Jueces 18:1-31
18 Chay tiempopiqa manan Israel llaqtapi rey karqanchu.+ Chay tiempopin Dan ayllumanta runakunapas+ tiyanankupaq jallp’ata maskhaspa purisharqanku. Paykunaqa manaraqmi junt’asqatachu herenciata chaskirqanku.+
2 Jinan Dan ayllu runakunaqa Zorá llaqtamanta Estaol llaqtamantawan+ chaypaq jina pisqa allin runakunata ajllarqanku. Paykunatan kacharqanku jallp’a qhawaqta, nirqankun: “Phawaychis, lliupi jallp’ata allinta qhawamuychis”, nispa. Efraín orqo-orqoman chayaspan chay runakunaqa Miqueaspa+ wasinpi alojakurqanku.
3 Miqueaspa wasinpa qayllallanpiraq kashaspan uyarirqanku Leví ayllumanta waynaq kunkanta, jinan payman asuykuspa tapurqanku: “¿Pin kayman pusamurqasunki? ¿Imatan kaypi ruwashanki? ¿Imaraykun kaypi qhepakapurqanki?”, nispa.
4 Jinan payqa willakurqan imakunatachus Miqueas paypaq ruwarqan chayta, chaymantataq nirqan: “Paymi contratawan sacerdoten kanaypaq”,+ nispa.
5 Paykunataq valekurqanku: “Ama jinachu kay, Diosta tapuykapuwayku allinchus kay viajeyku kanqa icha manachus chayta”, nispa.
6 Chay sacerdotetaq nirqan: “Rillaychis, ama llakikuychischu. Jehová Diosqa qankunawanmi kashan”, nispa.
7 Chaymantataq chay pisqantin runakunaqa Lais+ llaqtaman chayarqanku. Chay llaqtapi runakunaqa Sidón llaqta runakuna jinan mana piqpa kamachisqan tiyarqanku. Paykunaqa manan imamantapas llakikuqkuchu,+ manataqmi pipas muyupayaqchu llaqtankuta qechuyta munaspapas. Chaymantapas paykunaqa Sidón llaqtamanta karupin kasharqanku, manataqmi muyuriqninpi llaqtakunawanqa rimanakuqkuchu.
8 Kutimuqtinkutaq, Zorá llaqtamanta Estaol llaqtamantawan+ llaqtamasinkunaqa paykunata tapurqanku: “¿Kasqachu jallp’a icha manachu?”, nispa.
9 Paykunataq nirqanku: “Rikumusqayku jallp’aqa allinpunin kashan, jaku chaypi tiyaq runakunawan maqanakamusun. Ama iskayaychischu. Jaku, qechumullasunña chay jallp’ata.
10 Chayman chayaspañan rikunkichis imaynachus chay runakunaqa mana imamantapas llakikuspa tiyanku chayta.+ Chaymantapas chay jallp’aqa jatunpunin, manan imapas faltanchu, Diosqa qowasunpunin chay jallp’ataqa”,+ nispa.
11 Jinan Dan ayllupi kaq Zorá llaqtamanta Estaol llaqtamantawan+ soqta pachaj qharikuna lloqsimurqanku. Paykunaqa llapankun guerrapaq armasqa kasharqanku.
12 Judá ayllupi Quiryaj-Jearin llaqta qayllaman chayaspankun paykunaqa chaypi karpakurqanku, chayqa kasharqan Quiryaj-Jearin+ llaqtaq inti jaykuy ladonpin. Chaymi chay parteta kunan p’unchaykama Majané-Dan*+ nispa sutichanku.
13 Chaymanta puririspankutaq Efraín orqo-orqopi Miqueaspa+ wasinman chayarqanku.
14 Jinan Lais+ llaqtata qhawamuq pisqantin runakunaqa wakin Dan ayllu runakunata nirqanku: “Kay wasipin kashan juj sacerdote unku,* terafim* idolokuna, qolqemanta ruwasqa iskay idolokunapiwan.+ ¿Imaninkichismi? ¿Imatan chaykunawan ruwasunchis?”, nispa.
15 Chaymantataq chay pisqantin runakunaqa Miqueaspa wasinpi Leví ayllumanta waynaq tiyasqan wasiman rirqanku,+ paytan nirqanku: “¿Imaynallan kashanki?”, nispa.
16 Chaykamataq soqta pachajnintin Dan ayllumanta+ armasqa runakunaqa punkullapi sayasharqanku.
17 Jinamantaq jallp’ata qhawamuq pisqantin runakunaqa+ sacerdote unkuta,+ terafim idolokunata,+ qolqemanta ruwasqa iskay idolokunatawan+ orqomuq jaykurqanku. (Sacerdoteqa+ soqta pachajnintin armasqa runakunawan kuskan punku jaykunapi kasharqan).
