Jueces 10:1-18
10 Abimelecpa wañupusqan qhepamantaq Tolá sutiyoq runata Dios churarqan Israel runakunata librananpaq.+ Payqa Isacar ayllumanta Dodopa nietonmi karqan, Puaq wawan. Tolaqa Efraín orqo-orqopi kaq Samir llaqtapin tiyarqan.
2 Payqa iskay chunka kinsayoq watan juez karqan Israel llaqtapi. Chay qhepamantaq wañukapurqan jinaspa Samir llaqtapi p’ampapurqanku.
3 Chaymantataq Galaadmanta Jairtañataq Diosqa churarqan Israel llaqtapi juez kananpaq, payqa iskay chunka iskayniyoq watan juez karqan.
4 Jairpa churinkunaqa kinsa chunkan karqan, paykunaqa sapankankun juj asnopi sillaykusqa puriqku, sapankankutaqmi juj llaqtayoq karqanku. Chay kinsa chunka llaqtakunatan kunankamapas Avoj-Jaír+ nispa sutichanku, chaykunaqa kashan Galaad jallp’apin.
5 Chaymantataq Jairqa wañukapurqan, jinaspa Camón pampapi p’ampapurqanku.
6 Israel runakunaqa jujmantan Jehová Diospa cheqnisqan ruwaykunata ruwallarqankutaq.+ Jehová Diosta saqespan paykunaqa Baal idolokunata,+ Astoret idolokunata, Aram* lado dioskunata, Sidón runakunaq diosninkunata, Moab runakunaq diosninkunata,+ Anmón runakunaq diosninkunata,+ Filistea runakunaq diosninkunata+ ima adorayta qallarirqanku.
7 Chaywanmi Jehová Diosqa sinchita phiñakurqan Israel runakunapaq, jinan Filistea runakunaq Anmón runakunaq makinman saqerparirqan.+
8 Chay watamantapachan chay runakunaqa Israel runakunata nishuta ñak’arichirqanku. Chunka pusaqniyoq watan Jordán mayuq inti lloqsimuy ladonpi tiyaq llapa Israel runakunata ñak’arichirqanku. Chay ladopi Galaad jallp’akunaqa amorreo runakunaq jallp’anmi ñaupaqqa karqan.
9 Chaymantapas Anmón runakunaqa Jordán mayutan chimpamuqku, jinaspan Judá ayllu runakunawan, Benjamín ayllu runakunawan, Efraín ayllu runakunawan ima maqanakuqku. Chaywanmi Israel runakunaqa sinchi nanaypi tarikusharqanku.
10 Jinan Israel runakunaqa Jehová Diospa yanapayninta anchata mañakurqanku:+ “Diosniyku, qan contran juchallikuyku, qanta saqespan Baal idolokunata adorarqayku”,+ nispa.
11 Jehová Diosmi ichaqa Israel runakunata nirqan: “¿Manachu noqa librarqaykichis Egipto runakunamanta,+ amorreo runakunamanta,+ Anmón runakunamanta, Filistea runakunamanta,+
12 Sidón runakunamanta, Amalec runakunamanta, Madián runakunamantapas? Yanapanaypaq wajakamuqtiykichisqa, noqamá riki chay runakunaq makinmantaqa librarqaykichis.
13 Qankunataq ichaqa noqata saqerpariwaspaykichis waj dioskunata adorashankichis,+ kunanqa manan jujmantaqa librasaykichisñachu.+
14 Phawayyá chay diosniykichiskunata valekamuychis.+ Awer librasunkichischus khaynapi tarikusqaykichismanta”,+ nispa.
15 Jinan Israel runakunaqa Jehová Diosta nirqanku: “Qan contran juchallikuyku, noqaykuwan ima munasqaykitapas ruway. Ichaqa jinatayá kay kutillatawan libraykuwayku”, nispa.
16 Chaymantataq Israel runakunaqa waj dioskunata wijch’upuspa jujmanta Jehová Diosta adorayta qallarirqanku.+ Diosqa sinchitan llakikurqan Israel runakunaq ñak’arisqanta rikuspa.*+
17 Tiempowantaq Anmón runakunaqa+ juñukuspanku Galaad jallp’api karpakurqanku. Jinallataq Israel runakunapas juñukuspa Mizpá llaqtapi karpakurqanku.
18 Jinan Galaad jallp’a runakunapas umallikunapas paykunapura ninakurqanku: “¿Pin umalliwasunman Anmón runakunawan maqanakunanchispaq?+ Chay runa Galaad jallp’api llapa runakunaq umallin kachun”, nispa.
Uraypi willakuykuna
^ Chaypiqa “Siria” nillanmantaqmi.
^ Chaypiqa “manañan aguantakurqanchu Israel runakunaq sufrisqanta rikuspa” nillanmantaqmi.
