Mateo 11:1-30
11 Chunka iskayniyoq discipulonkunaman imachus ruwanankuta yachachiyta tukuspan Jesusqa chaymanta ripurqan juj llaqtakunapi yachachinanpaq allin willakuykunata willananpaq ima.+
2 Bautizaq Juanmi carcelpi kashaspa+ uyarirqan Cristoq imaymanakuna ruwasqanta, chaymi discipulonkunata kacharqan:+
3 “¿Qanchu kanki jamunan karqan chay, icha jujtachu suyakusaqku?”,+ nispa tapumunankupaq.
4 Jinan Jesusqa paykunata nirqan: “Juanman kutispa willamuychis imachus uyarisqaykichista rikusqaykichistawan:+
5 ñausakunan qhawarinku,+ such’ukunan puririnku, lepra onqoyniyoqkunan+ qhaliyachisqa kanku, roqt’ukunan uyarinku, wañusqakunan kausarichisqa* kanku, wajchakunamantaq allin willakuykunata willakushan.+
6 Kusisqan mana iskayaspa noqapi confiaqqa”,*+ nispa.
7 Paykuna ripushaqtinkun Jesusqa runakunata Juanmanta tapuyta qallarirqan: “¿Pin karqan ch’inneqpi rikusqaykichis runa?+ ¿Wayraq maywiykachasqan carrizo* jina runachu karqan?+ Manan.
8 Chhaynaqa, ¿pin karqan? ¿Llamp’u p’achawan p’achasqa runachu? Manan, llamp’u p’achawan p’achasqa runakunaqa reykunaq wasinpimá kashanku.
9 Chhaynaqa, ¿pipunitaq karqanri? ¿Juj profetachu? Arí, juj profetan payqa karqan, profetakunamantapas aswanraqmi.+
10 Paymantan qelqasqa kashan: Noqan ñaupaykita willaqniyta kachasaq, paymi ñaupaykipi ñanta allichapusunki,+ nisqa.
11 Cheqaqtan niykichis: Runakunamantaqa* manan pipas bautizaq Juanmanta aswan kuraqqa kanchu, chaywanpas janaq pacha gobiernopiqa aswan juch’uy kaqmi Juanmanta aswan kuraqqa.+
12 Bautizaq Juanpa tiemponmantapacha kunankamaqa janaq pacha gobiernoman chayanankupaqmi runakunaqa tukuy atisqankuta ruwashanku, mana pisipaqkunataqmi chayman chayanku.+
13 Llapa profetakunaq qelqasqanpas kamachikuy simipas Juankamallan willarqan;+
14 creenkichisña manaña chaypas, paymi “jamunan karqan chay Eliasqa”.+
15 Uyarinanpaq ninriyoqqa uyarichun.
16 ”¿Pimanmi kay tiempo runakunata tupanachisaq?+ Mercado plazapi tiyashaq erqechakunamanmi, paykunan pujllaqmasinkuta ninku:
17 Flautatan* tocapurqaykiku, manataq tusurqankichischu; khuyaytan waqarqayku, manataq llakikuymanta sonqoykichista takakurqankichischu, nispa.
18 Juanqa mana mijuspa mana ujaspan jamurqan, runakunataq ninku: Supaypa junt’aykusqanmi kashan, nispa.
19 Runaq Churinmi ichaqa jamurqan mijuspa ujaspa ima,+ runakunataq ninku: Qhawariychis kay runata, payqa rajrapun,* machaqmi, impuesto cobraqkunaq juchasapakunaq amigonmi,+ nispa. Chaywanpas runaqa imatapas allinta* ruwasqanwanmi rikuchinqa yachayniyoq kasqanta”,+ nispa.
20 Chaymantataq Jesusqa wakin llaqtakunata anyayta qallarirqan, chay llaqtakunapin yaqa llapan milagronkunata* ruwarqan, paykunan ichaqa mana Diosman kutirikurqankuchu,* chaymi nirqan:
21 “¡Ay qanmanta, Corazín llaqta! ¡Ay qanmanta, Bejsaida llaqta! Qankunapi jinachus Tiro llaqtapi Sidón llaqtapipas milagrokunata ruwakunman karqan chayqa, mayñachá juchankumanta pesapakunkuman karqan qhasqa telawan churakuspa usphapi tiyaykuspa+ ima.
22 Chaymi niykichis: Juicio p’unchaypiqa* qankunan aswan castigasqa kankichis Tiro llaqtamanta Sidón llaqtamantawanqa.+
23 Qanri, Capernaún+ llaqta, ¿janaq pachakamachu oqarisqa kanki? ¡Manapunin! Aswanpas Sepulturamanmi* uraykunki,+ Sodomapichus qanpi jina milagrokuna ruwakunman karqan chayqa, kunan p’unchaykamachá chay llaqtaqa kashanman karqan.
24 Chaymi niykichis: Juicio p’unchaypiqa qankunan aswan castigasqa kankichis Sodoma llaqtamantaqa”,+ nispa.
25 Chay kutipin Jesusqa nirqan: “Taytáy, janaq pachaq kay pachaq Señornin, llapa runakunaq ñaupanpin jatunchayki, qanmi kaykunata pakarqanki yachayniyoq, allin umayoq runakunamanta, jinaspa wawa jina kaqkunaman entiendechirqanki.+
26 Arí, Taytáy, chhayna ruwayqa munasqaykiman jinan karqan”, nispa.
27 Jesusqa nillarqantaqmi: “Taytayqa tukuy imaymanatan noqaman qowan;+ manan pipas Churitaqa allinta reqsinchu, aswanpas janaq pacha Taytallan;+ manallataqmi pipas janaq pacha Taytataqa allinta reqsinchu, aswanpas Churillan, pimanchus Churi reqsichiyta munan chayllapiwan.+
28 Noqaman jamuychis, llapa sayk’usqakuna, llasa q’epiyoqkuna; noqan samachisaykichis.
29 Yugoyta apaychis, jinaspa noqamanta yachaychis, jinan samakuyta* tarinkichis; noqaqa llamp’u sonqon kani, k’umuykuq sonqoyoqmi kani.+
30 Yugoyqa llamp’ullan, q’epiypas manan llasachu”, nispa.
Uraypi willakuykuna
^ Griego rimaypiqa “jatarichisqa” ninmi.
^ Griego rimaypiqa “noqarayku mana urmaqqa” ninmi.
^ Carrizotaqa “soqos, caña” nillankutaqmi.
^ Griego rimaypiqa “Warmimanta naceqkunamantaqa” ninmi.
^ Flautaqa qenaman rijch’akuqmi.
^ Rajraputaqa “sinchi mijuq” nillankutaqmi.
^ Chaypiqa “chaninta” nillanmantaqmi.
^ Chaypiqa “atiywan ruwaykunata” nillanmantaqmi.
^ Chaypiqa “mana juchankumanta pesapakurqankuchu” nillanmantaqmi.
^ Qhaway Explicasqa simikuna nisqapi “Juicio p’unchay” nisqata.
^ Chaypiqa “almaykichispaq samakuyta” nillanmantaqmi.
