Oseas 1:1-11
1 Kaymi Beripa churin Oseasman* Jehová Diospa rimapayasqan simikuna, Oseasqa Judá ayllupi Uzías,+ Jotán,+ Ajaz,+ Ezequías+ ima kamachikusqanku tiempopin chaykunata chaskirqan,+ Israel ayllupiqa Joaspa+ churin Jeroboanmi kamachikusharqan.+
2 Jehová Dios Oseaswan rimayta qallarishaspan, Jehová Diosqa khaynata Oseasta nirqan: “Phaway juj ramera* warmiwan casarakamuy, jinan juj qharikunaq wawanta qanpaq onqokunqa. Kay llaqta runakunaqa qhelli juchata ruwasqankuraykun Diosninku Jehová Diosta saqepuwanku”,+ nispa.
3 Chaymi Oseasqa Diblainpa ususin Gomerwan casarakurqan. Jinan onqoq kapuspa juj qhari wawata onqokurqan.
4 Chaymantan Jehová Diosqa Oseasta nirqan: “Chay wawaykita Jezrel* nispa sutichay. Noqan pisi tiempollamanta Jehupa familianta cuentata mañasaq,+ Jezrelpi yawarta jich’asqankumantan cuentata mañasaq. Israelpiqa manañan ima gobiernopas kanqachu.+
5 Chay p’unchaymi Jezrel wayq’opi Israelpa flechana arconta p’akisaq”, nispa.
6 Chay warmiqa jujmantan onqoq kapullarqantaq, jinaspan juj warmi wawata onqokurqan. Jinan Diosqa Oseasta nirqan: “Chay wawata Lo-Ruamá* nispa sutichay. Noqaqa manañan Israel ayllutaqa* khuyapayasaqñachu,+ aswanpas ñaupaymantan qarqopusaq.+
7 Judá ayllutan* ichaqa khuyapayasaq.+ Paykunataqa noqa Jehová Diosninkun salvasaq.+ Ichaqa manan flechawanchu, espadawanchu, guerrawanchu, caballokunawanchu nitaq caballopi sillaykusqa soldadokunawanchu”,+ nispa.
8 Wawan Lo-Ruamata ñuñumanta p’itispataq* Gomerqa jujmanta onqoq kapullarqantaq, jinaspa juj qhari wawata onqokurqan.
9 Jinan Diosqa nirqan: “Chay wawata Lo-Amí* nispa sutichay. Qankunaqa manañan llaqtayñachu kankichis, noqapas manañan Diosniykichisñachu kasaq.
10 ”Israelpa wawankunaqa lamar-qocha patapi aqo jinaraqmi mana yupay atiy kanqa.+ Maypichus Israel runakunata nirqani: Qankunaqa manan llaqtaychu kankichis,+ nispa, chaypin paykunata nisaq: Qankunaqa kausaq Diospa wawankunan kankichis,+ nispa.
11 Judá ayllu runakunapas Israel runakunapas juj nisqallan juñusqa kanqaku.+ Juj umallitan churakunqaku jinaspa suyumanta lloqsimpunqaku, chay p’unchayqa jatun p’unchaymi Jezrelpaqqa kanqa.+
Uraypi willakuykuna
^ Oseas sutiqa Osaya sutimantan jamun, chay sutiqa “Jehová Diospa salvasqan” ninantan nin.
^ Chaypiqa “qhelli juchapi puriq” nillanmantaqmi.
^ Jezrel sutiqa “Diosmi mujuta t’akanqa” ninantan nin.
^ Hebreo rimaypiqa “Israel wasitaqa” ninmi.
^ Lo-Ruamá sutiqa “manan khuyapayasqachu karqan” ninantan nin.
^ Hebreo rimaypiqa “Judá wasitan” ninmi.
^ Ñuñumanta p’itiytaqa “januk’ay” nillankutaqmi.
^ Lo-Amí sutiqa “manan llaqtaychu” ninantan nin.
