Job 20:1-29
20 Jinan Namá llaqtamanta Zofarqa+ khaynata nirqan:
2 “Kay piensayniymi rimay nishawan,sonqoymi rimanaypaq tanqashawan,manan ch’inllaqa kaymanchu.
3 Kay uyarisqayqa sonqoytan nanachiwan,chaymi yachayniy rimariy nishawan.
4 Kaytaqa yacharqankichá,runaq* kay pachapi rijurisqanmantapachaqa khaynan imapas kashan:+
5 Millay runaq kusikuyninqa juj ratullapaqmi,Dios contra jatariqkunaq* kusikuyninpas pisi tiempollapaqmi.+
6 Jatunchakusqan janaq pachamanraq chayanman chaypas,uma oqarisqan phuyumanraq aypanman chaypas,
7 payqa jatun jisp’aynin jinan wiñaypaq chinkapunqa;payta rikuqkunataq ninqaku: ¿Maypitaq kapunri?, nispa.
8 Mosqoy jinan payqa chinkapunqa,manan pipas tarinqañachu,tutapi mosqoyta jinan qonqapunqaku.
9 Payta rikuqkunaqa manañan rikunqakuñachu,tiyasqanpi rikuqkunapas manañan rikunqakuñachu.+
10 Churinkunapas wajchakunaq yanapaynintan maskhanqaku,paypas jujkunamanta qechusqankunatan kutichipunqa.+
11 Paypa tullunkunaqa waynaq tullunkuna jinaraqmi kasharqan,ichaqa chaywan kuskan jallp’a sonqoman jaykupunqa.
12 Millay kaqkunachus siminpi misk’i,chaykunatachus qallunpi pakan,
13 chaykunatachus mana kacharispa khamun,simillanpitaqchus jap’ishan chayqa,
14 mijusqanmi jayaman tukupunqa,wijsan ukhupin mach’aqwaypa venenon jinaraq kapunqa.
15 Payqa qhapaq kaykunatan millp’upun, ichaqa aqtumpunqan,Diosmi chaykunata wijsanmanta wijch’uchimpunqa.
16 Mach’aqwaypa venenontan ch’onqanqa,mach’aqwaypa kanisqantaq wañuchipunqa.
17 Payqa manan rikunqachu unuq phawasqanta,manan rikunqachu mieltapas mantequillatapas.
18 Kaqninkunatapas chaykunawan manaraq kusirikushaspan kutichipunqa,negociota ruwaspa ganasqantapas manan llamiykunqapaschu.+
19 Payqa wajchakunatan ñak’arichirqan jinaspa wijch’upurqan,mana ruwasqan wasitan jap’ikapurqan.
20 Payqa manan thajchu kanqa,kaqninkunapas manan paytaqa salvanqachu.
21 Manan imapas kanñachu qechunanpaqqa,chaymi qhapaq kasqanqa mana wiñaypaqchu kanqa.
22 Qhapaq kashaqtinmi llakikuykuna payta qatirinqa,sinchi sasachakuykunan payman chayamunqa.
23 Mijushaqtinmi payman phiñakuy chayamunqa,Diosmi phiñakuyninta payman kachaykamunqa,para jinaraqmi chay phiñakuyqa chayamunqa.
24 Fierro armakunamanta ayqekushaqtinpas,cobremanta flechawanmi jap’ichirqanku.
25 Flechasqankutan wasanmanta orqokun,k’anchashaq armatan higadonmanta* orqokun,chaykunawantaq payqa sinchita mancharikun.+
26 Allin valorniyoq kaqninkunan chinkapunqa;mana piqpa jap’ichisqan ninan ruphapunqa;karpanpi kaqkunapas sinchi llakipin tarikunqaku.
27 Cielon juchallikusqanta sut’iman orqonqa,kay pachapas pay contran sayarinqa.
28 Askha unun wasinta thunipunqa,Diospa p’unchayninpin wasinta apapunqa.
29 Chaytan Diosqa millay runapaq waqaychashan,chay herenciatan Diosqa paykunaman qonqa”, nispa.
Uraypi willakuykuna
^ Chaypiqa “Adanpa” nillanmantaqmi.
^ Chaypiqa “Diosmanta t’aqakuspa pay contra jatariqkunaq” nillanmantaqmi.
^ Higadotaqa “k’ipchan, kukupin” nillankutaqmi.
