Juan 19:1-42
-
Jesusta jasut’isqankumanta asipayasqankumantawan (1-7)
-
Jesusta Pilato wajmanta tapusqanmanta (8-16a)
-
Gólgota nisqapi Jesusta k’aspipi clavasqankumanta (16b-24)
-
Maman allillan kananpaq Jesuspa imachus ruwasqanmanta (25-27)
-
Jesusta wañuchisqankumanta (28-37)
-
Jesusta sepulturaman churasqankumanta (38-42)
19 Jinan Pilatoqa soldadokunata kamachirqan Jesusta apaspa jasut’imunankupaq.+
2 Soldadokunataq kiskamanta coronata simp’aspa umanman churarqanku, churallarqankutaqmi azulniraq puka p’achatapas,+
3 jinaspa payman qayllaykuspa asipayarqanku, nirqankutaq: “¡Kausachun judío runakunaq reynin!”, nispa; ch’aqlakacharqankun uyanpipas.+
4 Pilatotaq wajmanta lloqsimuspa paykunata nirqan: “¡Qhawariychis! Apampushaykichismi, paypiqa manan ima juchatapas tarimunichu”,+ nispa.
5 Chayllamanmi Jesusqa lloqsimurqan kiska coronayoq, azulniraq puka p’achayoq ima. Jinan Pilatoqa nirqan: “¡Qhawariychis kay runata!”, nispa.
6 Umalli sacerdotekunawan guardiakunapiwanmi ichaqa payta rikuspa qaparirqanku: “¡K’aspipi warkuy! ¡K’aspipi warkuy paytaqa!”,*+ nispa. Pilatotaq paykunata nirqan: “Qankunayá apakapuspa warkumuychis,* noqaqa manan ima juchatapas paypiqa tarinichu”,+ nispa.
7 Jinan judiokunaqa payta nirqanku: “Noqaykupaqqa kanmi juj kamachikuy, chaypi nisqanman jinaqa wañunanmi chay runaqa,+ Diospa churinmi kani nisqanrayku”,+ nispa.
8 Chay nisqankuta uyarispan Pilatoqa astawanraq mancharikurqan;
9 jinan payqa wasinman wajmanta kutiykuspa Jesusta tapurqan: “¿Maymantataq kankiri?”, nispa. Jesusmi ichaqa mana imanispapas nirqanchu.+
10 Chaymi Pilatoqa nirqan: “¿Manachu imaniwankipas? ¿Manachu yachanki qanta kacharipunaypaq wañuchinaypaqpas* atiyniyoq kasqayta?”, nispa.
11 Jinan Jesusqa payta nirqan: “Manachus Dios atiyta qosunkiman karqan chayqa, manachá imata ruwawanaykipaqpas atiyniyoqchu kawaq. Chayraykun qanman entregawaqniy runaqa aswan juchayoq”, nispa.
12 Chaymi Pilatoqa kacharipuytapuni munasharqan, judiokunan ichaqa qaparirqanku: “Chay runatachus kacharipunki chayqa, manan Roma reypa* amigonchu kanki. Pipas, reymi kani niqqa Roma reypa contranpin rimashan”,+ nispa.
13 Chhayna nisqankuta uyarispan Pilatoqa Jesusta jawaman orqomurqan, jinaspa tiyaykurqan juzgana tiyanapi, Rumiwan Mast’asqa nisqa cheqaspi, hebreo rimaypiqa Gabata nisqan.
14 Chaykunaqa karqan Pascua Fiestapaq alistakuy p’unchaypin,+ las doceta jina.* Pilaton judiokunata nirqan: “¡Qhawariychis reyniykichista!”, nispa.
15 Paykunataq ichaqa qaparirqanku: “¡Wañuchun! ¡Wañuchun! ¡K’aspipi warkuy!”, nispanku. Jinan Pilatoqa nirqan: “¿Reyniykichistachu wañuchisaq?”, nispa. Umalli sacerdotekunataq nirqanku: “Manan Roma reymanta waj reyniykuqa kanchu”, nispa.
