Lucas 20:1-47
20 Juj p’unchaymi Jesusqa templopi runakunata yachachisharqan allin willakuykunatapas willasharqan; chayllamanmi umalli sacerdotekuna, kamachikuy simita yachachiqkuna, umalliq runakunapiwan* payman qayllaykurqanku;
2 jinaspa tapurqanku: “Niwayku, ¿piqpa kamachisqantaq qanri kaykunata ruwanki? ¿Pin kachamurqasunki kaykunata ruwanaykipaq?”,+ nispa.
3 Jinan Jesusqa paykunata nirqan: “Noqapas jujta tapullasaykichistaq. Niwaychis:
4 ¿Pin Juanta kachamurqan bautizananpaq? ¿Dioschu* icha runakunachu?”, nispa.
5 Jinan paykunapura ninakurqanku: “Diosmi nisunchis chayqa, ¿imaraykun mana creerqankichischu?, niwasunchá riki.
6 Runakunan nisunchis chaypas, llaqtachá rumiwan ch’aqespa wañuchiwasunman, paykunaqa profetapaqpunin Juantaqa jap’inku”,+ nispa.
7 Chaymi paykunaqa nirqanku: “Manan yachaykuchu”, nispa.
8 Jinan Jesusqa paykunata nirqan: “Chhaynaqa manan noqapas nisaykichischu piqpa kamachisqanchus kaykunata ruwani chayta”, nispa.
9 Chaymantataq Jesusqa runakunaman juj rijch’anachiyta* willarqan: “Juj runan chajranpi uvasta plantarqan,+ chaytataq llank’aqkunaman arrendopi qorqan, jinaspa unaypaq karu llaqtaman viajarqan.+
10 Cosecha tiempo chayamuqtintaq chajrayoqqa juj kamachinta llank’aqkunaman kacharqan chajraq rurusqanmanta tupaqninta chaskimunanpaq. Llank’aqkunan ichaqa maqaykuspanku ch’usaq makintinta qatirparirqanku.+
11 Jinan chajrayoqqa juj kamachintañataq kacharqan. Chay kamachitapas maqaykullarqankutaqmi, millayta k’amispankutaq mana imayoqta paytapas qatirparirqanku.
12 Wajmantan chajrayoqqa juj kaq kamachintañataq kacharqan, ichaqa paytapas maqaykuspan qarqorqanku.
13 Jinan uvas chajrayoqqa nirqan: Kunanri, ¿imatataq ruwasaq? Munakusqay churiytachá kachasaq,+ paytaqa respetanqakuchá, nispa.
14 Chaymi churinta kacharqan, llank’aqkunataq payta rikuruspa ninakurqanku: Kaymi herencia chaskiqqa, jaku wañuchimusun, chhaynapi herencianta jap’ikapunanchispaq, nispa.
15 Jinan paykunaqa uvas chajramanta jawaman aysaspa wañuchipurqanku.+ Chhaynaqa, ¿imatan uvas chajrayoq paykunata ruwanqa?
16 Jamuspan chay llank’aqkunata wañuchipunqa, uvas chajrantataq jujkunaman arrendanqa”, nispa.
Chayta uyarispan runakunaqa nirqanku: “¡Amapuni chayqa jayk’aqpas pasachunchu!”, nispa.
17 Jesustaq paykunata qhawaykuspa nirqan: “Diospa simin qelqan nin: Perqaqkunaq wijch’usqan rumin esquina jap’iq jatun kaq rumi kapun,+ nispa. Niwaychis imaninantachus chay nishan chayta.
18 Pipas chay rumiman urmaqqa ñut’usqan kanqa,+ pimanchus chay rumi urmanqa chaytaq saqtasqa kanqa”, nispa.
19 Kamachikuy simita yachachiqkunawan umalli sacerdotekunawantaq repararqanku chay rijch’anachiyta willaspaqa paykunamanta rimashasqanta, chaymi chay ratupi jap’iyta munarqanku, ichaqa runakunatan manchakurqanku.+
20 Chaywanpas Jesustaqa imaynamantapas urmachiytapunin munasharqanku, chaymi wakin runakunaman pakallapi pagarqanku chanin runaman tukuspa payman rinankupaq, chhaynapi ima rimasqallanpipas pantachispa+ gobiernoman llaqtapi kamachiqmanwan entreganankupaq.
21 Jinan chay runakunaqa rispa Jesusta nirqanku: “Yachachikuq, yachaykun cheqaq rimaq kasqaykita, cheqaq yachachiq kasqaykitapas; qanqa manan pimanpas sayapakunkichu, aswanpas Diospa ñannintan cheqaqta yachachinki.
22 Niwayku: ¿Allinchu Roma reyman* impuesto pagay, icha manachu?”, nispa.
23 Jinan Jesusqa pantachiy munasqankuta reparaspa nirqan:
24 “Qhawachiwaychis juj denario qolqeta.* ¿Piqpa uyanmi kaypi kashan? ¿Piqpan kay sutipas?”, nispa. Paykunataq nirqanku: “Roma reypan”, nispa.
