Lucas 15:1-32
15 Impuesto cobraqkunapas juchasapa runakunapas llapankun Jesusmanqa qayllaykuqku uyarinankupaq.+
2 Chaymi fariseokunapas kamachikuy simita yachachiqkunapas rimapakuyta qallarirqanku: “Kay runaqa sumaqtan chaskin juchasapakunata, paykunawantaqmi mijunpas”, nispa.
3 Jinan Jesusqa juj rijch’anachiyta* paykunaman willarqan:
4 “¿Mayqenniykichistaq pachaj ovejayoq kashaspa jujnin chinkaqtin, isqon chunka isqonniyoqta campopi saqeykuspa mana chay chinkasqa ovejata tarinankama maskhaq rinmanchu?+
5 Tarispaqa much’un patapi apamuspan anchata kusikun.
6 Wasinman chayaspataq amigonkunata wasimasinkunatawan wajaspa nin: Noqawan kuska kusikuychis, chinkasqa ovejaytan tariramuni,+ nispa.
7 Niykichismi: Chhaynallataqmi janaq pachapipas aswan kusikuy kanqa juj juchasapa juchanta saqespa Diosman kutirikusqanmanta,+ isqon chunka isqonniyoq chanin runakunamantaqa, paykunaqa manañan pesapakunankuñachu.
8 ”Pi warmipas chunka dracma* qolqenmanta jujninta chinkachispaqa, ¿manachu mecherota* jap’ichispa wasinta pichanman, jinaspa allinta maskhanman chay qolqeta tarinankama?
9 Tarispaqa amigankunata wasimasinkunatawan wajaspan nin: Noqawan kuska kusikuychis, chinkachisqay dracma qolqetan tariruni, nispa.
10 Niykichismi: Chhaynallataqmi Diospa angelninkunapas anchata kusikunku juj juchasapa juchanta saqespa Diosman kutirikusqanmanta”,+ nispa.
11 Chaymantataq Jesusqa nirqan: “Juj runaqmi karqan iskay churinkuna.
12 Sullk’a kaqmi taytanta nirqan: Papáy, kaqniykikunamanta tupaqniyta qopuway, nispa. Jinan chay runaqa kaqninkunata paykunaman rakipurqan.
13 Pisi p’unchaykunamantataq sullk’a kaq wawanqa llapa imachus tupaqninta apakapuspa juj lado nacionman ripurqan, chaypitaq munasqanman jina mana allinta kausaspa llapa kaqninkunata tukupurqan.
14 Chaymantataq jatun yarqay chay llaqtantinpi karqan, jinan paypas yarqaypi rikukurqan.
15 Chaymi payqa chay llaqtapi juj runaqta llank’apakuq rirqan, jinan chay runaqa camponman kacharqan khuchinkunata michinanpaq.+
16 Chaypin payqa khuchikunaq mijunantaraq mijuyta munaq, manataq pipas imallatapas qoqchu.
17 ”Chaymi yuyayman kutispa nirqan: ¡Taytaypa llank’apakuqninkunaqqa puchu-puchuraqmi mijunanku kashan, noqataq kaypi yarqaymanta wañushaniña!
18 Sayarispa taytayman kutipusaq, jinaspa nisaq: Papáy, janaq pachapi kaq Dios contra qan contra iman juchallikuni.
19 Manañan, wawáy niwanaykipaq jinañapaschu kani, jujnin llank’apakuqniykita jinallaña chaskiykuway, nispa.
20 Jinan sayarispa taytanman ripurqan. Taytantaq karullapiraq kashaqtin payta rikurqan, jinaspa mayta khuyapayaspa payman phawarirqan, abrazaykuspataq much’aykurqan.
21 Jinan payqa taytanta nirqan: Papáy, janaq pachapi kaq Dios contra qan contra iman juchallikuni.+ Manañan, wawáy niwanaykipaq jinañachu kani, nispa.
22 Taytantaq ichaqa kamachinkunata nirqan: Pampakama chayaq aswan allin kaq p’achata usqhaylla orqomuychis, jinaspa chaywan p’achachiychis, makinmanpas anillota churaychis, chakinmanpas usut’ata churaychis.
23 Chaymantapas wirayachisqa malta torota apamuspa ñak’aychis, jinaspa mijusunchis kusirikusunchis;
24 kay wawayqa wañusqan kasharqan, kausarimpuntaq;+ chinkasqan kasharqan, tarisqataq kapun, nispa. Jinan kusikuyta qallarirqanku.
25 ”Kuraq kaq wawanqa chajrapin kasharqan, chaymanta kutimuspa wasiman qayllaykamusqanman jinan tocaqta tusuqta ima uyarirqan.
26 Chaymi jujnin kamachita wajaspa tapurqan: ¿Iman kashan?, nispa.
27 Jinan payqa nirqan: Wayqeykin kutimpusqa, qhalillataqmi kashanpas, chaymi taytayki wirayachisqa malta torota ñak’achispa fiestata ruwachishan, nispa.
28 Jinan payqa sinchita phiñakuspa mana jaykuyta munarqanchu. Chaymi taytanqa lloqsimuspa jaykunanpaq rogarqan.
29 Paytaq taytanta nirqan: Khaytukuy watañan kamachi jinaraq qanpaq llank’ashani mana juj kutillapas kamachikuyniykikunata p’akispa, chaywanpas qanqa manan jayk’aqpas juj cabrachallatapas qowarqankichu amigoykunawan kusirikunaypaq.
30 Ramera warmikunawan purispa kaqniykikunata tukuq wawayki chayamuqtintaq ichaqa wirayachisqa malta torotaraq ñak’arachipusqanki, nispa.
31 Taytantaq nirqan: Wawáy, qanqa noqawanpunin kashanki, tukuy imaypas qanpan.
32 Kay wayqeykin ichaqa wañusqa kashaspa kausarimpun, chinkasqa kashaspa tarisqa kapun; chaymi kusirikunanchis”, nispa.
Uraypi willakuykuna
^ Chaypiqa “ejemplota” otaq “tupanachiyta” nillanmantaqmi.
^ Qhaway “Astawan yachanapaq B14” nisqata.
^ Chaypiqa “lamparata” nillanmantaqmi.
