Hechos 24:1-27
24 Pisqa p’unchaymantan uma sacerdote Ananías+ Cesarea llaqtaman jamurqan wakin umalliq runakunawan,* Tértulo sutiyoq abogadopiwan, jinaspa kamachikuq Felixman imaymanata willarqanku Pabloq contranpi.+
2 Wajamuqtinkun Tertuloqa Pablo contra rimayta qallarirqan:
“Ancha allin kamachikuq Félix, qanraykun sumaq thajpi kausashayku, allin yuyaykuq kasqaykiraykun kay nacionpipas imaymana allinkuna ruwakushan,
3 chaykunamantaqa tukuy tiempon jinantinpi ancha agradecesqa kashayku.
4 Ichaqa manan munaymanchu tiempoykita astawan usuchiyta, chayraykun valekuyki juj ratulla sumaq sonqowan uyariykuwanaykikupaq.
5 Kay runaqa millay onqoy jinan purishan,*+ judiokunatapas jinantinpin gobierno contra jatarichishan,+ chaymantapas paymi Nazaret llaqtayoq Jesuspa t’aqanta umallishan.+
6 Jinaspapas templotan qhellichayta munashasqa, chaymi noqaykuqa jap’irqayku.+
7 *——
8 Qan kikiyki tapuy paypa contranpi tukuy imachus nisqaykuqa cheqaq kasqanta yachanaykipaq”, nispa.
9 Judiokunapas “chaykunaqa chhaynapunin” nispan nirqanku.
10 Jinan kamachikuq Felixqa umallanwan Pablota kamachirqan rimananpaq, jinan Pabloqa nirqan:
“Noqaqa yachanin kay nacionpi askha watakunaña juez kasqaykita, chaymi confianzawan favorniypi rimasaq.+
11 Diosta adoranaypaq Jerusalén llaqtaman wichasqayqa chunka iskayniyoq p’unchay jinallaraqmi kashan,+ chay cheqaqchus icha manachus kasqanta yachayta munaspaqa tapurikuy.
12 Paykunaqa manan templopipas ni sinagogakunapipas ni llaqtapipas piwan discutishaqtachu ni runakuna ch’aqwachishaqtachu tariwarqanku.
13 Manataqmi contraypi rimasqanku cheqaqchus kasqanta rikuchiytapas atinkumanchu.
14 Ichaqa sut’itan nisayki: Paykunaq “waj t’aqa” nisqanku ñanman jinan noqaqa ñaupa taytaykunaq Diosninta servishani;+ chaymantapas noqaqa tukuy sonqon iñini kamachikuy simipi profetakunaq qelqasqanpipas.+
15 Kay runakuna jinan noqapas Diospi suyakuni chanin runakunatapas mana chanin runakunatapas+ wañusqa kasqankumanta kausarichimpunanta.+
16 Chaymi noqaqa kallpachakushallanipuni Diospa ñaupanpi runakunaq ñaupanpipas ch’uya concienciallayoq kanaypaq.+
17 Noqaqa unay watakunamantan Jerusalén llaqtaman kutirqani llaqtamasiy wajcha runakunapaq yanapaykunata apaspay,+ ofrendata jaywanaypaq ima.
18 Chaykunata ruwashaqtiymi noqataqa ch’uyanchasqataña templopi tariwanku,+ manataqmi piwan discutishaqtachu ni runakuna ch’aqwachishaqtapaschu. Chaypiqa kasharqanku Asia provinciamanta wakin judiokunan,
19 paykunachá riki jamunkuman karqan ñaupaykipi noqa contra rimaqqa, imatapas quejakuwanankupaq jina tarirqanku chayqa.+
20 Mana chayqa kaypi kaqkunayá niwachunku ima mana allintas Jatun Juntaq ñaupanpi kashaqtiy tariwarqanku chayta,
21 icha, ¿paykunaq chaupinkupi kashaspay, ¡wañusqakunaq kausarimpunanpi iñisqaymantan juzgashawanku!, nisqaymantachu juchachashawankupas?”,+ nispa.
22 Felixqa allintan yacharqan Señorpa Ñanninmanta,+ chaymi chay runakunata suyachinanrayku nirqan: “Comandante Lisias jamuqtinñan problemaykichis imaynachus kanantaqa sut’inchasaq”, nispa.
23 Jinaspa ejercitopi capitanta kamachirqan Pablota wisq’asqata jap’imunankupaq, ichaqa nirqanmi sumaqllata qhawarinankupaq, amigonkunaq atiendenantapas ama jark’anankupaqwan.
24 Chaymanta pisi p’unchaykuna qhepatan Felixqa esposan Drusilapiwan chayamurqan, payqa judía warmin karqan; jinaspan Felixqa Pablota wajachimurqan Cristo Jesuspi iñiymanta willananpaq.+
25 Chanin kaymanta, cuerpo kamachiq kaymanta, jamuq juiciomantawan Pablo rimapayaqtinmi+ ichaqa mancharikuspa Felixqa payta nirqan: “Kunanqa ripullayraq, jujpiña tiempoy kaqtin wajachimusayki”, nispa.
26 Felixqa Pabloq qolqe qonantan munasharqan, chaymi sapa kutilla wajachimuq paywan rimananpaq.
27 Iskay watamantan ichaqa Felixpa rantinpi Porcio Festo kamachikuq jaykurqan.+ Felixqa judiokunaq allin qhawarisqan kayta munaspan presollata Pablota saqerqan.
Uraypi willakuykuna
^ Chaypiqa “kuraq runakunawan” nillanmantaqmi.
^ Chaypiqa “runakunatan ch’aqwachishan” nillanmantaqmi.
^ Kay versiculoqa manan rijurinchu Westcott, Hort runakunaq ruwasqanku griego rimay qelqapi nitaq wakin allin reqsisqa qelqakunapipas. Qhaway “Astawan yachanapaq A3” nisqata.
