Lucas 16:1-31
16 Chaymantataq Jesusqa discipulonkunata nirqan: “Juj qhapaq runamanmi willarqanku: Mayordomoykin kaqniykikunata ch’usaqyachipushan, nispa.
2 Jinan payqa mayordomonta wajachimuspa nirqan: Qanmantan mana allin rimayta uyarishani. Mayordomo kayniykimanta llapanta cuentata qoway, qanqa manañan wasiypi kaqniykunataqa qhawawaqñachu, nispa.
3 Jinan mayordomoqa sonqonpi nirqan: Kunanri, ¿imatataq ruwasaq patronniy mayordomo kayniymanta wijch’upuwaqtinri? Manamá riki kallpaypas kanñachu chajrapi llank’anallaypaqpas, p’enqaymá limosna mañakuypas.
4 ¡Ah! Yachaniña imachus ruwanayta, chhaynapi mayordomo kayniymanta wijch’usqa kaqtiy pillapas wasinpi chaskiwananpaq, nispa.
5 Jinan payqa patronninman manu kaqkunata sapankata wajarqan. Jujnintan nirqan: ¿Jayk’an patronniyman manu kashanki?, nispa.
6 Jinan manukuqqa nirqan: Pachaj barril* aceituna aceite* manun kashani, nispa. Mayordomotaq payta nirqan: Manukusqaykimanta kay qelqata jap’iy, jinaspa tiyaykuspa usqhaylla pisqa chunkallataña qelqay, nispa.
7 Jujnin manukuqtan nillarqantaq: Qanri, ¿jayk’ataq manu kashanki?, nispa. Jinan chay manukuqqa nirqan: Pachaj carga* trigon manu kashani, nispa. Jinan mayordomoqa paytapas nirqan: Manukusqaykimanta kay qelqata jap’iy, jinaspa pusaq chunkallataña qelqay, nispa.
8 Patrontaq chay mana chanin mayordomoq yachaywan ruwasqanmanta* mayta admirakurqan. Kay pacha runakunaqa k’anchaypi puriq runakunamantaqa+ aswan yachaysapan kanku jujkunapaq imatapas ruwaspankuqa.
9 ”Qankunatan nillaykichistaq: Mana chanin qhapaq kaykunawan amigokunata ruwaychis,+ chhaynapin paykunaqa chay qhapaq kaykuna tukukapuqtin wiñay tiyanakunapi chaskisunkichis.+
10 Pisillapi junt’aq runaqa askhapipas junt’aqllataqmi, pisillapi mana chaninta imatapas ruwaqqa askhapipas mana chanintan imatapas ruwanqa.
11 Chayrayku, manachus junt’aq kankichis mana chanin qhapaq kaykunawan chayqa, ¿piñataq confiasunkichisman cheqaq qhapaq kaykunatari?
12 Manachus jujkunaq kaqninwanpas junt’aq kankichis chayqa, ¿pitaq imallatapas qosunkichisman?+
13 Manan pi kamachipas iskay patrontaqa serviyta atinmanchu, mana chayqa jujnintan cheqnikunman jujnintataq munakunman, jujninmanmi k’askakunman jujnintataq pisichanman. Manan atiwaqchischu Diostawan Qhapaq Kaytawan serviytaqa”,+ nispa.
14 Qolqe sonqo fariseokunan llapa chaykuna nisqanta uyarisharqanku, chaymi Jesusta asipayaspa millayta qhawaykurqanku.+
15 Jinan Jesusqa paykunata nirqan: “Qankunaqa runakunaq qhawarinanpaqmi chanin runaman tukunkichis,+ Diosmi ichaqa sonqoykichista reqsin.+ Runakuna ukhupi imapas allinpaq jap’isqa kaqqa millakunapaqmi Diospaqqa.+
16 ”Kamachikuy simipas profetakunaq qelqasqanpas Juankamallan karqan. Chaymantapachan ichaqa Diospa gobiernonmanta allin willakuykuna willasqa kashan, imaymana clase runakunataq chayman jaykunankupaq tukuy atisqankuta ruwashanku.+
17 Cielopas kay pachapas tukukapunmanraqmi, kamachikuy simimantan ichaqa manapuni juj letraq imachallanpas chinkanmanchu manachus junt’akunqa chayqa.+
18 ”Pipas esposanmanta t’aqakuspa* jujwan casarakunman chayqa, pantay juchamanmi urmashanman. Pipas qosanmanta t’aqanasqa warmiwan casarakuqpas pantay juchamanmi urmashallanmantaq.+
19 ”Juj runan karqan qhapaqllaña, payqa azulniraq puka p’achawan lino p’achawan imallan p’achakuq, sapa p’unchaytaq imaymana kaqninkunawan kusirikuq.