16 Jinan Pilatoqa paykunaman Jesusta entregarqan k’aspipi wañuchimunankupaq.+
Chaymi paykunaqa Jesusta aparqanku.
17 Jesustaq ñak’arinan k’aspi* rijraykusqa Calavera Pata nisqaman lloqsirqan,+ chay patatan hebreo rimaypiqa “Gólgota” ninku;+
18 chaypin Jesustaqa k’aspiman clavarqanku.+ Payqa iskay runakunaq chaupinpin kasharqan, jujninmi paña ladonpi kasharqan jujnintaq lloq’e ladonpi.+
19 Pilaton qelqarqan: “Judío runakunaq reynin, Nazaret llaqtayoq Jesús”,+ nispa, jinaspa kamachikurqan chay qelqasqata Jesusta warkusqanku k’aspiman churanankupaq.
20 Jesusta k’aspiman clavasqanku pataqa llaqta qayllallapin kasharqan, chaymi askha judiokuna chay qelqasqata leerqanku. Jinaspapas chayqa hebreo rimaypi, latín rimaypi, griego rimaypi iman qelqasqa kasharqan.
21 Chaymi umalli sacerdotekunaqa Pilatota nirqanku: “¿Imaraykutaq, judío runakunaq reynin, nispari qelqarqanki? Aswanpas judío runakunaq reyninmi kani nispa nisqantachá qelqawaq karqan riki”, nispa.
22 Jinan Pilatoqa nirqan: “Imachus qelqasqayqa ñan qelqasqaña kashan”, nispa.
23 Soldadokunataq Jesusta k’aspipi clavasqanku qhepaman paypa jawa p’achanta oqarispa tawaman llik’irqanku, chhaynapi sapanka soldado jujta apakunanpaq. Ukhu p’achantapas oqarirqankun, ichaqa mana sirayniyoqmi chay p’achaqa karqan, wichaymanta uraykama muyu awasqa.
24 Chaymi paykunaqa ninakurqanku: “Ama llik’isunchu, aswanpas sorteasun pipaqchá kanqa”,+ nispa. Chayqa karqan: “P’achaykunatan rakinakapunku, p’achaytan sorteanku”,+ nisqa qelqasqa junt’akunanpaqmi. Chaytapunin soldadokunaqa ruwarqanku.
25 Jesusta clavasqanku k’aspiq ladonpin kasharqanku Jesuspa maman,+ mamanpa ñañan, Clopaspa esposan María, María Magdalena ima.+
26 Jinan Jesusqa mamanta rikuspa munakusqan discipulontapas chaypi sayashaqta+ rikuspa mamanta nirqan: “Mamáy, kunanmantaqa paymi wawayki kanqa”, nispa.
27 Chay discipulontapas nillarqantaqmi: “Kunanmantaqa paymi mamayki kanqa”, nispa. Chaymantapachan chay qatikuqninqa wasinman Mariata pusakapurqan.
28 Chaykuna qhepatan Jesusqa lliu imapas junt’akapusqantaña yachaspa nirqan: “Ch’akishawanmi”, nispa, chhaynapi Diospa simin qelqapi nisqan junt’akunanpaq.+
29 Chaypin kasharqan juj p’uyñu junt’a p’osqo vino, jinan chayman esponjata challpurqanku, chayta hisopo plantaq k’aspinman churaspataq Jesuspa siminman aypachirqanku.+
30 Chay p’osqo vinota malliykuspan Jesusqa nirqan: “¡Junt’akunñan!”,+ nispa. Chayllamanmi uman warkukamurqan, manañataq samarimpurqanñachu.*+
31 Chay p’unchayqa samana p’unchaypaq* alistakuna p’unchaymi+ karqan (chay samana p’unchayqa jatun p’unchaymi kanan karqan),+ chaymi judiokunaqa Pilatota nirqanku chay runakunaq chakanta p’akichispa cuerponkuta uraykachimunanpaq, chhaynapi cuerponku ama samana p’unchaykamachu chaypi warkurayananpaq.+
