Mateo 25:1-46
25 ”Chaymantapas janaq pacha gobiernoqa kaymanmi rijch’akun: Chunka doncella sipaskunan* mecherontinkama*+ novioman taripaq lloqsirqanku.+
2 Paykunamanta pisqan karqan mana yuyayniyoq, pisqataq allin yuyayniyoq.+
3 Mana yuyayniyoqkunaqa aparqankuña mecheronkuta chaypas, manan aparqankuchu yapanankupaq aceiteta.
4 Allin yuyayniyoqkunan ichaqa mecheronkuta apasqankumantapas apallarqankutaq yapanankupaq aceiteta.
5 Chay runa mana rijurimuqtinmi puñuy aysaqtin llapanku puñupurqanku.
6 Kuska tutatataq, ¡kaypiñan novioqa kashan, aypamuychis payman!, nispa wajakuy uyarikurqan.
7 Jinan chay sipaskunaqa jatarispa llapanku mecheronkuta alistarqanku.+
8 Mana yuyayniyoq sipaskunan allin yuyayniyoqkunata nirqanku: Juj chhikan aceiteykichista qoykuwayku, mecheroykun wañurapushanña, nispa.
9 Jinan allin yuyayniyoq sipaskunaqa nirqanku: Manapaschá llapanchismanqa aypawasunmanchu. Aswanpas phawaychis vendeqkunamanta rantirakamuychis, nispa.
10 Paykuna rantiq rishanankukamataq novioqa chayamurqan, jinan listo kashaq doncella sipaskunaqa paywan kuska casarakuy fiestaman jaykurqanku,+ punkutataq wisq’ampurqanku.
11 Chay qhepatataq wakin doncella sipaskunapas jamuspa nirqanku: ¡Señor, Señor, kichamuwayku!,+ nispa.
12 Noviotaq paykunata nirqan: Cheqaqtan niykichis, manan reqsiykichischu, nispa.
13 ”Chayrayku, makilla kashaychis,+ manan yachankichischu ima p’unchaychus ima horachus chay kananta.+
14 ”Janaq pacha gobiernoqa kaymanmi rijch’akullantaq: Juj runan karu llaqtaman ripunanpaqña kashaqtin kamachinkunata wajachimurqan, jinaspa paykunaman saqerqan kaqninkunata.+
15 Jujninmanmi qorqan pisqa bolsa qolqeta,* jujninmantaq iskay bolsata, juj kaqmantaq juj bolsata; sapankamanmi qorqan maychus ruway atisqankuman jina. Jinaspan karu llaqtaman ripurqan.
16 Pisqa bolsa qolqeta chaskiqmi chaskispa jina rirqan chaywan negocio ruwaq, jinaspa pisqa bolsa qolqetawan ganarqan.
17 Iskay bolsa qolqeta chaskiqpas iskay bolsa qolqetawanmi ganarqan.
18 Juj bolsa qolqellata chaskiqmi ichaqa rispa pampata t’oqospa patronninpa qolqenta chaypi pakarqan.
19 ”Unay tiempomantataq chay kamachikunaq patronninqa kutimurqan, jinaspa paykunamanta cuentata mañarqan.+
20 Pisqa bolsa qolqeta chaskiqmi pisqa bolsa qolqetawan apamuspa nirqan: Patronníy, pisqa bolsa qolqetan saqewarqanki; qhawariy, pisqa bolsa qolqetawan ganaruni,+ nispa.
21 Patronnintaq nirqan: ¡Kusapuni, allin kamachi! Qanqa junt’aqmi kanki. Pisi kaqniykunata qhawaspan allinta junt’arqanki. Chaymi askha kaqniykunata qhawanaykipaq churasayki.+ Kunanqa patronniykiwan kuska kusikuy,+ nispa.
22 Chayllamanmi jamullarqantaq iskay bolsa qolqeta chaskiq kamachi, jinaspa nirqan: Patronníy, iskay bolsa qolqetan saqewarqanki; qhawariy, iskay bolsa qolqetawan ganaruni,+ nispa.
23 Jinan patronninqa nirqan: ¡Kusapuni, allin kamachi! Qanqa junt’aqmi kanki. Pisi kaqniykunata qhawaspan allinta junt’arqanki. Chaymi askha kaqniykunata qhawanaykipaq churasayki. Kunanqa patronniykiwan kuska kusikuy, nispa.
24 ”Chaymantan jamullarqantaq juj bolsa qolqeta chaskiq kamachi, jinaspa nirqan: Patronníy, noqaqa yachanin nishu mañakuq kasqaykita, mana t’akasqaykimanta cosechaq kasqaykita, mana wayrachisqaykimanta oqariq kasqaykitapas.+
25 Chaymi noqaqa manchakuymanta bolsa qolqeykita pampaman pakamurqani. Kayqa apampushaykin chay qolqeykita, nispa.
26 Jinan patronninqa nirqan: Mana allin qella kamachi, yacharqankitaq mana t’akasqaymanta cosechaq kasqayta, mana wayrachisqaymanta oqariq kasqaytapas chayqa,
27 ¿imaraykutaq chhaynari mana bancomanchu qolqeyta churamurqanki? Chhaynapi kunan chayamuspay interesniyoqta chaskikapushayman karqan, nispa.
