Job 1:1-22
1 Uz llaqtapin tiyarqan Job*+ sutiyoq runa. Chay runaqa mana juchachana chanin runan karqan,+ jinaspapas chay runaqa Diosta manchakuspan kausaq, manataqmi ima mana allintapas ruwaqchu.+
2 Paypa churinkunan karqan qanchis, ususinkunataq karqan kinsa.
3 Ovejankunan karqan qanchis waranqa, camellonkunataq karqan kinsa waranqa, wakankunataq karqan waranqa,* asnonkunataq* karqan pisqa pachaj; jinaspapas payqa askha kamachikunayoqmi karqan. Chhaynapin Jobqa inti lloqsimuy ladopi tiyaq runakunamanta aswan qhapaq aswan respetasqa runa kapurqan.
4 Jobpa churinkunaqa sapa kutillanmi wasinkupi mijunata wayk’ukuqku. Sapanka churinkunan ima p’unchaychus tupasqanman jina wasinkupi wayk’uqku, jinaspa wajachiqku kinsantin panankunata paykunawan kuska mijunankupaq ujanankupaq ima.
5 Llapanku chayta ruwasqanku qhepamantaq Jobqa wawankunata wajachiq ch’uyanchananpaq. Jobmi niq: “Wawaykunaqa yaqapaschá juchallikurqanku, sonqonkupipaschá Diosta ñakarqanku”, nispa. Chayta nispan payqa tutallamanta jatarispa sapanka wawankunapaq ruphachina sacrificiokunata jaywaq.+ Chaytan Jobqa sapa kutilla ruwaq.+
6 Angelkunaq*+ Diosman qayllaykunanku p’unchaymi chayamurqan, chaypin paykunaqa Jehová Diospa ñaupanman jaykurqanku,+ Satanaspas+ paykunawan kuskan jaykullarqantaq.+
7 Jinan Jehová Diosqa Satanasta tapurqan: “¿Maymantan jamushanki?”, nispa. Satanastaq Jehová Diosta nirqan: “Kay jallp’a pachaq k’uchun-k’uchunta purimusqaymantan jamushani”,+ nispa.
8 Chaymantataq Jehová Diosqa Satanasta nirqan: “¿Rikumurqankichu kamachiy Jobta? Manan pipas pay jinaqa jallp’a pachapi kanchu. Payqa mana juchachanatan, chanintan kausan,+ payqa Dios manchakuq runan, manataqmi ima mana allintapas ruwanchu”, nispa.
9 Jinan Satanasqa Jehová Diosta nirqan: “Manamá Jobqa yanqachu manchakushasunki.+
10 Qanmá riki wasintapas tukuy imaymana kaqnintapas cuidashanki,+ perqawanpas llapa kaqninkunata muyurachiwaq jinata; qanmá riki llank’asqankunatapas bendecishanki.+ Chaymi uywankunapas askhatapuni mirashan.
11 Sichus kunan tukuy imantapas qechuruwaq chayqa uyaykipipunin ñakasunki”, nispa.
12 Chaymi Jehová Diosqa Satanasta nirqan: “Tukuy imanpas makiykipin kashan. ¡Paytan ichaqa ama imanankipaschu!”, nispa. Jinan Satanasqa Jehová Diospa ñaupanmanta ripurqan.+
13 Juj kutinmi Jobpa churinkuna ususinkuna ima kuraq hermanonkuq wasinpi mijusharqanku vinotapas ujasharqanku.+
14 Chay kutipin Jobman juj runa chayamurqan, paymi nirqan: “Kamachiykikunan torokunawan llank’asharqanku, asnokunatapas chaypin michisharqanku,
15 chayllamanmi Seba runakuna phawaykamunku, jinaspa kamachiykikunata llapanta wañurachipunku, torokunatawan asnokunatawantaq aparikapunku. Noqallañan ayqemuni qanman willanaypaq”, nispa.
16 Chay runa rimashallaqtinraqmi juj runañataq chayamurqan, paymi nirqan: “Janaq pachamantan Diospa kachamusqan nina* uraykamuspa llapa ovejakunata kamachiykikunatawan rupharapun. Noqallañan ayqemuni qanman willanaypaq”, nispa.
17 Chay runa rimashallaqtinraqmi juj runañataq chayamurqan, paymi nirqan: “Caldea runakunan+ kinsa t’aqa jamusqaku, jinaspan llapa camelloykikunata qatirikapunku, kamachiyki runakunatapas llapantan wañurachipunku. Noqallañan ayqemuni qanman willanaypaq”, nispa.
18 Chay runa rimashallaqtinraqmi juj runañataq chayamurqan, paymi nirqan: “Churiykikunan ususiykikunapiwan kuraq churiykiq wasinpi mijusharqanku vinota ima ujasharqanku,
19 chayllamanmi ch’inneq ladomanta sinchi wayra jamuspa wasita thunirapun, jinaspa wawaykikunata p’amparapun. Noqallañan ayqemuni qanman willanaypaq”, nispa.
20 Chayta uyarispan Jobqa jatarispa p’achanta llik’ikurqan, chujchantapas rutukurqan. Chaymantataq qonqorikuspa pampakama k’umuykurqan.
21 Jinaspa nirqan:
“Q’alallan nacerqani, q’alallataqmi wañupusaqpas.*+
Jehová Diosmi qoqpas,+ Jehová Diosllataqmi qechuqpas.
Jehová Diospa sutinqa jatunchasqallapuni kachun”, nispa.
22 Tukuy chaykuna nisqanpiqa manan Jobqa juchallikurqanchu, manataqmi Diostapas juchacharqanchu.
Uraypi willakuykuna
^ Job sutiqa yaqapaschá “paykunaq cheqnisqan” ninanta nin.
^ Hebreo rimaypiqa “pisqa pachaj masa” ninmi.
^ Hebreo rimaypiqa “china asnonkunataq” ninmi.
^ Hebreo rimaypiqa “Diospa wawankunaq” ninmi.
^ Chaypiqa yaqapaschá “rayo” nillanmantaq.
^ Hebreo rimaypiqa “kutipusaqpas” ninmi.
