Jueces 21:1-25
-
Benjamín ayllu salvasqa kasqanmanta (1-25)
21 Israel runakunaqa Mizpá+ llaqtallapiraq kashaspankun jurasqaku: “Aman mayqenninchispas Benjamín ayllu runakunawanqa ususinchista casarachisunchu”,+ nispa.
2 Chaymantataq Israel runakunaqa Betel llaqtaman rispanku+ Diospa ñaupanpi tiyaykurqanku, chaypin tutayanankama khuyayta waqaykurqanku.
3 Paykunan waqaykuspa nirqanku: “Diosniyku Jehová, Israel llaqtaq Diosnin, ¿imaraykutaq kayri pasawanku? ¿Imaraykutaq Israel llaqtapiri juj ayllu chinkanman?”, nispa.
4 Qhepantin p’unchaytaq Israel runakunaqa tutallamanta jatarispanku juj altarta chaypi perqarqanku ruphachina ofrendata sumaq kausay ofrendatawan+ jaywanankupaq.
5 Chaymantataq Israel runakunaqa ninakurqanku: “¿Pikunan mana rirqankuchu Mizpá llaqtapi Jehová Diospa ñaupanpi juñukushaqtinchis?”, nispa. Paykunan Mizpá llaqtapi juj juramentota ruwasqaku: “Pipas Jehová Diospa ñaupanman mana jamuqqa wañuchisqan kanqa”, nispa.
6 Israel runakunaqa sinchi llakisqan kasharqanku wayqenku Benjamín ayllumanta. Chaymi ninakurqanku: “Israel llaqtapin juj ayllu chinkachisqa kapun.
7 Jehová Diospa sutinpitaq juranchis+ ususinchiskunata ama paykunawan casarachinanchispaq+ chayqa, ¿maymantan kunan puchuq Benjamín ayllu runakunapaq warmita pusamusun?”, nispa.
8 Chaymantataq tapunakurqanku: “Mizpá llaqtapi juñukushaqtinchis,+ ¿pikunan mana jamurqanchu Jehová Diospa ñaupanman?”, nispa. Chaypin yacharqanku Jabés-Galaad llaqtamanta mana ni juj runapas jamusqanta.
9 Jamuqkunata yupaqtinkun Jabés-Galaad llaqtamanta mana ch’ullapas kasqachu.
10 Jinan Israel runakunaqa Jabés-Galaad llaqtaman kacharqanku chunka iskayniyoq waranqa allin kallpasapa soldadokunata. Paykunatan kamachirqanku: “Phawaychis Jabés-Galaad llaqta runakunata espadawan wañuchimuychis, aman saqenkichischu warmikunatapas ni wawakunatapas.+
11 Wañuchispaykichisqa llapa qharikunata, qhariwan puñuq llapa warmikunata iman wañuchimunkichis”, nispa.
12 Jabés-Galaad llaqtaman chayaspankutaq tawa pachaj mana pi qhariwan kaq sipas warmikunata tarirqanku, paykunatan Canaán jallp’aman apamurqanku, Siló+ llaqtapi karpakusqankuman.
13 Chaymantataq Israel runakunaqa Rimón qaqa-qaqapi+ kaq Benjamín ayllu runakunaman willachimurqanku thajpi kausanankupaq.
14 Chaymi Benjamín ayllu runakunaqa kutimpurqanku, Israel runakunataq Jabés-Galaad llaqtamanta pusamusqanku warmikunata paykunaman qorqanku,+ ichaqa manan llapankupaqchu ayparqan.
15 Israel runakunaqa llakisqan kasharqanku Benjamín aylluwan imachus pasasqanmanta.+ Chay ayllutan Jehová Diosqa wakin ayllukunamanta t’aqarqan.
16 Israel llaqtapi umalliqkunan* ninakurqanku: “Manataq Benjamín ayllupi ch’ulla warmipas qhepanchu chayqa, ¿maymantataq warmikunatari pusamusun puchuq Benjamín ayllu runakunapaq?”, nispa.
17 Jinan wakin umalliqkunaqa nirqanku. “Benjamín aylluqa manan Israelmanta chinkanmanchu, puchuq runakunayá jujmanta herenciankuta sayarichichunku.
18 Ichaqa manapunin noqanchisqa paykunamanqa ususinchista qoyta atisunmanchu. Ñamá riki jurarqanchisña pipas Benjamín ayllu runakunawan ususinta casarachiqqa ñakasqa kananpaq”,+ nispa.
19 Jinaspa nirqanku: “Yachasqaykichis jina, sapa watanmi Betel llaqtaq wichay ladonpi kaq Siló+ llaqtapi Jehová Diospaq fiestata ruwakun. Chay llaqtaqa Betel llaqtamanta Shejen llaqtaman riq jatun ñanpa inti lloqsimuy ladonpin kashan, Leboná llaqtaq uray ladonpi”, nispa.
20 Chaymantataq Benjamín ayllu runakunata kamachirqanku: “Phawaychis uvas chajra-chajrapi pakakamuychis, jinaspa makilla kashankichis.
21 Siló llaqtamanta sipaskuna rondapi tusuykuspa jamushaqtinkutaq qankunaqa pakakusqaykichismanta lloqsimunkichis, jinaspa sapankaykichis juj sipasta esposaykichispaq apakunkichis, chaymantataq llaqtaykichisman kutipunkichis.
22 Chay sipaskunaq taytankuchus otaq turankunachus quejakuspa jamunqaku chayqa, noqaykuña paykunata nisaqku: Khuyapayaychis chay Benjamín ayllu runakunata, manan llapankupaqchu guerraman risqaykupi warmita tarimuyku.+ Chaymantapas manamá qankunapunichu riki ususiykichistaqa qoshankichis. Qankunaqa manan imamantapas juchayoqchu kankichis,+ nispa”.
23 Jinan Benjamín ayllu runakunaqa kamachisqa kasqankuman jina ruwarqanku. Sapankankun tusushaq sipaskunamanta jujta aparqanku esposanku kananpaq. Chaymantataq herencia chaskisqanku jallp’aman kutipurqanku, jinaspa llaqtakunata jujmanta sayarichispa+ chaypi tiyapurqanku.
24 Chay qhepamantaq Israel runakunaqa sapankanku ayllunkuman familiankuman kutipurqanku, llapankun herencia chaskisqanku jallp’aman kutipurqanku.
25 Chay tiempopiqa manan Israel llaqtapiqa rey karqanchu.+ Runakunaqa sapankankun imatachus allinpaq qhawarisqankuman jina imatapas ruwaqku.
Uraypi willakuykuna
^ Chaypiqa “kuraq runakunan” nillanmantaqmi.
