Job 31:1-40
31 ”Noqaqa ñawiywanmi rimanakurqani,+chhaynaqa, ¿imaynapin noqa juj sipasta* munapayayman?+
2 Chayta mana junt’aymanchu chayqa,¿ima herenciatan janaq pacha Dios qowanman?
¿Ima herenciatan tukuy atiyniyoqmanta chaskiyman?
3 ¿Manachu millay runakunamanqa mana allinkuna chayamun?
¿Manachu mana allinkunata ruwaqkunamanqa llakikuykuna chayamun?+
4 ¿Manachu Diosqa ñanniykunata qhawashan?+
¿Manachu payqa sarusqaykunata rikushan?
5 ¿Jayk’aqllapas noqa llullakurqanichu?
¿Jayk’aqllapas noqa pitapas engañarqanichu?+
6 Chanin balanzapi Dios pesawachun,+chaypin yachanqa chanin runa kasqayta.+
7 Mana allin ñankunapi purishani chayqa,+sonqoypas ñawiypaq rikusqanwan aysachikushan chayqa,+makiypas millay ruwaykunawan qhelli kashan chayqa,
8 chajraypi ima tarpusqaytapas juj runa mijupuchun,+ima plantasqaypas* t’irasqa kapuchun.
9 Juj warmiwanchus sonqoyta suwachikurqani chayqa,+wasimasiypa warmintachus qhawapayarqani+ chayqa,
10 juj qharipaq warmiy trigota kutapuchun,juj qharikuna warmiywan puñuchun.+
11 Chaykunata ruwayman karqan chayqa, p’enqay ruwaychá kanman karqan,chay juchakunata ruwaqkunaqa juezkunaq castigasqanpunin kanan.+
12 Chay juchaqa sinchi nina rauray jinachá kanman,+chajraypi tarpusqaykunatapas saphinmantaraqchá ruphapunman.
13 Warmi kamachiyta qhari kamachiyta mana kasurqanichu chayqa,noqa contra quejakushaqtinku justiciata mana ruwapurqanichu chayqa,
14 ¿imaniymanmi Dios tapuwaqtin?
¿Imaniymanmi chaykunamanta yachayta munaqtin?+
15 ¿Manachu mamaypa wijsanpi ruwawaqqa paykunatapas ruwallarqantaq?+
¿Manachu payllataq llapanchistapas ruwawarqanchis?+
16 Wajchakunamanchus mana imallatapas qorqani chayqa,+viuda warmitachus llakichirqani chayqa,+
17 sapallaychus mijunayta mijurqani,manachus mana taytayoqmanpas jaywarirqani chayqa,+
18 (wayna kasqaymantapachan mana taytayoqqa noqawan kuska tiyarqan,noqan paypaqqa taytan karqani,erqe kasqaymantapachan* viudatapas yanaparqani),
19 mana p’achayoqtapas chiripi jinallata qhawarparirqani chayqa,mana p’istunayoq wajchatapas jinata qhawarparirqani chayqa,+
20 manachus ovejaypa willmanta jaywarirqani,manachus chaywan q’oñikuspa bendeciwarqan chayqa,+
21 mana taytayoq yanapayta mañakuwaqtinchus negarqani chayqa,+llaqta punkupi+ yanapayta mañakuwaqtinchus saqmata qhawaykachirqani chayqa,
22 rijraymanta makiy urmapuchun,kukuchuymanta* makiy p’akikuchun.
23 Noqaqa sinchitapunin manchakurqani Diospa castigonta,manchakurqanin ancha jatun kasqanrayku ñaupanpi sayaykuyta.
24 Qoripichus confiarqani,ch’uya qoritachus nirqani:
Qanllan yanapawaqniyqa kanki, nispa chayqa,+
25 qhapaq kaqniykunapichus,imaymana juñusqaykunapichus+ kusikuyta tarirqani chayqa,+
26 intiq k’anchasqanta rikuspachus,killapas munayta k’anchasqanta rikuspachus,+
27 sonqoyta chaykunawan suwachikurqani,chaykunata yupaychanaypaq makiytaraq much’akurqani chayqa,+
28 juezkunaq castigasqanchá kayman karqan,chaykuna ruwayqa janaq pacha Diosta negaymi kanman.
29 ¿Jayk’aqllapas kusikurqanichu enemigoy wañuqtin?+
¿Jayk’aqllapas kusipayarqanichu llakipi tarikuqtin?
30 Manan jayk’aqpas simiyqa juchallikurqanchu,manan jayk’aqpas paypa wañunantaqa mañakurqanchu.+
31 ¿Manachu karpaypi tiyaq runakunata tapurqankichis?
¿Mayqellanpas mijusqanku qhepaman yarqasqa karqanchu?+
32 Mana reqsisqay runaqa manan jawapiqa illariqchu,+purikuqmanqa punkuytan kicharillaqpuni kani.
33 ¿Jayk’aqllapas juj runakuna jina juchayta pakarqanichu?+
¿Jayk’aqllapas pantasqayta pach’aypa bolsillonpi pakarqanichu?
34 ¿Jayk’aqllapas runakunaq ima nisqantapas manchakurqanichu?
¿Jayk’aqllapas juj familiakunaq cheqnikuwasqanmanta pakakurqanichu,jayk’aqllapas paykunaq pisichawananta manchakuspa wasipi qhepakurqanichu?
35 ¡Pillapas uyariwanman!+
Rimasqaytan sutiywan firmayman.
¡Tukuy atiyniyoq rimarimuchun!+
¡Tumpawaqniy documentopi chaykunata qelqanman karqan!
36 Chay documentotaqa rijray patapin apayman,coronata jinan umayman churakuyman.
37 Llapa ima ruwasqaytan Diosman willayman,juj umalli jinan mana manchakuspa payman qayllaykuyman.
38 Jallp’aychus noqa contra qaparin,wachunkunachus waqanku chayqa,
39 runakunaq chajranmantachus mana pagaspa mijurqani,+llakichirqanichus waqachirqanichus paykunata chayqa,+
40 trigo t’akasqaypi kiskakuna wiñachun,cebada t’akasqaypi asnaq qorakuna wiñachun”, nispa.
Chaypin tukupun Jobpa rimasqan.
Uraypi willakuykuna
^ Hebreo rimaypiqa “doncella sipasta” ninmi. Doncella sipastaqa “qhariwan mana jayk’aq puñuq sipas” nillankutaqmi.
^ Chaypiqa “mirayniykunapas” nillanmantaqmi.
^ Hebreo rimaypiqa “mamaypa wijsanmantapachan” ninmi.
^ Kukuchutaqa “moqlli, maki moqo, codo” nillankutaqmi.
