Jueces 14:1-20
14 Juj kutinmi Sansonqa Timná llaqtata jaykurqan, chaypin rikurqan juj Filistea warmita.
2 Jinaspan tayta-mamanpa kasqanman kutimuspa paykunata nirqan: “Timná llaqtapin rikumuni juj Filistea warmita, paymi sonqoyta suwaramuwan. ¿Manachu payta pusamuwankichisman casarakunaypaq?”, nispa.
3 Tayta-mamanmi ichaqa nirqan: “¿Manachu familianchismanta llaqtanchis ukhumanta warmita munakuwaq?+ ¿Imaraykutaq Diosta mana serviq* runakunaq wawantari munakuwaq?”, nispa. Sansontaq papanta nirqan: “Pusamuwaychispuni, paytapunin munakuni”, nispa.
4 Tayta-mamanqa manan repararqanchu Jehová Diosmanta chay jamusqanta, payqa imaymanatan ruwasharqan Filistea runakuna contra jatarinanpaq. Chay runakunan Israel runakunata ñak’arichisharqanku.+
5 Jinan Sansonqa tayta-mamanwan kuska Timná llaqtata jaykurqan. Timná llaqtapi uvas chajra-chajraman chayaqtinmi juj león* qaparispa payman phawaykurqan.
6 Chay ratun Jehová Diospa espiritunqa Sansonman junt’aykurqan,+ jinan payqa juj malta cabrachata jina chay leonta makillanwan iskayman llik’irparirqan. Chay ruwasqantaqa manan willarqanchu tayta-mamanmanqa.
7 Chaymantataq Sansonqa Timná llaqtaman jaykuspa chay warmiwan parlamurqan, payqa chay warmillatapunin munasharqan.+
8 P’unchaykuna pasaqtintaq Sansonqa chay warmiq kasqanman kutiykurqan wasinman pusakapunanpaq.+ Chayman jaykushaspan wañuchisqan leonta qhawaq muyuykurqan. Chay wañusqa león ukhupin miel kashasqa abejakunapas askhan kashasqa.
9 Jinan Sansonqa chay miel misk’ita orqospa chayta mijun-mijun ripurqan. Tayta-mamanman ayparuspataq paykunamanpas chayta malliyachirqan, ichaqa manan willarqanchu chay mielta wañusqa leonmanta orqomusqanta.
10 Chaymantapachan Sansonqa papanwan kuska chay warmiq kasqanman jaykurqan. Chaypin payqa jatun fiestata ruwachirqan, chhaynatapunin waynakunaqa ruwaqku.
11 Chayta rikuspan runakunaqa payta compañanankupaq kinsa chunka runakunata pusamurqanku.
12 Chaypin Sansonqa chay runakunata nirqan: “Kunanmi juj adivinanzata ruwarisaykichis. Sichus kay qanchis p’unchay ukhupi manaraq fiesta tukushaqtin sut’inchankichis chayqa kinsa chunka lino p’achata, kinsa chunka allin p’achatawanmi qosaykichis.
13 Manachus sut’inchayta atinkichis chayqa qankunan kinsa chunka lino p’achata, kinsa chunka allin p’achatawan qowankichis”, nispa. Jinan paykunaqa nirqanku: “Niwayku chay adivinanzata”, nispa.
14 Chaymi Sansonqa paykunata nirqan:
“Imasmari, imasmari, mijuqmantan mijuna lloqsimun,kallpasapamantan misk’i lloqsimun,+¿iman chay kanman?”, nispa.
Paykunaqa kinsa p’unchayñan mana imaniyta atisharqankuchu.
15 Jinan tawa kaq p’unchayqa Sansonpa esposanta* nirqanku: “Qosaykita engañollawan rimarachiy+ chay adivinanza imaninanchus chayta, mana chayqa qantawan papaykiq wasinpi kaqkunatawanmi ninawan kanasaykiku. Icha, ¿kaqniykuta qechuwanaykikupaqchu kayman invitamuwarqankiku?”, nispa.
16 Jinan Sansonpa esposanqa waqaspa Sansonta nirqan: “Qanqa cheqnikuwankin, manan munakuwankichu.+ Llaqtamasiykunamanmi juj adivinanzata nirusqanki. ¡Willaway! ¿Imaninanmi chay adivinanza?”, nispa. Chayta uyarispan Sansonqa nirqan: “Manan papaymanpas ni mamaymanpas willanichu, chaychu qanman willaykiman”, nispa.
17 Payqa waqashallarqanmi fiesta tukunan p’unchaykama. Chaymi qanchis kaq p’unchaypi Sansonqa manaña aguantayta atispa willarqan imaninanchus chay adivinanza chayta. Jinan chay warmiqa llaqtamasinkunaman chayta willarqan.+
18 Qanchis kaq p’unchaypi manaraq inti jaykupushaqtintaq chay runakunaqa Sansonta nirqanku:
“¿Iman mielmanta aswan misk’i kanman?
¿Iman leonmanta aswan kallpasapa kanman?”,+ nispa.
Sansontaq nirqan:
“Manachus malta wakachayta llank’achiwaqchis karqan chayqa,+manan sut’inchayta atiwaqchischu karqan”, nispa.
19 Jehová Diospa espiritun junt’aykuqtinmi+ Sansonqa Asquelón+ llaqtaman jaykurqan, chaypin kinsa chunka runakunata wañuchirqan jinaspa p’achankuta qechurqan, chay p’achakunatan adivinanzata sut’inchaqkunaman qorqan.+ Chaymantataq sinchi phiñasqa tayta-mamanpa wasinman kutirqan.
20 Sansonpa esposantataq+ fiestapi compañaqnin runakunamanta jujninwan casarachipurqanku.+
Uraypi willakuykuna
^ Hebreo rimaypiqa “qhari kaynin qaracha mana kuchusqa” ninmi.
^ Chaypiqa “malta león” nillanmantaqmi.
^ Hebreo runakunaqa rimanakusqanku warmitaqa esposankuta jinañan qhawariqku, rimanakusqanku qharitapas qosankuta jinañan qhawariqku.
