Job 5:1-27
5 ”¡Kunanqa wajakuyyá! Pillachá uyarimusunki.
¿Mayqen angelpa yanapaynintan mañakusaq nishankitaqri?
2 Cheqnipakuq kaymi mana yuyayniyoq runataqa wañuchinqa,envidiakuymi pisi yachayniyoq runataqa apapunqa.
3 Mana yuyayniyoq runatan t’ikariqta rikurqani,ichaqa qonqayllan wasinman desgracia chayamurqan.
4 Wawankunapas manan thajchu tiyanku;mana piqpa yanapasqanmi llaqta punkupi pisichasqa kanku.+
5 Cosechasqantapas yarqasqa runakunan mijupunku,kiska-kiskamanta pallakusqantapas yarqasqa runakunan mijupunku,chhaynapin kaqninkunaqa ch’usaqman tukupun.
6 Nanaykunaqa manan yanqallamantachu jatarin,sasachakuykunapas manan yanqallamantachu paqarin.
7 Runaqa ñak’arinallanpaqmi kay pachaman jamun,imaynan ninaqa wichaymanpuni rauran, chhaynallataqmi runapas ñak’ariykunallapipuni tarikun.
8 Noqaqa Diospa yanapaynintan mañakuyman,Diosmanmi willayman imapichus tarikusqayta.
9 Ancha jatun ruwaykunata ruwaqmanmi riyman,mana yupay atiytaraq ruwaqpa yanapaynintan mañakuyman.
10 Paymi parataqa chayachimun,paymi campokunataqa qarpan.
11 Paymi juch’uyaykuqtaqa jatunchan,paymi pisi kallpatapas salvan.
12 Paymi yuyaysapa runakunaq yuyaykusqantaqa pantachin,paymi ima ruwasqantapas mana valeqman tukuchin.
13 Paymi yachayniyoq runataqa ruwasqallanpitaq urmachin,+paymi ima yuyaykusqantapas qolluchin,
14 p’unchaypin laqhayaqpi* jina purichin,chaupi p’unchaypipas tutapi jinan purichin.
15 Paymi k’araq rimaqmanta libraqqa,paymi wajchata* atiyniyoq runamanta kacharichiqqa;
16 paymi sarunchasqa runaman suyakuyta qoqqa,paymi mana chanin runakunaq simintapas wisq’aqqa.
17 ¡Kusisqa kachun Diospa wanachisqan* runaqa!
Chhaynaqa, ¡amapuni wijch’uykukuychu tukuy atiyniyoqpa wanachiynintaqa!
18 Diosqa k’irisunkin, ichaqa watasunkin k’iriykikunata;sinchitaña k’irisunki chaypas makinwanmi jampisunki.
19 Paymi salvasunki soqta ñak’ariykunamanta,qanchis kaq sasachakuy chayamuqtinpas manan imanasunkipaschu.
20 Yarqay tiempopipas wañuymantan salvasunki,guerra kaqtinpas espadamantan librasunki.
21 Runakunaña millayta k’amisunki chaypas paymi pakaykusunki,+ima ñak’ariyña jamunqa chaypas manan manchakunkichu.
22 Yarqayña ima ñak’ariyña jamunqa chaypas asikuspan qhawanki,salqa animalkunatapas manan manchakunkichu.
23 Campopi kaq rumikunaqa manan imanasunkipaschu,salqa animalkunawanpas thajpin kausanki.
24 Wasiykipipas mana manchakuspan thaj tiyanki,uywaykikunata watukuq riqtiykipas manan jujpas faltanqachu.
25 Wawaykikunapas askhan kanqa,mirayniykipas kay pachapi plantakuna jinaraqmi kanqa.
26 Wañupuspaqa kallpayoqraqmi wañupunki,chayllaraq rutusqa trigo jinan wañukapunki.
27 Manan kaytaqa comuntachu nishayki, runaq vidanqa chhaynapunin.
Uyarikuy jinaspa kasukuy”, nispa.
