Jueces 12:1-15
12 Efraín runakunan llapanku juñukuspanku Zafón llaqtaman chimparqanku, jinaspa Jefteta nirqanku: “¿Imaraykun mana willamuwarqankikuchu Anmón runakunawan maqanakuq rishaspayki?+ Kunanmi qantawan kuskata wasiykita ninawan kanasaqku”, nispa.
2 Jeftetaq nirqan: “Anmón runakunawan sinchi problemapi kashaqtiykuqa, willamushaykichismá riki, acaso qankuna libraqniyku jamushankichischu.
3 Chaymi mana jamuqtiykichis noqallaña wañuytapas mana manchakuspa Anmón runakunawan maqanakuq lloqsirqani.+ Noqaqa Jehová Diospa yanapayninwanmi paykunataqa atipamuni. ¿Chaychu qankuna noqawan maqanakuq jamushankichis?”, nispa.
4 Chaymantataq Jefteqa Galaad runakunata+ juñuspa Efraín runakunawan maqanakurqanku. Jinan Galaad runakunaqa atiparqanku Efraín runakunata. Efraín runakunan nisqaku: “Efraín ayllupi Manasés ayllupi tiyaq Galaad runakunaqa Efraín ayllumanta forastero runakunallan kanku”, nispa.
5 Manaraq Efraín runakuna Jordán mayu chimpanakunaman chayashaqtinkun, Galaad runakunaqa chaypiña kasharqanku.+ Jinan Efraín runakunaqa ayqekuyta munaspa niqku: “Pasachiwayku”, nispa. Galaad runakunataq sapankata tapuqku: “¿Efraín ayllumantachu kanki?”, nispa. “¡Manan!” niqtinkutaq,
6 Galaad runakunaqa paykunata niqku: “Shibolej nispa niy”, nispa. Efraín runakunataq mana chhaynata rimayta atispanku Sibolej niqku. Paykunatan jap’ispa Jordán mayu chimpanakunapi wañuchirqanku. Chay kutiqa tawa chunka iskayniyoq waranqa Efraín runakunatan wañuchirqanku.
7 Jefteqa soqta watan Israel llaqtapi juez karqan, wañukapuqtintaq Galaad jallp’api kaq llaqtanpi p’ampapurqanku.
8 Jeftepa qhepanmanqa Belén llaqtayoq Ifzanñataqmi Israel llaqtapi juez karqan.+
9 Paypa qhari wawankunan karqan kinsa chunka, warmi wawankunapas kinsa chunkallataqmi karqan. Ususinkunataqa manan ayllunmanta qharikunawanchu casarachirqan, qhari wawankunapaqpas kinsa chunka warmikunatan pusamurqan casarachinanpaq. Ifzanqa qanchis watan Israel llaqtapi juez karqan.
10 Chaymantataq Ifzanqa wañukapurqan, jinaspa Belén llaqtapi p’ampapurqanku.
11 Ifzanpa qhepanmanqa Zabulón ayllumanta Elonñataqmi Israel llaqtapi juez karqan. Payqa chunka watan juez karqan.
12 Chaymantataq Elonpas wañukapullarqantaq, paytaqa Zabulón ayllupi kaq Ayalón llaqtapin p’ampapurqanku.
13 Elonpa qhepanmantaq Piratón llaqtamanta Hilelpa churin Afdón Israel llaqtapi juez karqan.
14 Paypa churinkunan karqan tawa chunka, nietonkunataq kinsa chunka. Sapankankun juj asnopi sillaykusqa puriqku. Afdonqa pusaq watan Israel llaqtapi juez karqan.
15 Chaymantataq Piratón llaqtamanta Hilelpa churin Afdonqa wañukapurqan jinaspa Piratón llaqtapi p’ampapurqanku. Chayqa Efraín ayllupin kashan, Amalec runakunaq ñaupa tiempopi tiyasqan orqopi.+
