Job 36:1-33
-
Diosqa atiyniyoqpuni kasqanta Elihú sut’ita rikuchisqanmanta (1-33)
36 Chaymantapas Elihuqa nillarqantaqmi:
2 “Juj chhikantawan pacienciarikuway, rimanayqa kashanraqmi,Diospa favorninpi rimanaypaqqa kashanraqmi.
3 Tukuy ima yachasqaytan llapanta rimasaq,kamaqniy chanin kasqantan willakusaq.+
4 Llapa nisqaykunaqa cheqaqpunin.
Tukuy imatapas allinta yachaq Diosqa+ ñaupaykipin kashan.
5 Diosqa atiyniyoqpunin,+ payqa manan pitapas saqerparinchu.
Diosqa tukuy imatapas allintapunin yachan.
6 Payqa chinkachinqapunin millay runakunataqa,+ñak’ariqkunapaqmi ichaqa justiciata ruwapunqa.+
7 Chanin runakunataqa qhawashallanmi,+paykunataqa reykunaq tiyananpin tiyachin,+wiñaypaqtaqmi paykunataqa jatunchan.
8 Chanin runakunachus cadenakunawan watasqa kanku,waskhakunawan ñak’arichisqa kanku chayqa,
9 Diosmi reparachin imakunachus ruwasqankuta,paymi rikuchin jatunchakuq kayninkupi juchallikusqankuta.
10 Paymi ninrinkuta kicharin anyasqanta uyarikunankupaq,paymi nin mana allinkunamanta karunchakunankupaq.+
11 Diostachus munasqanman jina servinqaku chayqa,tukuy kausasqanku p’unchaykunan allillan kanqaku,tukuy kausasqanku watakunan kusisqa kanqaku.+
12 Manachus kasukunqaku chayqa,espadawanmi wañuchisqa kanqaku,+mana imata yachaspan wañunqaku.
13 Dios contra jatariqkunaqa* phiñasqan kanku.
Diosña castigaqtinpas manan yanapayta mañakunkuchu.
14 Paykunaqa waynallaraq kashaspan wañupunku,+qharimasinkunaman cuerponkuta vendespa idolonkuta yupaychaq qharikunawantaqmi kausanku.+
15 Diosmi ichaqa nanaypi tarikuqkunata salvan,ñak’ariypi tarikuqkunatapas ninrinkuta kicharin.
16 Diosqa llakikuykunamantan orqosunki,+llakikuykunaq mana kasqanmanmi apasunki,+sonqoyki thaj kananpaqtaq sumaq mijunakunata qosunki.+
17 Qanqa rikunkipunin millay runakuna juzgasqa kasqankuta,+imayna juzgasqa kasqankuta, justicia ruwakusqantapas.
18 Allinta cuidakuy sinchi phiñakuy ama cheqnikuyman apanasuykipaq,+askha pago ama chanin ñanmanta lloqsichinasuykipaq.
19 ¿Qaparisqaykichu llakikuykunamanta ayqechisunki?
¿Sinchita kallpachakusqaykichu nanaymanta orqosunki?+
20 Ama tutaq chayamunanta suyakuychu,tutapin runakunaqa chinkan.
21 Ama mana allinkunawanqa aysachikuychu,chaykunamanmi rishanki ñak’ariyta aguantanaykimantaqa.+
22 ¡Qhawariy! Diosqa ancha jatun atiyniyoqmi,¿pi yachachiqmi pay jina kanman?
23 ¿Pin payta ninman mayninta purinanta?*+
¿Pin ninman: Ruwasqaykiqa manan allinchu,+ nispa?
24 Ama qonqaychu lliu ruwasqankunamanta jatunchayta,+chaykunamantan runakunapas takikunata ruwarqanku.+
25 Chaykunataqa llapa runakunan rikunku,karullamantan qhawanku.
26 Diosqa jatunpunin, manan yuyayninchispas aypayta atinmanchu,+kausasqan watakunatapas manan yupayta atisunmanchu.+
27 Paymi unutapas cieloman wichachin,+paymi wajsitapas phuyuman, unuman tukuchin.
28 Chay phuyutaq t’akarikamun,+chay unutaq runaman chayamun.
29 ¿Pin yachanman phuyukuna imayna k’umpasqa kasqanta?
¿Pin yachanman rayo imaynata wasinmanta lloqsimusqanta?+
30 Qhawariy imaynatachus lliflli kayninta k’anchachimun chayta,+qhawariy imaynatachus lamar-qochatapas unuwan junt’achin chayta.
31 Tukuy chaykunawanmi Diosqa runakunata kausachin,askhanpin mijuytapas paykunamanqa qon.+
32 Diosqa makinpin rayota pakan,chaytataq may munasqanman chayachin.+
33 Rayo t’ojaymi willan pay jamunanta,uywakunapas willankun pay chayamunanta.
Uraypi willakuykuna
^ Chaypiqa “Diosmanta t’aqakuspa pay contra jatariqkunaqa” nillanmantaqmi.
^ Chaypiqa yaqapaschá “¿Pin paymanta cuentata mañanman?” nillanmantaq.