28 ”Chaymantataq patronqa juj kamachinkunata nirqan: Qechuychis chay bolsa qolqeta, jinaspa chunka bolsa qolqeta jap’iqman qoychis.+
29 Pipas kaqniyoqmanqa astawanmi qokunqa, chhaynapin imanpas aswan askharaq kanqa, mana kaqniyoqmantan ichaqa tukuy imanpas qechusqa kanqa.+
30 Chay mana valeq kamachitaqa tutayaq jawaman wijch’uychis, chaypin payqa waqanqa, mana imanakuyta atispataq kiruntaraq k’achachachinqa, nispa.
31 ”Runaq Churin+ llapa angelninkunapiwan+ lliflli kayninpi kutimuspanmi qhapaq trononpi tiyaykunqa.
32 Paypa ñaupanmanmi llapa nacionkuna juñusqa kanqa. Jinan payqa runakunata t’aqanqa, imaynan michiqpas ovejakunata cabrakunamanta t’aqan jinata.
33 Ovejakunatan+ paña ladonman churanqa, cabrakunatataq lloq’e ladonman.+
34 ”Jinan reyqa paña ladonpi kaqkunata ninqa: Jamuychis, Taytaypa sumaq qhawarisqan kaqkuna, jinaspa runakunaq qallariyninmantapacha* qankunapaq preparasqa gobiernota herenciapaq chaskiychis.
35 Qankunaqa yarqawaqtinmi mijuchiwarqankichis, ch’akiwaqtinmi ujachiwarqankichis. Mana reqsisqaña kashaqtiypas wasiykichispin sumaqta chaskiwarqankichis.+
36 Q’alalla* kashaqtiymi p’achachiwarqankichis,+ onqosqa kashaqtiymi qhawariwarqankichis, carcelpi kashaqtiymi watukuq jamuwarqankichis,+ nispa.
37 Jinan chay chanin runakunaqa ninqaku: Señor, ¿jayk’aqmi yarqasqata rikushaspa mijuchirqaykiku, ch’akisqata rikushaspapas ujachirqaykiku?+
38 ¿Jayk’aqmi mana reqsisqata rikushaspa sumaqta wasiykupi chaskirqaykiku, q’alallata rikushaspapas p’achachirqaykiku?
39 ¿Jayk’aqmi onqosqata rikushaspa, carcelpi kashaqta rikushaspapas watukuq jamurqayku?, nispa.
40 Jinan reyqa paykunata ninqa: Cheqaqtan niykichis: Kay aswan juch’uy wayqeykunamanta jujninpaq imatapas ruwaspaykichisqa noqapaqmi ruwarqankichis,+ nispa.
41 ”Lloq’e ladonpi kaqkunatataq ninqa: Qankunaqa ñakasqan kankichis, qayllaymanta ripuychis+ Saqrapaq angelninkunapaqwan+ preparasqa mana jayk’aq wañuq ninaman.*+
42 Qankunaqa yarqawaqtinmi mana mijuchiwarqankichischu, ch’akiwaqtinmi mana ujachiwarqankichischu.
43 Mana reqsisqa kashaqtiymi mana wasiykichispi chaskiwarqankichischu, q’alalla kashaqtiymi mana p’achachiwarqankichischu, onqosqa kashaqtiypas carcelpi kashaqtiypas manan qhawariwarqankichischu, nispa.
44 Jinaqtinmi paykunapas ninqaku: Señor, ¿jayk’aqtaq rikurqaykiku yarqasqata, ch’akisqata, mana reqsisqata, q’alallata, onqosqata, carcelpi kashaqtapas jinaspa mana atienderqaykikuchu?, nispa.
45 Jinan reyqa paykunata ninqa: Cheqaqtan niykichis: Kay aswan juch’uy wayqeykunamanta jujninpaq imatapas mana ruwaspaykichisqa noqapaqmi mana ruwarqankichischu,+ nispa.
46 Chaymi paykunaqa wiñay wañuyman rinqaku,+ chanin runakunataq wiñay kausayman rinqaku”,+ nispa.
Uraypi willakuykuna
^ Chaypiqa “lamparantinkama” nillanmantaqmi.
^ Doncella sipastaqa “qhariwan mana jayk’aq puñuq sipas” nillankutaqmi.
^ Griego rimaypiqa “pisqa talentota” ninmi. Greciapi juj talentoqa 20,4 kilotan pesaq. Qhaway Explicasqa simikuna nisqapi “Talento” nisqata.
^ Chaypiqa Adán Evaq wawankunamantan rimashan.
^ Chaypiqa “Pisi p’achasqa” nillanmantaqmi.
^ Chaypiqa wiñaypaq wañuymantan rimashan.
