Job 9:1-35
9 Jobtaq khaynata nirqan:
2 “Arí, noqaqa yachanin chhayna kasqanta.
Ichaqa, ¿atinmanchu jallp’a runa Diospa ñaupanpi ch’uya kayta?+
3 ¿Pin paywan juicioman jaykuyta atinman?+
Imataña tapuwasunman chaypas manan imaniytapas atisunmanchu.
4 Payqa tukuy imatapas allintan yachan, ancha atiyniyoqtaqmi kanpas,+¿pin pay contra jatarispa allillan kanman?+
5 Payqa mana piqpa reparasqanmi orqokunata kuyuchin,phiñakuqtinpas orqokunaraqmi t’ijrakun.
6 Paymi kay jallp’atapas chhafchirin,columnankunataraqmi khatatatachin,*+juj ladomanraqmi kuyuchin.
7 Paymi intitapas kamachin ama k’anchananpaq,ch’askakunatapas wisq’an ama k’anchananpaq.+
8 Paymi janaq pachatapas mast’arin,+payllan aytikushaq lamar-qochapipas purin.+
9 Paymi ruwarqan Ash nisqa, Kesil nisqa, Kimá* nisqa juñu-juñu ch’askakunata,+uray ladopi kaq juñu-juñu ch’askakunatapas.
10 Payqa mana entiendey atiy ancha jatun ruwaykunatan ruwan,+mana yupay atiytaraqmi musphanapaq kaqkunatapas ruwan.+
11 Payqa mana rikuyllan ladoyta pasan,mana reparayllan ñaupayta purin.
12 Imataña qechuwasunman chaypas, pin imanispapas ninman.
Pin payta ¿imaraykun chayta ruwashanki?, ninman.+
13 Diosqa chayachimunqapunin phiñakuynintaqa;+Rahab* nisqa animalpa yanapaqninkunapas+ paypa ñaupanpin k’umuykunqaku.
14 ¡Astawanraqchá noqaqa k’umuykunay paywan rimaspaqa!
Allin simikunatachá ajllanay kanman paywan rimanaypaqqa.
15 Razonniyña kanman chaypas, manan imaniymanpaschu,+aswanpas juezniypa khuyapayaynillantan mañakuyman.
16 Wajakuymanña chaypas, ¿uyariwanmanchu?
Manapaschá noqataqa uyariwanmanchu.
17 Payqa jatun wayrawanmi ñit’iwan,imaymana llakitan yanqapas qasi apachimushallawan.+
18 Manan samarinallaytapas dejawanchu,sapa kutillanmi imaymanawan ñak’arichiwan.
19 Atiymanta rimananchis kaqtinqa paymi atiyniyoqqa,+justiciamanta rimananchis kaqtinqa paymi nin:
¿Pin noqamanta cuentata mañawanman?, nispa.
20 Razonwanña rimayman chaypas, simiyqa pantanqapunin.
Mana juchayoqña kayman chaypas, payqa juchachawanqapunin.
21 Mana juchayoqña kani chaypas, imaynachá kasaqpas,noqamantaqa manan kausaytaqa munaniñachu.
22 Imapas kaqllan, chaymi noqaqa nini:
Juchayoqtapas mana juchayoqtapas igualtan payqa wañuchin, nispa.
23 Sichus qonqaylla askha unu jamuspa runata wañuchinman chayqa,asikuspan payqa qhawanman mana juchayoq runaq ñak’arisqanta.
24 Kay pachaqa millay runakunaq makinpin kashan.+
Diosmi juezkunaq ñawintaqa tutayachin,payllan chay ruwaytaqa atinman.
25 Kausasqay p’unchaykunaqa ratullan pasashan,phawaqkunaq phawasqanmantapas aswan ratullan pasashan;+manañan kusikuytapas tarinichu.
26 Carrizomanta* ruwasqa bote jinan ratulla pasashan,mijunaman phawaykuq anka jinan pasashan.
27 Qonqapusaq sasachakuyniykunata,amaña llakikusaqchu, kusisqa kasaq niymanña chaypas,
28 manchasqallan kashayman khayna nanaypi tarikusqayrayku.+
Qanqa manan ch’uyapaqqa qhawariwankimanchu.
29 Ñawiykipaqqa millay runan kani,¿imapaqñan qanwan jap’inakuyman?+
30 Rit’i unuwanña maqchikuyman chaypas,lejiawanña* makiykunata maqchikuyman chaypas,+
31 t’urumanchá winaruwankiman,jinaspa p’achaypas millakuwanmanraq.
32 Payqa manan noqa jina runachu imatapas ninaypaq,juicioman apanakunaykupaqpas.+
33 Manan pipas kanchu juzgawanankupaq,manan juj juezpas tarikunchu chaninchawanankupaq.
34 Sichus pay amaña ñak’arichiwanmanchu,amaña sinchita manchachiwanmanchu chayqa,+
35 mana manchakuspan payta rimapayayman;noqaqa manan manchakunichu piwanpas rimaytaqa.
Uraypi willakuykuna
^ Khatatataytaqa “kharkatiy” nillankutaqmi.
^ Chay sutikunaqa juñu-juñu ch’askakunaq sutinmi. Kay jallp’amanta qhawariqtinchismi chay ch’askakunaqa rikukun animal formapi, imaymana formakunapi ima.
^ Chaypiqa yaqapaschá lamar-qocha ukhupi tiyaq manchay jatun animalmanta rimashan.
^ Carrizotaqa “soqos, caña” nillankutaqmi.
^ Chaypiqa “jabonwanña” nillanmantaqmi.
