Oseas 9:1-17
9 Diosmi nin: “Israel ama kusikuychu,+ama wakin llaqtakuna jina kusikuychu.
Ramera warmi jina* purispan noqa Diosniykimanta karunchakuwarqanki.+
Ramera warmi jina pago chaskikuytan qanqa munakunki, sapanka erapin* chayta suyakunki.+
2 Ichaqa manan erapas ni uvas sarunapas mijuchisunkichu,manan mosoq vinoykipas kanqachu.+
3 Manañan Jehová Diospa jallp’anpiñachu tiyanki,+aswanpas qanqa Efraín, Egiptomanmi kutipunki,Asiriapin millakunapaq qhelli kaqkunata mijunki.+
4 Israel runakunaqa manañan Jehová Diosmanqa vino ofrendatapas jaywanqakuchu,+ima sacrificio jaywasqankutapas manan chaskinqachu.+
Chaykunaqa wañuqniyoqpa t’antan jinan,chay sacrificiota mijuqkunaqa qhellin kanqaku.
T’antankuqa paykunallapaqmi,manan Jehová Diospa wasinmanqa jaykunqachu.
5 ¿Imatan ruwankichis juñukunaykichis p’unchaypi?*
¿Imatan ruwankichis Jehová Diospaq fiesta ruwana p’unchaypi?
6 Ch’usaqyachiymantan ayqekunqaku,+Egiptopin paykunataqa juñunqaku,+ Menfispitaq p’ampanqaku.+
Qolqemanta ruwasqa valorniyoq kaqninkunatan kisa p’ampapunqa,karpankunapin kiska wiñapunqa.
7 Manu pagana p’unchaymi chayamunqa,+castigana p’unchaymi chayamunqa,Israelqa chaytan yachanqa.
Profetaqa sonsomanmi tukupunqa, Diosmanta willaq runapas locoyapunqan,juchaykiqa jatunpunin, qanta cheqnikuypas jatunllataqmi”, nispa.
8 Juj tiempon Efrainta qhawaq+ profetaqa Diosniywan kasharqan.+
Kunantaq profetankunaq ñanninqa+ urpikunata jap’ina trampa jina kapun.
Diosninpa wasinpipas cheqninakuyllan kashan.
9 Israel runakunaqa ñaupa tiempopi Guibea jinan ruwanku,sinchi mana allin ruwaykunapin kashanku.+
Diosqa yuyarinqan juchankuta, chayman jinan castiganqa.+
10 Diosmi nin: “Israeltaqa ch’inneqpi uvasta jinan tarirqani.+
Ñaupa taytankutapas higospa ñaupaq rurunta jinan rikurqani.
Paykunan ichaqa Peorpi Baalman phawarirqanku,+chay p’enqaypi qhepachiq idolotan servirqanku,+chhaynapin chay munakusqanku ídolo jina millakunapaq kapurqanku.
11 Efrainpa allin reqsisqa kayninqa phalaq animal jinan phalaripun,manañan naceqpas kanñachu, manañan onqoq kaqpas, wijsallikuqpas kanñachu.+
12 Allintaña wawankuta uywanqaku chaypas,noqan ch’ulla-ch’ullallamanta qechupusaq.+
¡Saqerpariqtiyqa imapiraqchá tarikunqaku!+
13 Efrainqa munay pasto pampapi plantasqa kaspan Tiro llaqtata yuyarichiwaq.+
Kunanqa wañuchisqa kanankupaqmi wawankunata orqomunqa”, nispa.
14 Jehová Diosníy, paykunaman imachus qonaykita qoy;warmikunata malpariqman tukuchipuy, ñuñunkutapas ch’akichipuy.
15 Diosmi nin: “Guilgalpin mana allinkunata ruwarqanku,+ chaypin paykunataqa cheqnikurqani.
Mana allinkuna ruwasqankuraykun wasiymanta qarqopusaq.+
Manañan paykunataqa munakusaqñachu,+umallinkupas mana kasukuqkunan kanku.
16 Efrainqa wit’usqan kanqa.+
Saphinkupas ch’akipunqan, manañan jayk’aqpas rurunqakuñachu.
Wawayoqña kanqaku chaypas, noqan chay munasqa wawankutaqa wañuchisaq”, nispa.
17 Diosniymi paykunataqa saqerparinqa,mana kasukuq kasqankumantan wijch’urparinqa,+jinan maskhasqa runakuna jina waj nacionkunapi purinqaku.+
Uraypi willakuykuna
^ Era patataqa “wayrachina pata” nillankutaqmi.
^ Chaypiqa “Qhelli jucha ruwaypi” nillanmantaqmi.
^ Chaypiqa “fiesta ruwana p’unchaypi” nillanmantaqmi.
