Mateo 15:1-39
15 Jinan Jerusalenmanta jamurqanku wakin fariseokuna kamachikuy simita yachachiqkunapiwan,+ jinaspa Jesusman qayllaykuspa nirqanku:
2 “¿Imaraykun discipuloykikuna p’akinku ñaupa tiempo runakunaq costumbrenta? Paykunaqa manamá riki mijunankupaqpas makinkutaqa maqchikunkuchu”,*+ nispa.
3 Jesustaq nirqan: “¿Imaraykun qankunapas costumbreykichisrayku Diospa kamachikuyninta p’akinkichis?+
4 ¿Manachu Diosqa nirqan: Tayta-mamaykitan sumaqta qhawarinki,+ nispa? ¿Manachu nillarqantaq: Pipas taytanmantapas mamanmantapas millayta rimaqqa* wañuchisqa kachun,+ nispa?
5 Qankunataq ichaqa ninkichis: Pipas taytantapas mamantapas ninqa: Qanta yanapanaypaq imachus qonay kaqtaqa Diosmanmi ofrendata jina qopuni,+ nispa chayqa,
6 manañan taytantapas mamantapas yanapananñachu, nispa. Chhaynapin qankunaqa Diospa siminta costumbreykichisrayku mana valeqman tukuchinkichis.+
7 Iskay uyakuna, sut’illantan profeta Isaiasqa qankunamanta nirqan:+
8 Kay runakunaqa simillankuwanmi jatunchawanku, sonqonkun ichaqa noqamanta karupi kashan.
9 Yanqapaqmi adorashawanku, paykunaqa runakunaq kamachikusqallantan yachachinku,+ nispa”.
10 Chaymantataq runakunata wajaspa nirqan: “Uyariychis, jinaspa entiendeychis:+
11 Runataqa manan siminman imapas jaykuqchu qhellichan, aswanpas siminmanta lloqsimuqmi runataqa qhellichan”,+ nispa.
12 Jinan discipulonkunaqa payman qayllaykuspa nirqanku: “¿Repararqankichu chay nisqaykiwan fariseokunaq phiñakusqankuta?”,+ nispa.
13 Jesustaq nirqan: “Ima plantapas janaq pacha Taytaypa mana plantasqan kaqqa t’irasqan kanqa.
14 Jina kachunku, paykunaqa ñausa umallikunan kanku. Juj ñausachus juj ñausallatataq pusanman chayqa, iskayninkun t’oqoman urmaykunqaku”,+ nispa.
15 Jinan Pedroqa nirqan: “Ñaupaq kaq rijch’anachiy churasqaykita entiendechiwayku”, nispa.
16 Jesustaq nirqan: “¿Manaraqchu qankunapas entiendenkichis?+
17 ¿Manachu yachankichis tukuy ima mijusqapas wijsaman jaykuspaqa jisp’akunapi jisp’asqa kasqanta?
18 Simimanta lloqsimuqmi ichaqa sonqomanta paqarimun, chaymi runataqa qhellichan.+
19 Sonqomantan paqarimun mana allin piensaykuna:+ runa wañuchiykuna, jujwan pantaykuna, qhelli jucha* ruwaykuna, suwakuykuna, yanqa tumpaykuna, pisichaspa k’amiykuna ima.
20 Chaykunan runataqa qhellichan, manan mana maqchisqa* makiwan mijuychu”, nispa.
21 Chaymanta ripuspan Jesusqa rirqan Tiro llaqta, Sidón llaqta ladokunaman.+
22 Chayllamanmi jamurqan Fenicia ladomanta juj warmi, jinaspa fuerteta wajakurqan: “¡Davidpa Churin Señor, khuyapayaykuway! Ususiymi supaypa sinchi ñak’arichisqan kashan”,+ nispa.
23 Jesusqa manan imanispapas nirqanchu. Chaymi discipulonkunaqa payman asuykuspa nirqanku: “Chay warmita kachapuy, qhepanchistan wajakuspa jamushan”, nispa.
24 Jinan Jesusqa nirqan: “Noqaqa Israelpi chinkasqa ovejakunallamanmi kachamusqa karqani”,+ nispa.
25 Chay warmitaq qayllaykuspa Jesusman k’umuykurqan: “¡Señor, yanapaykuway!”, nispa.
26 Jinan Jesusqa nirqan: “Manan allinchu wawakunaq t’antanta uña alqochakunaman qoyqa”, nispa.
27 Warmitaq nirqan: “Chhaynan Señor, ichaqa uña alqochakunapas dueñonkuq mesanmanta usuq t’antataqa mijunkun”,+ nispa.
28 Chaymi Jesusqa nirqan: “¡May jatun iñiyniyoqmá kasqanki! Munasqaykiman jina ruwasqa kachun”, nispa. Jinan chay warmiq ususinqa kasqan ratu qhaliyapurqan.
29 Chaymanta ripuspan Jesusqa Galilea qochaq qayllanman chayarqan,+ orqoman wichaspataq chaypi tiyaykurqan.
30 Jinan ancha askha runakuna payman jamurqanku wist’ukunata, ñuk’ukunata, ñausakunata, upakunata, imaymana onqoyniyoqkunatawan pusarikuspa; jinaspa ñaupanman asuykachirqanku, paytaq llapankuta qhaliyachirqan.+
31 Chaymi runakunaqa anchata admirakurqanku upakuna rimariqtin, ñuk’ukuna qhaliyaqtin, wist’ukuna allinta puririqtin, ñausakuna qhawariqtin ima, jinan Israelpa Diosninta jatuncharqanku.+
32 Jesustaq discipulonkunata wajaspa nirqan: “Khuyapayanin kay runakunata,+ paykunaqa kinsa p’unchayñan noqawan kashanku, manataqmi imapas mijunankupaq kanchu, manan mana mijusqataqa kachapuymanchu, ñanpipaschá pisipankuman”,+ nispa.
33 Jinaqtinmi discipulonkunaqa nirqanku: “¿Maypitaq kay ch’inneqpiri t’antata tarimuykuman khaytukuy runakunata sajsachinapaq?”,+ nispa.
34 Jinan Jesusqa paykunata nirqan: “¿Jayk’a t’antaykichismi kashan?”, nispa. Paykunataq nirqanku: “Qanchisllan kashan iskay kinsa challwachakunallapiwan”, nispa.
35 Chaymi Jesusqa llapa runakunata kamachirqan pampapi tiyaykunankupaq,
36 chay qanchis t’antata challwakunatawan jap’ispataq Diosman graciasta qorqan, phasmispataq discipulonkunaman jaywarqan, paykunataq runakunaman rakirqanku.+
37 Llapankun sajsanankukama mijurqanku, puchuq phasmikunatataq qanchis jatun canastakuna junt’ata juñurqanku.+
38 Mijuqkunaqa karqanku tawa waranqa qharikunan, kallarqantaqmi warmikunapas wawakunapas, ichaqa manan yupasqachu karqanku.
39 Llapa runakunata kachapuspataq Jesusqa boteman seqarqan, jinaspa Magadán llaqta ladoman rirqan.+
Uraypi willakuykuna
^ Chay maqchikuyqa judío runakunaq costumbrenkuman jina ch’uyanchakuymi karqan.
^ Chaypiqa “ñakaqqa” nillanmantaqmi.
^ Qhaway Explicasqa simikuna nisqapi “Qhelli jucha” nisqata.
^ Chay maqchikuyqa judío runakunaq costumbrenkuman jina ch’uyanchakuymi karqan.
