Jueces 7:1-25
7 Jinan Jerubaal nisqa Gedeonqa+ tutallamanta llapa soldadokunantin puririrqan, jinaspa Aroj pujyu-pujyupi karpakurqanku. Madián runakunaqa paykunaq wichay ladonpin karpakusharqanku, Moré moqoq uran wayq’o pampapi.
2 Chaypin Jehová Diosqa Gedeonta nirqan: “Askhan runaykikuna kashan Madián runakunata qankunaman qonaypaqqa.+ Paqtapas Israel runakuna jatunchakuspa ninkuman: Kallpaykuwanmi atipamuyku,+ nispanku.
3 Chayrayku llapa runakunata nimuy: Pipas manchakuymanta khatatatashanraq* chayqa, wasiman kutipuchunku,+ nispa”. Diospa nisqanta Gedeón niqtinmi iskay chunka iskayniyoq waranqa runakuna kutipurqanku, chunka waranqallañan qhepakurqanku.
4 Chaymantan Jehová Diosqa Gedeonta nillarqantaq: “Askharaqmi soldadokunaqa kashan, unuman pusaykuy, chaypin ajllapusayki. Mayqentachus nisaq: Paymi qanwan rinqa, nispa chayqa, chaytan pusanki. Mayqentachus nisaq: Payqa manan rinqachu, nispa chayqa, aman pusankichu”, nispa.
5 Jinan Gedeonqa llapa runakunata unuman pusaykurqan.
Chaypin Jehová Diosqa Gedeonta nirqan: “Makillankuwan unu tomaqkunata* juj ladoman ajllanki, qonqorikuspa tomaqkunatataq juj ladoman ajllanki”, nispa.
6 Makillankuwan unuta tomaqkunaqa kinsa pachajmi karqanku, wakintaq ichaqa qonqorikuspa unuta tomarqanku.
7 Jinan Jehová Diosqa Gedeonta nirqan: “Makillankuwan unuta tomaq kinsa pachaj runakunawanmi qankunata salvasaykichis, Madián runakunatapas entregasayki.+ Wakin soldadokunaqa wasinkuman kutipuchunku”, nispa.
8 Gedeonqa kutipuq soldadokunaq qoqawankuta oveja waqrankunatawan qochikuspan paykunata wasinkuman kachapurqan, kinsa pachaj soldadokunallawanñan qhepakurqan. Madián runakunaqa paykunaq uran wayq’o pampapin karpakusharqanku.+
9 Chay tutan Jehová Diosqa Gedeonta nirqan: “¡Jatariy! Madián runakunaq karpanman phawaykuy, qanmanmi paykunata entregayki.+
10 Sichus manchakushanki chayqa, yanapaqniyki Purá runawan jaykuy chay karpa-karpaman.
11 Uyarimuy imatachus rimashanku chayta, chhaynapin kallpata jap’inki chay runakunawan maqanakunaykipaq”, nispa. Jinan Gedeonqa yanapaqnin Purá runawan jaykurqan Madián runakunaq karpakusqan qayllaman.
12 Madián runakunawan, Amalec runakunawan, inti lloqsimuy ladomanta runakunawanqa,+ langosta* jinaraqmi chay wayq’o pampata junt’aykurqanku. Camellonkupas lamar-qocha patapi aqo jinaraqmi mana yupay atiyraq karqan.+
13 Madián runakunaq karpakusqanman Gedeón chayananpaqmi juj runa compañeronman mosqokusqanta willakushasqa: “Mosqoyniypin juj jatun cebada t’anta phawamushasqa. Jinan chay t’antaqa juj karpaman chayasqa, chay karpaman chocaspan lliuta chay karpata t’ijrapusqa”,+ nispa.
14 Chayta uyarispan compañeronqa nirqan: “Chayqa Israel runa Joaspa churin Gedeonpa espadanpunin kanman.+ Diosmi paypa makinman entregawasun”,+ nispa.
