Lucas 24:1-53
24 Semana qallariy p’unchaytataq* pacha illarimuyllata chay warmikunaqa sepulturaman rirqanku preparasqanku sumaq q’apaq qorakuna apaykusqa.+
2 Chayaspataq sepultura wisq’ana rumita juj ladoman suchuchisqata tarirqanku,+
3 jinaspa chayman jaykurqanku, ichaqa manan tarirqankuchu Señor Jesuspa cuerponta.+
4 Chaywan ancha admirasqa kashaqtinkun iskay runakuna ladonkupi rijurirqan k’ancharishaq p’achayoq.
5 Jinan paykunaqa sinchi mancharisqa umankuta k’umuykurqanku, chay runakunataq nirqanku: “¿Imanaqtintaq kausashaq kaqtari wañusqakuna ukhupi maskhashankichis?+
6 Payqa manan kaypiñachu, aswanpas kausarichisqan kapun. Yuyariychis Galileapiraq kashaspa imatachus nirqasunkichis chayta.
7 Payqa, runaq Churinqa juchasapa runakunamanmi entregasqa kanqa, k’aspipi wañuchisqan kanqa, ichaqa kinsa p’unchaymantan kausarichisqa kanqa, nispamá riki nirqasunkichis”,+ nispa.
8 Jinan paykunaqa Jesuspa imakunachus nisqanta yuyarirqanku.+
9 Sepulturamanta kutipuspataq llapa chaykunata willarqanku chunka jujniyoq apostolkunaman wakin discipulokunamanwan.+
10 Apostolkunaman willaqkunan karqan: María Magdalena, Juana, Santiagoq maman María, paykunawan kashaq wakin warmikuna ima.
11 Chay warmikunaq willasqantan ichaqa cuentopaq jina rikurqanku, chaymi mana creerqankuchu.
12 Pedron ichaqa sayarispa phawaylla sepulturaman rirqan, chayaruspataq k’umuykuspa sepultura ukhuta qhawaykurqan, jinan lino telakunallataña chaypi rikurqan. Chaymi imachus pasasqanpi piensaspa kutipurqan.
13 Chay p’unchayllataqmi Emaús nisqa aylluman risharqanku Jesuspa iskay discipulonkuna, chay aylluqa chunka jujniyoq kilómetro jina* karupin Jerusalén llaqtamantaqa kasharqan.
14 Chay discipulokunan rimasharqanku tukuy chaykuna pasasqanmanta.
15 Chaykunamanta rimaspa tapunakuspa purishaqtinkun Jesusqa paykunaman qayllaykurqan, jinaspa paykunawan kuska purirqan;
16 paykunan ichaqa mana reqsirqankuchu.+
17 Jesustaq paykunata tapurqan: “¿Imamantan afantaraq rimashankichis?”, nispa. Jinan paykunaqa llakisqa uyantin sayaykurqanku.
18 Cleopas sutiyoq kaqtaq nirqan: “¿Sapallan tiyaq waj llaqtayoq runachu kanki, chaychu mana yachanki kay p’unchaykunapi Jerusalén llaqtapi imakunachus pasasqanta?”, nispa.
19 Jinan Jesusqa paykunata tapurqan: “¿Imakunataq pasarqanri?”, nispa. Paykunataq nirqanku: “¿Manachu Nazaret llaqtayoq+ Jesusmanta imatapas uyarirqanki? Payqa profetan karqan, atiywanmi imatapas ruwaq, atiywanmi rimaqpas,+ allin qhawarisqataqmi karqan Diospa ñaupanpi runakunaq ñaupanpipas.
20 Paytan umalli sacerdotekunawan juj umallikunapiwan entregarqanku wañuchisqa kananpaq,+ jinan k’aspiman clavarqanku.
21 Noqaykuqa, paychá Israel llaqtataqa kacharichinqa, nispan nisharqayku.+ Jinaspapas chaykunaq pasasqanmantaqa ñamá kinsa p’unchayña karunpas.
22 Chaymantapas noqayku t’aqamanta wakin warmikunan admirakuytaraq willawanku, paykunan illarimuyllata sepulturata risqaku,+
23 ichaqa manan Jesuspa cuerponta tarimusqakuchu, aswanmi angelkunata rikumusqaku, chay angelkunan paykunaman willamusqa: Jesusqa kausashanmi, nispa.
24 Chaymi noqaykuwan kashaqkunamanta wakinqa sepulturata rirqanku,+ chay warmikunaq nisqanta jinatapunitaqmi tarimusqakupas, Jesustan ichaqa mana rikumusqakuchu”, nispa.
25 Jinan Jesusqa paykunata nirqan: “Yau mana yuyayniyoq, mana entiendeq sonqoyoq runakuna, ¿imaraykun mana entiendenkichischu profetakunaq llapa rimasqanta?
26 ¿Manachu Cristoqa chaykunata ñak’arinanpuni karqan,+ chhaynapi jatunchasqa kananpaq?”,+ nispa.
