Marcos 1:1-45
-
Bautizaq Juanpa willasqanmanta (1-8)
-
Jesuspa bautizakusqanmanta (9-11)
-
Jesusta Satanás tentasqanmanta (12, 13)
-
Galileapi Jesuspa willay qallarisqanmanta (14, 15)
-
Jesuspa ñaupaq qatikuqninkunamanta (16-20)
-
Millay espíritu qarqosqa kasqanmanta (21-28)
-
Capernaunpi Jesuspa askha runakuna qhaliyachisqanmanta (29-34)
-
Ch’inneqpi Jesuspa mañakusqanmanta (35-39)
-
Lepra onqoyniyoq runa qhaliyachisqa kasqanmanta (40-45)
1 Khaynatan qallarin Diospa Churin Jesucristomanta allin willakuykuna:
2 Profeta Isaiaspa willasqanman jinan karqan, paymi qelqarqan: “(Noqan ñaupaykita willaqniyta kachasaq, paymi ñanta allichapusunki).+
3 Ch’in ladomantan juj kunka wajakamushan: ¡Jehová* Diospa ñanninta allichaychis! Paypa ñanninta limpiaychis,+ nispa”.
4 Bautizaq Juanmi ch’inneqman rispa runakunata nirqan: “Bautizakuychis, chhaynapin rikuchinkichis juchaykichismanta pesapakusqaykichista, chhaynapin Diospas perdonasunkichis”,+ nispa.
5 Jinan runakunaqa llapa Judeamanta Jerusalenmantawan Juanman jamuqku, jinaspa Jordán mayupi paywan bautizachikuqku,* juchankutapas sut’itan willakuqku.+
6 Juanqa camelloq willmanmanta ruwasqa p’achawanmi p’achakuq, qara chumpiwantaq chumpikuq;+ langostakunata* wanqoyroq misk’inta imataq mijuq.+
7 Paymi khaynata niq: “Qhepaytan jamushan noqamanta aswan atiyniyoq, noqaqa manan k’umuykuspa usut’a watullantapas paskanaypaq jinachu kani.+
8 Noqaqa unuwanmi bautizaykichis, paymi ichaqa santo espirituwan* bautizasunkichis”,+ nispa.
9 Chay p’unchaykunapin Jesusqa Galileapi kaq Nazaret llaqtamanta jamuspa Jordán mayupi Juanwan bautizachikurqan.+
10 Unumanta lloqsimuspa jinataq rikurqan cielo kicharikamushaqta paloma jina santo espíritu pay pataman uraykamushaqtawan.+
11 Jinan cielomanta juj kunka nimurqan: “Qanmi munakusqay Churiyqa kanki, qanqa sonqoypaq jinan kanki”,+ nispa.
12 Chayllamanmi Jesustaqa Diospa espiritun kallpacharqan ch’inneqman rinanpaq.
13 Chay ch’inneqpin tawa chunka p’unchay karqan, chaypin Satanaspas tentarqan.+ Jesusqa salqa animalkunaq kasqanpin kasharqan, angelkunataq payta atienderqanku.+
14 Juanta presota jap’isqanku qhepatan Jesusqa Galileaman+ rispa Diosmanta allin willakuykunata willayta qallarirqan.+
15 Paymi niq: “Ñan señalasqa tiempoqa chayamunña, Diospa gobiernonpas ñan qayllaykamunña. Chayrayku juchaykichismanta pesapakuspa Diosman kutirikuychis,+ allin willakuykunapitaq iñiychis”, nispa.
16 Galilea qocha patanta purishaspan Jesusqa rikurqan Simonta* wayqen Andrestawan+ challwa jap’ina llikankuta qochaman wijch’uykushaqta,+ paykunaqa challwaqkunan karqanku.+
17 Jinan Jesusqa paykunata nirqan: “Qhepayta jamuychis, noqan runakuna challwayta yachachisaykichis”,+ nispa.
18 Paykunataq kaq ratu llikankuta saqerparispa payta qatikurqanku.+
19 Astawan purispan rikullarqantaq Zebedeoq wawan Santiagota wayqen Juantawan botenkupi llikankuta allichashaqta.+
20 Jinan Jesusqa paykunata wajarqanpacha. Paykunataq taytanku Zebedeota llank’apakuqkunatawan botepi saqespa Jesusta qatikurqanku.
21 Chaymantataq Capernaún llaqtaman paywan kuska jaykurqanku.
Samana p’unchay* chayamuqtin jinataq Jesusqa sinagogaman* jaykuspa chaypi yachachiyta qallarirqan.+
22 Payqa Diospa nisqanman jinapunin yachachiq,* manataq kamachikuy simita yachachiqkuna jinachu,+ chaymi runakunaqa anchata admirakurqanku imayna yachachisqanmanta.