32 Jinan soldadokunaqa rispa Jesuspa ladonpi warkusqa iskaynin runakunaq chakanta p’akirqanku.
33 Jesusman qayllaykuspankun ichaqa wañusqaña kasqanta reparaspa, manaña paypa chakantaqa p’akirqankuchu.
34 Jujnin soldadon ichaqa waqtanninta lanzawan t’urpurqan,+ jinan yawarpiwan unupiwan phawarimurqan.
35 Tukuy chaykunata rikuqmi kaytaqa willashan, paypa willasqanqa cheqaqmi. Payqa yachanmi imachus willasqanqa cheqaq kasqanta, chhaynapi qankunapas creenaykichispaq.+
36 Chaykunaqa pasarqan Diospa simin qelqapi “manan juj tullullanpas p’akisqachu kanqa”+ nisqa junt’akunanpaqmi.
37 Diospa simin qelqapiqa nillantaqmi: “Lanzawan winaspa wañuchisqanku runatan rikunqaku”,+ nispa.
38 Chaykuna qhepatan José sutiyoq runa Pilatomanta permisota mañakurqan Jesuspa cuerponta apananpaq, jinan Pilatoqa permisota qorqan, chaymi Joseqa rispa Jesuspa cuerponta uraykachirqan;+ payqa Arimatea llaqtayoqmi karqan, Jesuspa discipulontaqmi karqanpas, ichaqa judiokunata manchakusqanraykun mana chayta jujkunaman willarqanchu.+
39 Nicodemopas+ rillarqantaqmi pachaj librata* jina sumaq q’apaq mirrata aloetawan chhaqrusqata aparikuspa+ (paymi juj kutin tutallapi Jesusman rirqan).
40 Jinan paykunaqa Jesuspa cuerponta sumaq q’apaq jawinakunayoq lino telakunawan k’uyurqanku,+ judiokunaqa chhaynatapunin ruwaqku wañusqakunata p’ampanankupaq.
41 Jesusta wañuchisqanku* patapin karqan juj huerta,+ chay huertapin kasharqan juj mosoq sepultura, chaymanqa manaraqmi pitapas churasqakuchu.
42 Chayllamanñan Jesuspa cuerpontaqa churarqanku judiokunaq alistakunan p’unchay+ kasqanrayku chay sepultura qayllallapi kasqanrayku ima.
Uraypi willakuykuna
^ Chaypiqa “¡K’aspipi wañuchiy! ¡K’aspipi wañuchiy!” nillanmantaqmi.
^ Chaypiqa “k’aspipi wañuchimuychis” nillanmantaqmi.
^ Chaypiqa “k’aspipi wañuchinaypaqpas” nillanmantaqmi.
^ Griego rimaypiqa “Cesarpa” ninmi. Chhaynatan sutichaqku Roma llaqtapi wakin reykunata. Qhaway Explicasqa simikuna nisqapi “César” nisqata.
^ Griego rimaypiqa “soqta kaq horata jina” ninmi, chaytaqa yupaqku intiq lloqsimusqanmantapachan.
^ Qhaway Explicasqa simikuna nisqapi “Ñak’arina k’aspi” nisqata.
^ Griego rimaypiqa “espirituntataq qorqan” ninmi. Qhaway Explicasqa simikuna nisqapi “Espíritu” nisqata.
^ Qhaway Explicasqa simikuna nisqapi “Samana p’unchay” nisqata.
^ Chaypiqa Roma runakunaq juj libra nisqankumantan rimashan, juj libraqa 327 gramos jinan karqan. Qhaway “Astawan yachanapaq B14” nisqata.
^ Chaypiqa “k’aspipi wañuchisqanku” nillanmantaqmi.
