Jueces 13:1-25
13 Israel runakunaqa jujmantan Jehová Diospa cheqnisqan ruwaykunata ruwallarqankutaq.+ Chaymi Jehová Diosqa Filistea runakunaq makinman saqerparirqan.+ Jinan Filistea runakunaqa tawa chunka wata sufrichirqanku.
2 Chay tiempopin kausarqan Manóa+ sutiyoq runa, payqa Dan ayllupi+ kaq Zorá+ llaqtamantan karqan. Paypa esposanqa manan atirqanchu wawayoq kayta.+
3 Juj p’unchaymi Jehová Diospa angelnin chay warmiman rijurirqan, jinaspa nirqan: “Manaña atinkichu wawayoq kayta chaypas, kunanqa onqoqmi rijurinki jinaspa qhari wawata onqokunki.+
4 Ichaqa aman vinotapas ni ima machachikuq ujanatapas tomankichu,+ amallataq ima qhelli kaqtapas mijunkichu.+
5 Nisqay jina, onqoqmi rijurinki jinaspa qhari wawata onqokunki. Aman chay wawaq chujchantaqa rutuchinkichu,+ payqa nacesqanmantapachan Diospaq t’aqasqa nazareo* runa kanqa. Paymi Israel runakunata libranqa Filistea runakunaq makinmanta”,+ nispa.
6 Jinan chay warmiqa qosanman rispa willarqan: “Diospa kachamusqan runawanmi tupamuni, payqa Diospa angelnin jinan kasqa admiranapaq jinaraq. Manan tapusqanichu maymanta jamusqanta, manataqmi sutintapas willawanchu.+
7 Paymi nimuwan: Onqoq rijurispan qhari wawata onqokapunki. Ichaqa aman vinotapas ni ima machachikuq ujanatapas tomankichu, amallataq ima qhelli kaqtapas mijunkichu. Onqokusqayki wawaqa nacesqanmanta wañunankaman Diospaq t’aqasqa nazareo runa kanqa, nispa”.
8 Jinan Manoaqa Jehová Diosta valekurqan: “Disculpaykuway Jehová Diosníy. ¿Manachu kachamusqayki runata jujmanta kachamuwankikuman? Chay naceq wawawan imatachus ruwasaqku chayta willaykuwanankutan munayku”, nispa.
9 Diosqa uyarirqanmi Manoaq mañakusqanta, jinan esposan campopi tiyashaqtin Diospa angelnin jujmanta payman rijurirqan, qosan Manoaqa manan chaypichu kasharqan.
10 Jinan chay warmiqa qosanman usqhaylla rispa willarqan: “Qayninpa willasharqayki chay runan jujmanta rijuriwallantaq”,+ nispa.
11 Jinan Manoaqa jatarispa esposanwan kuska rirqan maypichus chay runa kasharqan chayman, jinaspa tapurqan: “¿Qanchu kashanki esposaywan rimaq runa?”, nispa. Jinan payqa nirqan: “Arí, noqan kashani”, nispa.
12 Manoataq nirqan: “¡Nisqaykiman jina ruwakuchun! Ichaqa, ¿imaynan chay wawa kanqa? ¿Imatan ruwanqa?”,+ nispa.
13 Jehová Diospa angelnintaq Manoata nirqan: “Esposaykimanqa ñan willarqaniña, chayllata kasukuchun.+
14 Aman payqa uvastapas ni uvasmanta ima ruwasqatapas mijunqachu, aman vinotapas ni ima machachikuq ujanatapas tomanqachu,+ amallataq ima qhelli kaqtapas mijunqachu.+ Kamachisqayman jinan tukuy imatapas ruwanqa”, nispa.
15 Chaymantataq Manoaqa Jehová Diospa angelninta nirqan: “Amaraq ripuychu, suyariwayku. Juj malta cabrachallatapas preparapusaykiku”,+ nispa.
16 Jehová Diospa angelnintaq nirqan: “Qhepakuymanña chaypas manan mijunaykitaqa mijusaqchu. Munankipuni chayqa Jehová Diosman aswanpas ruphachina ofrendaykita jayway”, nispa. Manoaqa manan yacharqanchu chay runa Jehová Diospa angelnin kasqanta.
17 Manoataq Jehová Diospa angelninta nirqan: “Sutiykita willawayku,+ chhaynapi simiyki junt’akuqtin jatunchanaykupaq”, nispa.
18 Jehová Diospa angelninmi ichaqa nirqan: “¿Imaraykun sutiyta tapuwanki? Sutiyqa ancha admiranapaqmi”, nispa.
19 Chaymantataq Manoaqa malta cabrachata jak’u ofrendatawan qaqa patapi Jehová Diosman jaywarqan. Chayllamanmi Diosqa Manoaq rikushasqan esposanpa rikushasqan ima admiranapaq ruwayta ruwarqan.
20 Altar patapi nina raurashaqtinmi, Manoawan esposanpiwan rikurqanku Jehová Diospa angelnin nina rauray sonqopi janaq pachaman seqapushaqta. Jinan paykunaqa pampakama k’umuykurqanku.
21 Chaywanmi Manoaqa yacharqan chay runa Jehová Diospa angelnin kasqanta.+ Chaymantaqa manañan Jehová Diospa angelninqa paykunaman rijurirqanñachu.
22 Manoataq esposanta nirqan: “Ay kunanqa wañupusunchá, Diostamá rikurunchis riki”,+ nispa.
23 Esposantaq ichaqa nirqan: “Jehová Dioschus wañuchiyta munawasunman karqan chayqa, manachá chaskiwasunmanchu karqan ruphachina ofrendanchistapas+ ni jak’u ofrendanchistapas. Chaymantapas manachá rikuchiwasunmanchu karqan imakunachus rikusqanchistapas nitaq imatapas willachiwasunmanchu karqan”, nispa.
24 Qhepamantaq chay warmiqa juj qhari wawata onqokurqan, paytan suticharqan Sansón+ nispa. Wiñasqanman jinan Jehová Diosqa chay wawata bendecirqan.
25 Tiempowanmi Jehová Diospa espiritunqa Sansonta kallpacharqan llaqtanta defiendenanpaq,+ chay tiempopin payqa kasharqan Zorá llaqtawan Estaol llaqtawan+ tupaypi kaq Majané-Dan+ nisqapi.