20 Paypa punkunmanmi churaqku lleq nishaq k’irikunayoq limosna mañapakuq runata, chay runaq sutinmi karqan Lázaro.
21 Payqa qhapaqpa mesanmanta ususqakunataraqmi mijuyta munaq, alqokunapas jamuspan k’irinkunata llaqwaq.
22 Tiempowantaq chay runaqa wañukapurqan, jinan angelkuna Abrahanpa ladonman* apapurqanku.
”Qhapaq runapas wañukapullarqantaqmi, jinan paytaqa p’ampapurqanku.
23 Sepulturapi* ñak’arishaspan payqa wichayta qhawarispa karupi rikurqan Abrahanta, Lazarotaq ladonpi* kasharqan.
24 Jinan payqa wajarikurqan: Taytáy Abrahán, khuyapayaykuway, Lazarota kachamuway dedo puntallantapas unuman challpuykuspa qalluyta thasnuykachinanpaq, maytapunin ñak’arishani kay nina rauraypi, nispa.
25 Abrahantaq ichaqa payta nirqan: Wawáy, ¿manachu yuyarinki kausashaspa imaymana allin kaqkunawan kusirikusqaykita? Lazaron ichaqa khuyayta ñak’ariq. Chaymi payqa kusisqa kaypi kashan, qantaq ñak’arishanki.
26 Jinaspapas sinchi jatun ukhu wayq’on noqaykutaqa qankunamanta t’aqashawanku, chayrayku pipas kaymanta qankunaman jamuyta munaqqa manan atinmanchu, nitaq qankunapas chimpamuyta atiwaqchischu, nispa.
27 Chay runataq nirqan: Chhaynaqa taytáy, papaypa wasinmanyá Lazarota kacharapuway,
28 chaypin pisqa wayqeykunaraq kashan, paykunaman willaykampuwachun lliu imaymanakunata, chhaynapi kay ñak’ariyman mana chayamunankupaq, nispa.
29 Jinan Abrahanqa nirqan: Moisespa qelqasqankunapas profetakunaq qelqasqankunapas paykunawantáq kashanqá, chaykunatayá kasukuchunku,+ nispa.
30 Paytaq nirqan: Taytáy Abrahán, manan uyarinkumanchu, pipas wañusqanmanta kausarispa paykunaman rillaqtinmi Diosmanqa kutirikunqaku,* nispa.
31 Abrahantaq payta nirqan: Manachus Moisespa qelqasqankunatapas profetakunaq qelqasqankunatapas kasukunqakuchu chayqa,+ wañusqamantaña jujnin kausarispa paykunaman riqtinpas manayá kasukunqakuchu, nispa”.
Uraypi willakuykuna
^ Griego rimaypiqa “Pachaj bato” ninmi. Juj bato medidamanqa 22 litron jaykuq. Qhaway “Astawan yachanapaq B14” nisqata.
^ Aceituna aceitetaqa “olivo aceite” nillankutaqmi.
^ Griego rimaypiqa “Pachaj coro” ninmi. Juj coro medidamanqa 220 litron jaykuq. Qhaway “Astawan yachanapaq B14” nisqata.
^ Chaypiqa “yachaysapa kayninmanta” otaq “allin yuyaywan ruwasqanmanta” nillanmantaqmi.
^ Chaypiqa “divorciakuspa” nillanmantaqmi. Chaypiqa leykunaq nisqanman jina jujpaqkama t’aqanakuymantan rimashan.
^ Griego rimaypiqa “qhasqonman” ninmi.
^ Griego rimaypiqa “qhasqonpi” ninmi.
^ Chaypiqa “juchankumantaqa pesapakunqaku” nillanmantaqmi.
