Mateo 6:1-34
-
JESUSPA ORQOPI YACHACHISQANMANTA (1-34)
6 ”Allinta qhawarikuychis, chaytaq runakunaq rikunallanpaq chanin kaqta ruwashawaqchis;+ mana chayqa manan ima premiotapas janaq pachapi kaq Taytaykichismantaqa chaskinkichischu.
2 Wajchakunaman imatapas qospaqa ama trompetataraqchu tocay imaynan iskay uyakuna ruwanku jinataqa, chaytan paykunaqa sinagogakunapipas callekunapipas ruwanku runakunaq jatunchasqan kanankupaq. Cheqaqtan niykichis: Paykunaqa junt’asqa premioyoqñan kanku.
3 Aswanpas wajchakunaman imatapas qoshaqtiykiqa ama lloq’e makiyki yachachunchu paña makiykiq imachus ruwasqanta,
4 chhaynapin ima qosqaykipas pakallapi kanqa. Jinan pakallamanta qhawamuq janaq pacha Taytaykiqa pagapusunki.+
5 ”Mañakuspaykichispas aman iskay uyakuna jinachu kankichis,+ paykunaqa runakunaq rikunanpaqmi sinagogakunapi jatun calle esquinakunapi* sayaykuspa mañakunku.+ Cheqaqtan niykichis: Paykunaqa junt’asqa premioyoqñan kanku.
6 Qan ichaqa, mañakuyta munaspaqa cuartoykiman jaykuy, jinaspa punkuykita wisq’akamuspa mana rikuna* Taytaykimanta mañakuy.+ Jinan pakallamanta qhawamuq Taytaykiqa pagapusunki.
7 Mañakushaspaqa aman kaq simikunallatachu yapa-yapamanta rimanki, imaynan waj nacionkunamanta runakunapas ruwanku jinataqa; paykunaqa askhata rimaspanku uyarisqa kanankupaqmi piensanku.
8 Aman paykuna jinaqa kankichischu, Taytaykichisqa manaraq mañakushaqtiykichismi yachanña imakunachus necesitasqaykichista.+
9 ”Qankunaqa khaynatan mañakunkichis:+
”Taytayku* janaq pachapi kaq, sutiyki+ ch’uyapaq jap’isqa kachun.+
10 Gobiernoyki jamuchun.+ Munayniyki kay pachapi ruwakuchun+ imaynan janaq pachapipas ruwakun jinata.*
11 Kunan p’unchaypaq t’antaykuta qoykuwayku.+
12 Juchaykuta* perdonawayku, imaynan noqaykupas contraykupi juchallikuqkunata* perdonayku jinata.+
13 Ama munaychu tentacionkunaman urmanaykuta,*+ librawaykutaq Satanasmantapas,*+ nispa.
14 ”Runakunaq mana allin ruwasqasuykichistachus perdonankichis chayqa, janaq pacha Taytaykichispas perdonallasunkichistaqmi;+
15 ichaqa runakunaq mana allin ruwasqasuykichista mana perdonankichischu chayqa, Taytaykichispas manallataqmi juchaykichista perdonasunkichischu.+
16 ”Ayunaspaykichisqa+ aman iskay uyakuna jinachu llakisqa uyayoq kankichis, paykunaqa manan uyankuta maqchikunkuchu ayunashasqankuta runakuna yachananta munaspanku.+ Cheqaqtan niykichis: Paykunaqa junt’asqa premioyoqñan kanku.
17 Qan ichaqa, ayunaspaykiqa umaykita aceitewan jawikuy, uyaykitapas maqchikuy,
18 chhaynapin ayunashasqaykita runakuna mana yachanqakuchu, aswanpas mana rikuna* Taytallaykin yachanqa. Jinan pakallamanta qhawamuq Taytaykiqa pagapusunki.
19 ”Amaña kay pachapiqa qhapaq kaykunata juñuychischu,+ chaykunaqa ismupuqllan; thutapas thutanmi, suwakunapas suwakunmi.
20 Aswanpas janaq pachapi qhapaq kaykunataqa juñuychis,+ chaypiqa manan imapas ismuchinqachu, manan thutapas kanchu thutananpaq,+ manataqmi suwakunapas kanchu.