15 Chayta uyarispan+ Gedeonqa qonqorikuspa Diosta adorarqan. Chaymantataq karpakusqankuman kutimuspa Israel runakunata nirqan: “¡Jatariychis! Jehová Diosmi Madián runakunata entregawasunchis”, nispa.
16 Jinaspan Gedeonqa chay kinsa pachaj runakunata kinsaman t’aqarqan, sapanka runamantaq qorqan oveja waqrata,+ jatun p’uyñuta, p’uyñu ukhupi nina k’anchaytawan.
17 Chaymantataq paykunata nirqan: “Karpa-karpaman chayaspa imatachus ruwasaq chayta allinta qhawankichis, jinaspa noqa jina ruwankichis.
18 Noqapas, noqawan kaqkunapas oveja waqrata tocaqtiykun qankunapas llapa muyuriqpi tocallankichistaq. Jinaspa qaparinkichis: ¡Jehová Diospa guerran, Gedeonpa guerran!, nispa”.
19 Gedeonwan pachaj runakunapiwanqa manaraq kuska tutata* jinan chayarqanku Madián runakunaq karpakusqanku qayllaman. Tuta cuidaq soldadokunapas chayraqmi cambiasqa karqanku. Jinan paykunaqa apasqanku oveja waqrata tocarqanku,+ apasqanku unu p’uyñutapas p’akirqanku.+
20 Kinsantin t’aqa soldadokunan apasqanku oveja waqrata tocarqanku, apasqanku p’uyñutapas p’akirqanku. Lloq’e makinkupin jap’irqanku nina k’anchayta, paña makinkuwantaq oveja waqrata tocarqanku. Qaparirqankutaq: “¡Jehová Diospa, Gedeonpa espadan!”, nispa.
21 Paykunaqa mana kuyurispan kaqllapi karpa-karpa muyuriqpi sayarqanku, Madián soldadokunataq qaparispa ayqekurqanku.+
22 Kinsa pachajnintin soldadokunan mana samaspa tocashallarqanku oveja waqrata. Jehová Diostaq chay runakunata paykunapurata maqanachirqan.+ Wakin soldadokunaqa Zererá ladomanmi ayqekurqanku Bej-Sitakama, Tabaj cercapi Abel-Meolakama.+
23 Gedeonqa Neftalí ayllu runakunata, Aser ayllu runakunata, llapa Manasés ayllu runakunatawanmi wajachimurqan.+ Jinan paykunaqa Madián runakunaq qhepanta phawarqanku.
24 Gedeonqa Efraín orqo-orqopi tiyaq runakunamanwanmi willachimurqan: “Jaykumuychis Madián runakunata jap’iysiwaychis. Jordán mayu chimpanakunata, Bej-Bará mayukuna chimpanakunatawan jark’amuychis”, nispa. Jinan Efraín ayllu runakunaqa llapanku jaykumuspanku Jordán mayu chimpanakunata, Bej-Bará mayukuna chimpanakunatawan jark’arqanku.
25 Paykunan jap’irqanku Madián runakunaq iskaynin umallinta, Orefta Zeftawan. Oreftan wañuchirqanku Oref qaqapi,+ Zeftataq wañuchirqanku Zef nisqa uvas sarunapi. Madián runakunata qatisqanku+ qhepamantaq, Orefpa umanta Zefpa umantawan Gedeonman aparqanku, payqa Jordán mayu cercapin kasharqan.
Uraypi willakuykuna
^ Khatatataytaqa “kharkatiy” nillankutaqmi.
^ Hebreo rimaypiqa “Alqo jina unuta laqt’aqkunata” ninmi.
^ Langostaqa jatun t’isku-t’isku otaq jatun ch’illiku jinan. Chay langostakunaqa sinchi q’aruqmi kanku.
^ Chaypiqa “tutapi iskay kaq vigilia qallarishaqtin” nillanmantaqmi. Chayqa karqan las diesmanta las dos tutamantankaman.