18 Jinaspa Miqueaspa wasin ukhuman jaykuspa, sacerdote unkuta, terafim idolokunata, qolqemanta ruwasqa iskay idolokunatawan oqarisharqanku. Chayta rikuspan sacerdoteqa paykunata nirqan: “¿Imatan ruwashankichis?”, nispa.
19 Paykunataq nirqanku: “¡Upallay! Ch’inlla kay. Jaku aswan noqaykuwan riy. Qanmi kanki yuyaychawaqniyku* sacerdoteykupas. ¿Imataq qanpaq aswan allin kanman? ¿Juj runallapaq sacerdote kaychu,+ icha Israelpi jujnin ayllupaq sacerdote kaychu?”,+ nispa.
20 Chay sacerdotetaq allinmi kanman nispa unkuta, terafim idolokunata, qolqemanta ruwasqa jujnin idolotawan+ aparikuspa paykunawan kuska ripurqan.
21 Chaymantataq chay runakunaqa jujmanta puriripurqanku, wawankunapas uywankunapas paykunaq ñaupankutan risharqanku, kaqninkunatapas ñaupankutan apasharqanku.
22 Dan ayllu runakunaqa karupiñan kasharqanku Miqueaswan wasimasinkunapiwan aypanankupaq lloqsiqtinkuqa. Ichaqa ayparqankun.
23 Paykuna wajariqtinkun Dan ayllu runakunaqa qhepaman qhawarispa Miqueasta nimurqanku: “¿Imananmi? ¿Imapaqmi khaytukuy runakunata juñuramunki?”, nispa.
24 Jinan Miqueasqa nirqan: “Ruwakusqay dioskunatapas aparikamuspachu, sacerdoteytapas pusarikamuspachu, ¿iman pasan niwankichisraqtaq? ¿Imawanmi noqa qhepakusaq?”, nispa.
25 Dan ayllu runakunataq nirqanku: “Aman chhaynata rimapayamushawankikuchu, chaytaq phiñasqa runakuna qanman phawaykuspa familiaykitawan kuskata wañurachisunkikuman”, nispa.
26 Chaymi Miqueasqa Dan ayllu runakuna aswan kallpasapa kasqankuta reparaspa wasinman kutipurqan. Dan ayllu runakunataq maymanchus rinankuman ripurqanku.
27 Miqueaspa ruwakusqan idolokunata, sacerdotentawan aparikuspan paykunaqa Lais+ llaqtaman rirqanku. Chay llaqtapi runakunaqa mana imamanta llakikuspan tiyaqku.+ Chay runakunatan Dan ayllu runakunaqa espadawan wañuchirqanku, llaqtankutapas lliutan ninawan kanapurqanku.
28 Manan pipas chay llaqtata libraq karqanchu, Sidón llaqtapas karupiraqmi kasharqan. Chaymantapas Lais llaqtaqa Bej-Reofpi+ kaq wayq’opin kasharqan, manataqmi chay llaqta runakunaqa muyuriqninpi llaqtakunawanpas rimanakuqkuchu. Chay qhepamantaq Dan ayllu runakunaqa chay llaqtata jujmanta jatarichipurqanku, jinaspa chaypi tiyapurqanku.
29 Dan ayllu runakunaqa ñaupa taytankuq sutinwanmi Dan nispa chay Lais llaqtata suticharqanku.+ Danqa Israelpa churinmi karqan.+
30 Chaymantataq Dan ayllu runakunaqa apasqanku qolqemanta ruwasqa idolota+ chay llaqtapi sayachirqanku. Jinaspa Moisespa churin Guersompa+ familianmanta jamuq Jonatanta+ sacerdote kananpaq churarqanku. Jonatanmanta jamuq runakunan sacerdote karqanku llapa llaqtantin karu llaqtaman apasqa kanankukama.
31 Chhaynapin Miqueaspa qolqemanta ruwasqan idoloqa Dan runakuna ukhupi kasharqan. Chay idolotan paykunaqa yupaycharqanku Diospa rimanakuynin arca* tukuy tiempo Siló llaqtapi kashaqtin.+
Uraypi willakuykuna
^ Majané-Dan sutiqa “Danpa karpankuna” ninantan nin.
^ Unkuqa jatun suéter otaq chaleco jinan karqan. Qhaway “Astawan yachanapaq B5” nisqata.
^ Chaypiqa “taytayku” nillanmantaqmi.
^ Qhaway Explicasqa simikuna nisqapi “Rimanakuy arca” nisqata.
