chayqa sasachaykunatan jatarichinman, askhatataq qhellichanmanpas.+
16 Chaymantapas, paqtataq qankuna ukhupi kashanman qhelli juchapi* puriqkuna, Esaú jina Diospa kaqninkunata pisichaqkunapas, payqa phiwi kayninmanta tupaqnintan cambiapurqan juj plato mijunawan.+
17 Yachasqaykichis jina, chay qhepaman bendicionta chaskiytaña munarqan chaypas, manan qosqachu karqan, waqaykurqanña taytanpa imachus nisqanta cambiachiyta munaspa chaypas,+ yanqapaqñan karqan.
18 Qankunaqa manan ninaq raurarisqan,+ yana phuyuq llanthuykusqan, ni sinchi wayraq t’ojasqan laqhayaq* orqomanchu+ qayllaykushankichis;+
19 chay orqopin trompeta qaparirqan,+ juj kunkapas uyarikurqan,+ chayta uyarispan runakunaqa rogakurqanku amaña chay kunka imatapas rimamunanpaq.+
20 Paykunaqa sinchitapunin mancharikurqanku: “Juj animal-llapas kay orqota saruykamunqa chayqa, rumiwan ch’aqesqan wañunqa”,+ nisqa kamachikuyta uyarispanku.
21 Chay rikusqankuqa sinchi manchakuypunin karqan, chaymi Moisespas nirqan: “Sinchi manchasqan kashani, cuerpoypas khatatatashanraqmi”,*+ nispa.
22 Qankunaqa qayllaykushankichis Sion orqoman,+ kausaq Diospa llaqtanman, arí, janaq pacha Jerusalenman,+ chunkay-chunkay waranqa angelkunaq
23 juñunakusqanman,+ janaq pachapi qelqasqa kaq phiwikuna t’aqaman, lliupa jueznin Diosman,+ ch’uyanchasqa chanin runakunaq,+ arí, santo espirituwan pusachikuq runakunaq kausayninman,+
24 mosoq rimanakuypi+ allipunachiq Jesusman,+ ch’aqchusqan yawarman iman, chay yawarqa Abelpa yawarninmantapas aswan allintan riman.+
25 Chaytaq mana uyariwaqchischu janaq pachamanta rimamuqpa kunkanta; ñaupa tiempopipas kay pacha runakunaqa manan uyarikurqankuchu Diospa willachisqanta, chaymi paykunaqa castigasqa karqanku. Chhaynataq karqan chayqa, astawanraqchá riki noqanchisqa castigasqa kasun manachus janaq pachamanta rimamuqpa kunkanta uyarikusun chayqa.+
26 Chay tiempopiqa chay rimamuq kunkaqa chhafchirirqanraqmi kay pachatapas,+ kunanmi ichaqa pay nin: “Jujtawanmi noqaqa chhafchirisaq, ichaqa manan kay pachallatachu, aswanpas cielotawanmi”,+ nispa.
27 “Jujtawanmi” nispaqa chhafchisqa kaqkuna, Diospa mana paqarichisqan kaqkuna wijch’usqa kananmantan rimashan, chhaynapi mana chhafchisqa kaqkuna kaqllapi kananpaq.
28 Chhaynaqa, mana jayk’aq chhafchisqa kaq gobiernotataq chaskisun chayqa, kallpachakushallasun Diospa ancha sumaq sonqo kayninta chaskinanchispaq, chhaynapin paytaqa manchakuywan ancha respetowan ima sonqonman chayaqta servisunchis.
29 Diosninchisqa lliuta ruphaq nina jinaraqmi kashan.+
Uraypi willakuykuna
^ Qhaway Explicasqa simikuna nisqapi “Ñak’arina k’aspi” nisqata.
^ Qhaway “Astawan yachanapaq A5” nisqata.
^ Qhaway “Astawan yachanapaq A5” nisqata.
^ Moqotaqa “qonqori” nillankutaqmi.
^ Qhaway Explicasqa simikuna nisqapi “Qhelli jucha” nisqata.
^ Laqhayaqtaqa “tutayaq” nillankutaqmi.
^ Khatatataytaqa “kharkatiy” nillankutaqmi.
