Job 4:1-21
4 Jinan Temán llaqtamanta Elifazqa+ Jobta nirqan:
2 “Imatapas niykiman chayri, ¿phiñakuwaqchu?
Manan ch’inqa kaymanchu khaynata rikuspayqa.
3 Qanqa runakunatan yuyaychaq kanki,pisi kallpakunatan kallpachaq kanki.
4 Urmaq runakunatan sumaqta rimapayaq kanki,sasachakuypi tarikuqkunatan yanapariq kanki.
5 Qantaq ichaqa chhayna sasapi tarikuspa llakikushanki;khaynakuna pasaqtin khuyayraq kashanki.
6 ¿Imaraykutaq Diosta respetashaspari mana paypi confiankichu?
¿Imaraykutaq Diosta tukuy sonqowan servishaspari+ pisi kallpayashanki?
7 Ama jinachu kay, yuyariy:
¿Jayk’aqllapas mana juchayoq runa manaraq tiemponpi wañurqanchu?
¿Jayk’aqllapas chanin runa wañuchisqa karqanchu?
8 Rikusqayman jinaqa,mana allin ruwayta tarpuqqa mana allillantataqmi oqarin,cheqnikuyta tarpuqqa cheqnikuyllatataqmi cosechan.
9 Chhayna runakunataqa juj phukuyllapin Diosqa chinkachipun,jujta phiñarikuspallan ch’usaqman tukuchipun.
10 Leonqa manchakuytan qaparin, malta leonpas chhaynan,ichaqa leonqa may kallpayoqña kanman chaypas kirunqa p’akikunmi.
11 Leonqa mijunan mana kaqtinmi wañupun,uñankunataq ch’eqeripun.
12 Sapallay kashaqtiymi juj willakuy chayamuwarqan,chay willakuyqa ninrillaymanmi chayamuwarqan.
13 Tutapin rijuriy jina umayman jamuwarqan,misk’ita puñushaqtiymi chayamuwarqan.
14 Sinchitan chayqa mancharichiwarqan,tulluykunaraqmi khatatatarqan.*
15 Chayllamanmi ñaupayta juj espíritu pasarun,chaywanmi cuerpoyqa astawanraq ¡rass...! nirqan.
16 Chay espirituqa ñaupaypin sayaykun,ichaqa mana reparaymi kasqa,runaq llanthunta jinallan rikuruni,chayllamanmi ch’in karun, jinallamantaq juj kunka nimun:
17 ¿Wañuq runa atinmanchu Diosmanta aswan chanin kayta?
¿Juj runa atinmanchu kamaqninmanta aswan ch’uya kayta?, nispa.
18 Diosqa manan serviqninkunapiqa confianchu,payqa angelninkunapipas mana allinkunataqa tarinmi.
19 ¡Chhaynataq chayqa,astawanraqchá jallp’a patapi t’urumanta ruwasqa wasi jina juchasapa runapiqa imaymanakunata tarin,+astawanraqchá thuta jina saruna runapiqa juchata tarin!
20 Runaqa mana reparayllan wiñaypaq chinkapun,tutamantanmi kashan, tardentataq manaña kapunñachu.
21 Imaynan juj karpaqa waskhan p’itikapuqtin* urmapun, chhaynatan runaqa urmapun;manaraq imatapas yachashaspan wañupun.
Uraypi willakuykuna
^ Khatatataytaqa “kharkatiy” nillankutaqmi.
^ P’itiytaqa “t’ipiy” nillankutaqmi.