21 Maypichus qhapaq kayniyki kashan, chayllapitaqmi sonqoykipas kashan.
22 ”Ñawiqa cuerpoq k’anchayninmi.+ Chayrayku, ñawiykichus jujllata* qhawanqa chayqa, llapa cuerpoykin k’anchayniyoq kanqa.
23 Ichaqa ñawiykichus envidiakuq* kanqa chayqa,+ llapan cuerpoykin tutayaqpi kanqa. Ñawichus k’anchayta apamunanmanta tutayaqta apamunman chayqa, ¡imayna tutayaqpiraqchá llapan cuerpoqa tarikunman!
24 ”Manan pipas iskay patrontaqa serviyta atinmanchu, jujnintan cheqnikunman jujnintataq munakunman,+ jujninmanmi k’askakunman jujnintataq pisichanman. Manan qankunaqa Diostawan Qhapaq Kaytawanqa serviyta atiwaqchischu.+
25 ”Chayraykun niykichis: Amaña vidaykichismanta* llakikuychischu+ imatachus mijunaykichismanta, imatachus ujanaykichismanta, imawanchus p’achakunaykichismantapas.+ ¿Manachu vidaykichis mijunamantaqa astawan valen? ¿Manachu cuerpopas p’achamantaqa astawan valen?+
26 Allinta qhawariychis phalaq animalkunata,+ chay animalkunaqa manan tarpunkuchu, manan cosechankuchu, manan taqena wasikunapipas* mijuyta juñunkuchu. Janaq pacha Taytaykichismi chay animalkunataqa mijuchin. ¿Manachu qankunaqa chaykunamanta astawanraq valenkichis?
27 ¿Mayqenniykichistaq llakikusqanwan juj chhikallantawanpas kausayta atinman?+
28 ¿Imanaqtintaq p’achamantapas llakikunkichis? Allinta qhawariychis campopi lirio t’ikakunaq imayna wiñasqanta; chay t’ikakunaqa manan llank’ankupaschu ni puskankupaschu;
29 ichaqa niykichismi: Salomonpas+ ancha qhapaqña kashaspapas manan chay jujnin t’ika jinallapas p’achakurqanchu.
30 Chhaynatan Diosqa campopi plantakunata p’achachin; chaykunan kunan p’unchay kashan, paqarintaq hornoman wijch’uykusqa kanku, ¿chaychu qankunata mana p’achachisunkichisman, pisi iñiyniyoq runakuna?
31 Chhaynaqa, aman imamantapas llakikunkichischu,+ aman jayk’aqpas ninkichischu: ¿Imatan mijusunchis? ¿Imatan ujasunchis? ¿Imawanmi churakusunchis?,+ nispaqa.
32 Tukuy chaykunataqa waj nacionmanta* runakunallan ima jinaraq maskhashanku. Janaq pacha Taytaykichisqa yachanmi tukuy chaykuna necesitasqaykichista.
33 ”Aswanpas Diospa gobiernonta chanin kaynintawan ñaupaqtaqa maskhaychis,* jinan payqa tukuy chaykunata qosunkichis.+
34 Chaymantapas aman jayk’aqpas paqarinmantaqa llakipakunkichischu,+ paqarinpas kanqan llakikuykunaqa. Sapa p’unchay llakikuyqa chay p’unchayllapaq kachun.
Uraypi willakuykuna
^ Chaypiqa “jatun ñan tupaykunapi” nillanmantaqmi.
^ Griego rimaypiqa “pakallapi kashaq” ninmi.
^ Chaypiqa “Yayayku” nillanmantaqmi.
^ Chaypiqa “Munayniyki ruwakuchun janaq pachapipas kay pachapipas” nillanmantaqmi.
^ Griego rimaypiqa “Manuykuta” ninmi.
^ Griego rimaypiqa “manukuqniykuta” ninmi.
^ Griego rimaypiqa “Ama tentacionman churawaykuchu” ninmi.
^ Griego rimaypiqa “millay kaqmantapas” ninmi.
^ Griego rimaypiqa “pakallapi kashaq” ninmi.
^ Chaypiqa “ch’uyata” nillanmantaqmi.
^ Griego rimaypiqa “mana allin” otaq “millay” ninmi.
^ Taqena wasitaqa “despensa” nillankutaqmi.
^ Chaypiqa Diosta mana serviq runakunamantan rimashan.
^ Griego rimaypiqa “maskhashallaychis” ninmi.
