Mateo 16:1-28
16 Chaypin Jesusman qayllaykurqanku fariseokuna saduceokuna ima, pruebaman churayta munaspankutaq nirqanku: “Cielomantan juj señalta rikuyta munayku”,+ nispa.
2 Chaymi Jesusqa paykunata nirqan: “Ch’isinyashaqtin cielo nina puka kaqtinmi qankunaqa ninkichis: Allin tiempon kanqa, nispa;
3 tutamanta yana phuyu kaqtintaq ninkichis: Kunanqa paranqan, chirinqan, nispa. Chhaynatan qankunaqa cielota qhawarispa reparankichis imaynachus tiempo kanqa chayta. Chhaynaqa, ¿imaynapitaq mana atinkichischu kay tiempopi imakunachus pasasqanta reparaytari?
4 Diosta mana kasukuq* millay runakuna,* ¿señaltachu rikuyta munashankichis? Manan ima señaltapas rikunkichischu,+ aswanpas Jonasta imachus pasasqan milagrollan qankunapaqqa señal kanqa”,+ nispa. Chaykunata nispataq ripurqan.
5 Chaymantataq qocha chimpaman chimparqanku, ichaqa qonqapusqakun discipulokunaqa t’anta apayta.+
6 Jesusmi paykunata nirqan: “Allinta ñawiykichista kichariychis, cuidakuychistaq fariseokunaq saduceokunaq levaduranmanta”,+ nispa.
7 Chaymi paykunaqa ninakurqanku: “T’antata mana apamusqanchisraykuchá chaytaqa nishawanchis”, nispa.
8 Chayta yachaspan Jesusqa nirqan: “Pisi iñiyniyoq runakuna, ¿imaraykun rimashankichis t’antata mana apamusqaykichismanta?
9 ¿Manachu reparankichisraq imamantachus rimashani chayta? ¿Manachu yuyarinkichis pisqa t’antallawan pisqa waranqa qharikunata mijuchiqtiy jayk’a canasta t’antatachus juñusqaykichista?+
10 ¿Manallataqchu yuyarinkichis qanchis t’antallawan tawa waranqa qharikunata mijuchiqtiy jayk’a jatun canastakunatachus juñusqaykichista?+
11 Noqaqa manamá t’antamantachu rimasharqani, ¿imaynapitaq chaytari mana repararqankichischu? Aswanpas rimasharqani fariseokunaq saduceokunaq levaduranmanta cuidakunaykichispaqmi”,+ nispa.
12 Chayraqmi paykunaqa entienderqanku mana t’antaq levaduranmantachu rimashasqanta, aswanpas fariseokunaq saduceokunaq yachachiyninmanta cuidakunankupaq rimashasqanta.
13 Cesarea Filipo nisqa llaqta ladoman chayaqtinkun Jesusqa discipulonkunata tapurqan: “Runakunari, ¿pin ninkutaq runaq Churinmanta?”,+ nispa.
14 Paykunataq nirqanku: “Wakinqa bautizaq Juanmi ninkun,+ wakintaq Eliasmi ninku,+ wakintaq Jeremiasmi ninku, wakinñataq profetakunamanta jujninchá ninku”, nispa.
15 Jinan Jesusqa nirqan: “Qankunari, ¿pin niwankichistaq?”, nispa.
16 Jinan Simón Pedroqa nirqan: “Qanqa Criston kanki,+ kausaq Diospa Churin”,+ nispa.
17 Jesustaq payta nirqan: “Kusikuy, Jonaspa wawan Simón, manan runachu chaytaqa willarqasunki, aswanpas janaq pachapi kaq Taytaymi.+
18 Noqan niyki: Qanmi kanki Pedro,+ kay qaqa patapin+ iñiq t’aqayta jatarichisaq, manataqmi chaytaqa Sepulturaq* punkunpas atipanqachu.
19 Qanmanmi qosayki janaq pacha gobierno llavekunata, kay pachapi ima watasqaykipas ñan janaq pachapiqa watasqaña kanqa, kay pachapi ima paskasqaykipas ñan janaq pachapiqa paskasqaña kanqa”, nispa.
20 Jinaspan discipulonkunata allin-allinta kamachirqan Cristo kasqanmanta ama pimanpas willanankupaq.+
21 Chaymantapachan Jesusqa discipulonkunaman willayta qallarirqan Jerusalén llaqtaman rinanmanta, jinaspa umalliq runakuna,* umalli sacerdotekuna, kamachikuy simita yachachiqkuna ima ñak’arichispa wañuchinankumanta, kinsa p’unchaymanta kausarichisqa kananmantawan.+
22 Jinan Pedroqa juj ladoman pusaspa anyarqan: “Señor, qan kikiykita khuyapayakuy, qanqa manapunin imaraykupas chhaynapiqa tarikunkichu”,+ nispa.
23 Jesustaq kutirispa Pedrota nirqan: “¡Manan uyarisaykichu, Satanás! Jark’aytan* munashawanki, qanqa manan Dios jinachu piensanki, aswanpas runakuna jinallan piensanki”,+ nispa.
24 Jinaspan Jesusqa discipulonkunata nirqan: “Pipas qhepayta jamuyta munaqqa pay kikinta negakuchun, jinaspa ñak’arina k’aspinta* apaspa qhepayta jamushallachun.+
25 Pipas vidanta* salvayta munaqqa chinkachinqan, pipas noqarayku vidanta chinkachiqtaq salvanqa.+
26 Juj runachus kay pachapi tukuy imata tarinman, vidantataq chinkachinman chayqa, ¿ima allintaq paypaqri kanman?+ ¿Imatan runa qonman vidanrayku?+
27 Runaq Churinqa angelninkunapiwanmi Taytanpa qhapaq atiy qosqanwan* jamunqa, jinan payqa sapankaman pagapunqa imachus ruwasqankuman jina.+
28 Cheqaqtan niykichis: Kaypi sayashaqkunamanta wakinqa manapunin wañunqakuchu ñaupaqta runaq Churinta gobiernonpi jamushaqta rikunankukama”,+ nispa.
Uraypi willakuykuna
^ Griego rimaypiqa “Diosta wasanchaq” ninmi.
^ Chaypiqa “kay tiempo millay runakuna” nillanmantaqmi.
^ Chaypiqa “kuraq runakuna” nillanmantaqmi.
^ Chaypiqa “Urmachiytan” nillanmantaqmi.
^ Qhaway Explicasqa simikuna nisqapi “Ñak’arina k’aspi” nisqata.
^ Chaypiqa “lliflli kayninwan” nillanmantaqmi.