27 Jinaspataq Diospa simin qelqapi paymanta lliu qelqasqata entiendechirqan, Moisespa qelqasqanmanta qallarispa llapallan profetakunaq qelqasqankama.+
28 May ayllumanchus risharqanku chayman qayllaykushaqtinkutaq Jesusqa aswan karumanpas rishanman jina purishallarqan.
29 Chaymi paykunaqa qhepakunanpaq valekurqanku: “Ama jinachu kay, noqaykuwan qhepakuy, intipas ñamá chinkaykapushanña, tutayamunqañan kanpas”, nispa. Jinan Jesusqa paykunawan kuska wasiman jaykurqan.
30 Paykunawan mijushaspataq t’antata jap’ispa Diosman graciasta qorqan, phasmispataq paykunaman jaywarqan.+
31 Jinaqtinmi paykunaq ñawinkuqa kicharikurqan, jinan Jesusta reqsirurqanku, Jesustaq ichaqa ñaupankumanta qonqaylla ch’usaqman tukupurqan.+
32 Jinan paykunaqa ninakurqanku: “¿Manachu ñanpi rimapayashawaqtinchisqa, Diospa simin qelqaq nisqanta llapanta entiendechishawaqtinchisqa sonqonchisraq llanllarirqan?”, nispa.
33 Chay ratupacha sayarispataq paykunaqa Jerusalenman kutirqanku, chaypin tarirqanku chunka jujniyoq apostolkunata Jesuspa juj discipulonkunatawan juñunasqata,
34 paykunan ninakusharqanku: “Cheqaqtapunichá Señorqa kausarimpun, Simonmanpas rijurimusqan”,+ nispa.
35 Emausmanta kutimuqkunapas willakurqankun ñanpi imachus pasasqanta, imaynatachus t’antata phasmishaqtin reqsirurqanku chaytapas.+
36 Chaykunamanta rimashallaqtinkuraqmi Jesusqa paykuna chaupipi rijurirqan, jinaspa nirqan: “Thaj kay kachun qankunapaq”,+ nispa.
37 Paykunan ichaqa sinchitapuni mancharikurqanku “juj espirituchá* kayqa” nispanku.
38 Chaymi Jesusqa paykunata nirqan: “¿Imaraykun mancharisqa kashankichis? ¿Imaraykun sonqoykichispipas iskayashankichis?
39 Qhawariychis makiykunata chakiykunata, noqa kikiymi kashani. Llamiykuwaychis, qhawaykuwaychis; juj espirituqa manan tulluyoqchu ni aychayoqchu ¿riki? Rikuwasqaykichis jinapas noqaqa tulluyoqmi aychayoqmi kashani”, nispa.
40 Chayta nispataq makinkunata chakinkunatawan paykunaman qhawaykachirqan.
41 May kusisqataq admirasqataq kasharqanku chayqa, manaraqmi creesharqankuchu, chaymi Jesusqa paykunata nirqan: “¿Kashanchu imallaykichispas mijunapaq?”, nispa.
42 Jinan paykunaqa challwa kankata qorqanku,
43 Jesustaq chaskikuspa paykunaq rikushasqan mijurqan.
44 Chaymantataq Jesusqa paykunata nirqan: “Qankunawanraq kashaspaymá riki nirqaykichis:+ Moisespa chaskisqan kamachikuy simipi, profetakunaq qelqasqanpi, Salmos qelqakunapipas noqamanta qelqasqa kaqqa junt’akunanpunin,+ nispa”.
45 Chhaynapin Jesusqa paykunaq yuyayninta kicharirqan Diospa simin qelqaq imachus nisqanta allinta entiendenankupaq,+
46 jinaspa nirqan: “Diospa simin qelqapi nisqan jina, Cristoqa ñak’arinanmi karqan, kinsa p’unchaymantataq wañusqanmanta kausarimpunan karqan,+
47 paypa sutinpitaq Jerusalenmanta qallarispa llapa nacionkunapi+ willasqa kanan karqan+ runakuna juchankumanta pesapakuspa perdonasqa kanankumanta+ willakuy.
48 Chaykunamantan qankunaqa willankichis.+
49 Noqan qankunaman apachimusaykichis Taytaypa imachus prometesqanta. Chayrayku, qankunaqa Jerusalén llaqtallapi qhepakunkichis janaq pacha atiywan junt’aykusqa kanaykichiskama”,+ nispa.
50 Chaymantataq paykunataqa Betania llaqtachakama pusarqan, jinaspa makinta oqarispa paykunapaq Diosmanta mañapurqan.
51 Chayta ruwashaspan Jesusqa paykunamanta t’aqarikurqan, jinaspa janaq pachaman oqarisqa karqan.+
52 Paykunataq payman k’umuykurqanku, jinaspa Jerusalenman ancha kusisqa kutipurqanku.+
53 Sapa p’unchaytaqmi templopi kasharqanku Diosta jatunchaspa.+
Uraypi willakuykuna
^ Chayqa karqan domingo p’unchaymi, judío runakunapaqqa chaymi karqan semana qallariy p’unchay.
^ Griego rimaypiqa “soqta chunka estadio” ninmi. Juj estadioqa 185 metron karqan. Qhaway “Astawan yachanapaq B14” nisqata.