23 Sinagogapin kasharqan millay espirituq junt’aykusqan runa, paymi qaparispa
24 nirqan: “Nazaret llaqtayoq Jesús, ¿iman noqaykuwan ruwanayki?+ ¿Wañuchiwaqniykuchu jamushanki? Allintan yachani pichus kasqaykita, qanqa Diospa ch’uya Churinmi kanki”,+ nispa.
25 Jesustaq payta phiñarikurqan: “¡Upallay, lloqsiy paymanta!”, nispa.
26 Jinan chay millay espirituqa chay runata ataquewan* jap’ichirqan, sinchita qaparispataq paymanta lloqsirqan.
27 Chaywanmi llapa runakuna ancha admirasqa ninakurqanku: “¿Imataq kayri? ¡Mosoq yachachikuymá kayqa! Millay espiritukunatapas atiywanmi kamachin, paykunataq kasukunku”, nispa.
28 Jinan Jesusmanta willakuyqa jinantin Galileaman ratulla ch’eqerirqan.
29 Chay sinagogamanta lloqsispataq Santiagowan Juanwan kuska maypichus Simonpas Andrespas tiyarqan chay wasiman rirqanku.+
30 Simonpa suegranmi+ fiebre onqoywan puñunapi kasharqan, jinan paymanta Jesusman willarqankupacha.
31 Chaymi Jesusqa payman asuykuspa makinmanta jap’iykuspa jatarichirqan, fiebretaq thanipurqan, jinan chay warmiqa paykunata atiendeyta qallarirqan.
32 Inti jaykuy qhepata ch’isinña kaqtintaq runakunaqa imaymana onqoyniyoqkunata, supaypa junt’aykusqan kaqkunatawan Jesusman pusamuyta qallarirqanku,+
33 llaqtantin runakunan punkupi juñunasqa kasharqanku.
34 Jinan Jesusqa askhata qhaliyachirqan imaymana onqoyniyoq runakunata,+ askha supaykunatataq qarqorqanpas, ichaqa manan chay supaykunataqa rimarichiqchu pay Cristo* kasqanta yachasqankurayku.*
35 Jesusqa tutallamanta rankhi-rankhillataraq jatarispan ch’in ladoman rirqan, jinaspa chaypi mañakuyta qallarirqan.+
36 Jinan Simonqa paywan kashaqkunapiwan Jesusta maskhaq rirqanku.
37 Tarispataq nirqanku: “Lliumi maskhamushasunki”, nispa.
38 Jesustaq paykunata nirqan: “Jaku waj ladokunaman, kay qaylla llaqtakunaman, chaypipas allin willakuykunata willanaypaq, chaypaqmi noqaqa jamurqani”,+ nispa.
39 Jinaspan payqa jinantin Galileapi purirqan sinagogakunapi allin willakuykunata willaspa supaykunata qarqospa ima.+
40 Chaypin lepra* onqoyniyoq runapas Jesusman jamuspa qonqoriykukusparaq rogakurqan: “Munanki chayqa, atinkin qhaliyachiwayta”,+ nispa.
41 Jesustaq payta anchata khuyapayarqan, makinta jaywarispataq llamiykurqan,* jinaspa nirqan: “Arí, munanin, qhali kapuy”,+ nispa.
42 Jinan lepra onqoyninqa kaq ratu chinkapurqan, qhalitaq kapurqanpas.
43 Chaymantataq Jesusqa allin-allinta kamachispa kachapurqan,
44 nirqanmi: “Aman pimanpas imatapas willankichu, aswanpas sacerdoteman rispa qhawachikamuy, Moisespa kamachikusqanman jinataq qhaliyapusqaykimanta ofrendata jaywamuy,+ chhaynapi paykuna yachanankupaq”,+ nispa.
45 Chay runan ichaqa ripuspa lliuman chaymanta willayta qallarirqan, chaymi Jesusqa manaña mayqen llaqtamanpas jaykuyta atiqchu runakunaq rikusqanqa, chayraykun ch’in jawakunallapiña qhepakuq. Chaywanpas tukuyneqmantan runakunaqa payman jamuqku.+
Uraypi willakuykuna
^ Qhaway “Astawan yachanapaq A5” nisqata.
^ Bautizay simiqa “challpuy” otaq “unuman chinkaykachiy” ninantan nin.
^ Langostaqa jatun t’isku-t’isku otaq jatun ch’illiku jinan. Chay langostakunaqa sinchi q’aruqmi kanku.
^ Chaypiqa “Diospa atiyninwan” nillanmantaqmi. Qhaway Explicasqa simikuna nisqapi “Santo espíritu” nisqata.
^ Paytaqa “Pedro” nikullantaqmi.
^ Qhaway Explicasqa simikuna nisqapi “Samana p’unchay” nisqata.
^ Griego rimaypiqa “atiywan yachachiq” ninmi.
^ Chaypiqa “epilepsiawan” nillanmantaqmi.
^ Chaypiqa yaqapaschá “pichus kasqanta yachasqankurayku” nillanmantaq.
^ Llamiykuytaqa “tupaykuy” nillankutaqmi.
