Juan 5:1-47
5 Chaykuna qhepamanmi chayamurqan judío runakunaq jujnin fiestan,+ chaymi Jesusqa Jerusalenman wicharqan.
2 Jerusalenpin karqan juj estanque, hebreo rimaypi Bejzata nisqa, chayqa karqan Oveja Punku+ nisqaq kasqanpin, chay estanqueq muyuriqninpitaq karqan techoyoq columnakuna, pisqa fila columnakunan karqan.
3 Chaypin kumparayasharqanku askha onqosqakuna, ñausakuna, wist’ukuna, chakin makin ch’akisqakuna ima.
4 *——
5 Chaypin kashallarqantaq kinsa chunka pusaqniyoq wataña onqoshaq runa.
6 Chay runata kumparayashaqta rikuspan Jesusqa repararqan unayña onqosqa kashasqanta, chaymi nirqan: “¿Munawaqchu qhaliyapuyta?”,+ nispa.
7 Jinan chay onqosqa runaqa nirqan: “Wiraqocha, manan pipas yanapaqniy kanchu unu aytirikuqtin estanqueman jaykunaypaq, jaykunay kashaqtinmi juj ñauparuwan”, nispa.
8 Chaymi Jesusqa nirqan: “Sayariy, camillaykita oqarispa puririy”,+ nispa.
9 Jinan chay runaqa, kaq ratu qhaliyapurqan, camillanta oqarispataq puririrqan.
Chayqa karqan samana p’unchaypin.*
10 Chaymi wakin judío runakunaqa nirqanku: “Kunanqa samana p’unchaymá riki, manan allinchu camillaykita apasqaykiqa”,+ nispa.
11 Jinan payqa nirqan: “Kikin qhaliyachiwaqniymi nimuwan: Camillaykita oqarispa puririy, nispa”.
12 Jinan paykunaqa tapurqanku: “¿Pitaq nirqasunki: Chayta oqarispa puririy, nispari?”, nispa.
13 Chay qhaliyachisqa runaqa manan yacharqanchu pichus qhaliyachirqan chayta, Jesuspas ñan runa-runa ukhumanña jaykururqan.
14 Chay qhepamantaq Jesusqa templopi paywan tuparqan, jinaspa nirqan: “Kunanqa qhaliñataq kashanki chayqa, amaña juchallikunkichu, mana chayqa aswan mana allinpin tarikuwaq”, nispa.
15 Paytaq chay judío runakunaman rispa willamurqan qhaliyachiqninqa Jesús kasqanta.
16 Chay jawan chay judío runakunaqa Jesusta qatikachayta qallarirqanku, samana p’unchaypi chaykunata ruwasqanrayku.
17 Chaymi Jesusqa paykunata nirqan: “Taytayqa kunankamapas llank’ashallanpunin, chaymi noqapas llank’ashallani”,+ nispa.
18 Chayraykun chay judío runakunaqa payta wañuchiytapuni munasharqanku, paykunapaqqa samana p’unchaymanta kamachikuytas Jesusqa p’akishanman karqan, chaymantapas “Diosqa Taytaymi”+ nisqanwanqa Dioswansi igualakushanman karqan.+
19 Chaymi Jesusqa paykunata nirqan: “Cheqaqtapunin niykichis: Churiqa manan imatapas payllamantaqa ruwanmanchu, aswanmi imatachá janaq pacha Taytanta ruwaqta rikun chayllata ruwan.+ Paypa imachus ruwasqallantan Churipas ruwan.
20 Janaq pacha Taytaqa munakunmi Churita,+ chaymi tukuy ima ruwasqanta rikuchin, chaykunamantapas astawanraqmi rikuchinqa, chhaynapi qankuna admirakunaykichispaq.+
21 Imaynan janaq pacha Taytaqa wañusqakunata kausarichin* jinaspa kausayta qon,+ chhaynatan Churipas pichus munasqanman kausayta qon.+
22 Janaq pacha Taytaqa manan pitapas juzganchu, aswanmi Churita churan lliuta juzgananpaq,+
23 chhaynapi lliupas Churita respetanankupaq imaynan janaq pacha Taytatapas respetanku jinata. Churita mana respetaqqa manan kachamuqnin Tayta Diostapas respetashanchu.+
24 Cheqaqtapunin niykichis: Pipas simiyta uyarispa kachamuwaqniyta creeqqa wiñay kausayniyoqmi kanqa,+ manataqmi juchachasqapaschu kanqa, aswanmi payqa wañuymanta kausayman jaykunqa.+
25 ”Cheqaqtapunin niykichis: Tiempon chayamushanña, kunantaqmi qallarishanpas, chaypin wañusqakunaqa Diospa Churinpa kunkanta uyarinqaku, jinan kasukuqkunaqa kausanqaku.