25 Chaymi Jesusqa paykunata nirqan: “Chhaynaqa, Roma reypa kaqtaqa Roma reyman qopuychis,+ Diospa kaqtataq Diosman qopuychis”,+ nispa.
26 Paykunaqa manan ima rimasqanpipas Jesusta pantachiyta atirqankuchu, aswanmi imaynatachus kutichisqanmanta admirakuspa ch’in kapurqanku.
27 “Kausarimpuyqa manan kanchu” niq wakin saduceokunapas*+ Jesusman qayllaykuspan nirqanku:+
28 “Yachachikuq, Moisesmi qelqarqan: Pi runapas manaraq wawayoq kashaspa wañupunman chayqa, wayqenmi chay wañuqpa esposanwan casarakapunqa, chhaynapi wawata churiyapunanpaq,+ nispa.
29 Juj familiapin karqan qanchis wayqentin runakuna. Ñaupaq kaqmi casarakurqan, manaraq wawayoq kashaspataq wañukapurqan.
30 Jinan iskay kaq wayqeqa chay wañuqpa viudanwan casarakurqan, ichaqa paypas wañukapullarqantaqmi.
31 Chhaynallataqmi karqan kinsa kaqwanpas llapa qanchisnintinwanpas; llapankun mana wawallayoq wañukapurqanku.
32 Chay qhepamanqa chay warmipas wañukapullarqantaqmi.
33 Qanchisnintintaq chay warmiwan casarakurqanku chayqa, ¿mayqenninkuq esposantaq kanqa kausarimpuy kaqtinri?”, nispa.
34 Jinan Jesusqa paykunata nirqan: “Kay pacha runakunaqa* casarakunkun, casarachisqapas kanku;
35 ichaqa jamuq tiempopi kausanankupaq jina, wañusqamanta kausarichisqa kanankupaq jina kaqkunaqa manan casarakunqakuchu, manallataqmi casarachisqapaschu kanqaku,+
36 mana wañuqtaqmi kanqakupas; paykunaqa angelkuna jinan kanqaku, kausarichisqa kasqankuraykutaq Diospa wawankuna kanqaku.
37 Wañusqakuna kausarichisqa kananmantaqa Moisesraqmi rimarqan raurashaq sach’amanta qelqasqanpi, chaypin nirqan Jehová* Diosqa “Abrahanpa Diosnin, Isaacpa Diosnin, Jacobpa Diosnin”+ kasqanta.
38 Payqa manan wañusqakunaq Diosninchu, aswanpas kausaqkunaq Diosninmi; paypaqqa llapankupas kausashanmi”,+ nispa.
39 Jinan kamachikuy simita wakin yachachiqkunaqa nirqanku: “Yachachikuq, allintan rimarunki”, nispa.
40 Paykunaqa manañan imatapas tapuyta munarqankuñachu.
41 Chaymantataq Jesusqa paykunata tapurqan: “¿Imaynapitaq ninku: Cristoqa Davidpa churinmi, nispa?+
42 David kikinmá riki Salmos qelqapi nirqan: Jehová* Diosmi Señorniyta nirqan: Paña ladoypi tiyaykuy,
43 enemigoykikunata chaki sarunaykiman churanaykama,+ nispa.
44 Davidtaq, Señor nirqan chayqa, ¿imaynapitaq payri churin kanman?”, nispa.
45 Jinaspan llapa runakuna uyarishaqtin discipulonkunata nirqan:
46 “Kamachikuy simi yachachiqkunamanta allinta waqaychakuychis, paykunaqa pampakama p’achayoqmi maypipas puriyta munanku, mercado plazakunapipas napaykunatapunin munanku, sinagogakunapipas ñaupaqllapin tiyayta munanku, jatun mijuykunapipas allin kaq tiyanallapin tiyayta munanku;+
47 jinaspapas paykunaqa viudakunaq kaqninkunatan* rajranku, jujkunaq qhawarinallanpaqtaq unaytaraq mañakunku. Paykunaqa aswan castigasqan kanqaku”, nispa.
Uraypi willakuykuna
^ Chaypiqa “kuraq runakunapiwan” nillanmantaqmi.
^ Griego rimaypiqa “Janaq pachachu” ninmi.
^ Chaypiqa “ejemplota” otaq “tupanachiyta” nillanmantaqmi.
^ Griego rimaypiqa “Cesarman” ninmi. Chhaynatan sutichaqku Roma llaqtapi wakin reykunata. Qhaway Explicasqa simikuna nisqapi “César” nisqata.
^ Juj denario qolqeqa juj p’unchay llank’asqamanta pagon karqan. Qhaway “Astawan yachanapaq B14” nisqata.
^ Qhaway Explicasqa simikuna nisqapi “Saduceokuna” nisqata.
^ Chaypiqa “Kay tiempo wawakunaqa” nillanmantaqmi. Qhaway Explicasqa simikuna nisqapi “Tiempo, pacha” nisqata.
^ Qhaway “Astawan yachanapaq A5” nisqata.
^ Qhaway “Astawan yachanapaq A5” nisqata.
^ Griego rimaypiqa “wasintan” ninmi.