26 Janaq pacha Taytaqa pay kikinpi kausayniyoqmi,*+ chhayna kausaytan Churimanpas qon, chhaynapi paypas pay kikinpi kausayniyoq kananpaq.+
27 Chaymantapas runaq Churin+ kasqanraykun atiyta qon juzgananpaq.+
28 Ama chay nisqaywanqa admirakuychischu; tiempon chayamunqa, chaypin sepulturakunapi* llapa kaqkunaqa runaq Churinpa kunkanta uyarinqaku,+
29 jinaspa lloqsimunqaku; pikunachus allin kaqkunata ruwarqanku chaykunan kausaypaq kausarimpunqaku, pikunachus millay kaqkunata ruwarqanku chaykunataq juzgasqa kanankupaq kausarimunqaku.+
30 Manan imatapas noqallamantaqa ruwayta atiymanchu. Noqaqa Taytayta uyarisqayman jinan juzgani manataqmi munayniytachu ruwayta munani, aswanpas kachamuwaqniypa munaynintan,+ chaymi juzgasqayqa chaninpuni.+
31 ”Sichus kikillaymanta favorniypi imatapas willakuyman chayqa, manan willasqayqa valenmanchu.+
32 Ichaqa kanmi jujpas noqamanta willaqqa, yachanitaqmi paypa willasqanqa cheqaq kasqanta.+
33 ¿Manachu qankuna Juanmanqa runakunata kacharqankichis? Payqa cheqaqtan noqamantaqa willarqan.+
34 Noqaqa manan pipas noqamanta willanantaraqchu necesitani, aswanmi chaykunataqa niykichis qankuna salvasqa kanaykichispaq.
35 Chay runaqa raurashaq k’ancharishaq mechero* jinan karqan, pisi tiempollataqmi qankunaqa k’anchayninpi mayta kusirikuyta munasharqankichis.+
36 Ichaqa noqaq ruwasqayqa Juanpa willasqanmantapas astawanraqmi noqamanta willakun. Noqaqa Taytaypa qomuwasqan ruwaykunatan junt’ashani, chaykunan rikuchin noqaqa janaq pacha Taytaq kachamusqan kasqayta.+
37 Chaymantapas kachamuwaqniy janaq pacha Tayta kikinmi noqamantaqa willanña.+ Qankunaqa manan jayk’aqpas paypa kunkantaqa uyarirqankichischu nitaqmi rijch’aynintapas rikurqankichischu,+
38 manataqmi siminqa sonqoykichispichu kashan, paypa kachamusqanta mana creesqaykichisrayku.
39 ”Qankunaqa Diospa simin qelqatan allinta estudiankichis+ wiñay kausayta tariyta munaspa, ichaqa chay qelqakunallataqmi noqamantaqa willashan.+
40 Chhaynaña kaqtinpas, qankunaqa manan noqaman jamuyta munankichischu+ wiñay kausayta tarinaykichispaq.
41 Noqaqa manan munanichu runakuna jatunchawanantaqa,
42 qankunan ichaqa mana chhaynachu kankichis. Noqaqa allintan yachani Diosta mana munakusqaykichista.
43 Noqaqa Taytaypa sutinpin jamuni, qankunataq ichaqa mana chaskiwankichischu. Ichaqa jujchus pay kikillanmanta jamunman chayqa, chaskiwaqchischá paytaqa.
44 Qankuna kikiykichistaq jatunchanakunkichis, manataq Diospa jatunchaynintachu maskhankichis+ chayqa, ¿imaynapitaq noqatari creewankichisman?
45 Ama piensaychischu janaq pacha Taytaq ñaupanpi qankunata juchachanaypaqqa, kanmi juchachaqniykichisqa, payqa confiasqaykichis Moisesmi.+
46 Moisesta creewaqchis chayqa, noqatapas creewankichismanmi, payqa noqamantan qelqarqan.+
47 Ichaqa manataq paypa qelqasqantapas creenkichischu chayqa, ¿imaynapitaq noqaq nisqaytari creewaqchis?”, nispa.
Uraypi willakuykuna
^ Kay versiculoqa manan rijurinchu Westcott, Hort runakunaq ruwasqanku griego rimay qelqapi nitaq wakin allin reqsisqa qelqakunapipas. Qhaway “Astawan yachanapaq A3” nisqata.
^ Qhaway Explicasqa simikuna nisqapi “Samana p’unchay” nisqata.
^ Griego rimaypiqa “jatarichin” ninmi.
^ Chaypiqa “atiyniyoqmi kausayta qonanpaq” nillanmantaqmi.
^ Griego rimaypiqa “yuyarina sepulturakunapi” ninmi. Qhaway Explicasqa simikuna nisqapi “Yuyarina sepultura” nisqata.
^ Chaypiqa “lámpara” nillanmantaqmi.
